.jpg)
គ្រោះអគ្គិភ័យនៅឫស្សីកែវ បណ្ដាលឱ្យស្ត្រីម្នាក់ស្លាប់ និង ២ នាក់របួស កាលពីម្សិលមិញ។ រូបថត FRPD
ភ្នំពេញៈ ស្ត្រី ៣ នាក់មានម្ដាយ ម្តាយមីង និងកូនបានស្លាប់ និងរងរបួសក្នុងគ្រោះអគ្គិភ័យមួយនៅភូមិបឹងសាឡាង សង្កាត់ខណ្ឌឫស្សីកែវ រាជធានីភ្នំពេញ កាលពីវេលាម៉ោង ៣ រំលងអធ្រាត្រចូលថ្ងៃទី ២៦ មករា។ នេះបើតាមរបាយការណ៍ជំហានបឋមដែលផ្ដល់ឱ្យដោយមន្ត្រីមូលដ្ឋាន។
លោក កែវ ភួន សមាជិកក្រុមប្រឹក្សាសង្កាត់ឫស្សីកែវ ប្រាប់ភ្នំពេញប៉ុស្តិ៍ថា ក្នុងជំហានបឋមនេះ សមត្ថកិច្ចបានរកឃើញជនរងគ្រោះឈ្មោះ ភុក ប៉ានពេជ្រ វលក្ខណ៍ អាយុ ២៥ ឆ្នាំ មានលំនៅក្នុងភូមិកើតហេតុបានស្លាប់ពេលបញ្ជូនទៅមន្ទីរពេទ្យ ខណៈស្ត្រីជាម្ដាយឈ្មោះ ពេជ្រ វណ្ណា អាយុ ៤០ ឆ្នាំ និងម្ដាយមីងឈ្មោះ ពេជ្រ វណ្ណី អាយុ ៣៩ ឆ្នាំបានរងរបួសមធ្យម។
លោកថ្លែងថា៖ «មកទល់ពេលនេះ សមត្ថកិច្ចនគរបាលជំនាញនៅពុំទាន់ស្រាវជ្រាវរកឃើញនូវមូលហេតុដែលបង្កឱ្យមានគ្រោះអគ្គិភ័យនេះនៅឡើយទេ»។
បើតាមលោក កែវ ភួន ក្រៅពីបណ្ដាលឱ្យមានជនរងគ្រោះស្លាប់ និងរបួសចំនួន ៣ នាក់ គ្រោះអគ្គិភ័យនេះក៏បានបង្កការឆេះខូចខាតផ្ទះចំនួន ២ ល្វែងក្នុងនោះ ១ ល្វែងឆេះខូចខាតទាំងស្រុង និងឆេះខូចខាតរថយន្ត Prius ១ គ្រឿង ព្រមទាំងសម្ភារប្រើប្រាស់ និងទ្រព្យសម្បត្តិមួយចំនួនទៀត។
លោក ព្រំ យ៉ន ប្រធានការិយាល័យបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញថ្លែងថា ក្នុងប្រតិបត្តិការពន្លត់អគ្គិភ័យនេះ នគរបាលបានព្យាយាមជួយសង្គ្រោះស្ត្រីរងគ្រោះផងដែរ បន្ទាប់ពីទៅដល់កន្លែងកើតហេតុ ដោយឃើញស្ត្រីរងគ្រោះបានសន្លប់ស្ដូកស្ដឹង និងត្រូវបានភ្លើងឆេះរលាកពេញទាំងខ្លួន។
លោកថា៖ «នៅពេលកម្លាំងនគរបាលកងពន្លត់អគ្គិភ័យយើងទៅដល់ផ្ទះជនរងគ្រោះត្រូវជាប់សោខាងក្នុងក្រុមការងារបានបាញ់ទឹកពន្លត់ផង និងព្យាយាមទម្លុះទ្វារចូលទៅសង្គ្រោះស្ត្រី ៣ នាក់ជាប់គាំងក្នុងផ្ទះដែលកំពុងឆេះនោះ។ ប៉ុន្តែក្នុងចំណោមស្ត្រី ៣ នាក់មានម្នាក់បានរងរបួសធ្ងន់ ដោយដួលសន្លប់ស្ដូកស្ដឹង និងមានឆេះរលាកពេញរាងកាយ ហើយបានស្លាប់នៅពេលបញ្ជូនទៅកាន់មន្ទីរពេទ្យ»។
លោកបន្តថា មកទល់ពេលនេះសមត្ថកិច្ចនគរបាលមិនទាន់បានសួររកមូលហេតុ ដែលបណ្ដាលឱ្យមានគ្រោះអគ្គិភ័យនេះនៅឡើយទេ ដោយជនរងគ្រោះដែលរងរបួសក្នុងគ្រោះអគ្គិភ័យកំពុងមានទុក្ខបានបាត់បង់សមាជិកគ្រួសារម្នាក់ផង និងកំពុងសម្រាកព្យាបាលរបួសខ្លួនឯងផង។ ទោះយ៉ាងណា សមត្ថកិច្ចនគរបាលនឹងបន្តធ្វើការស្រាវជ្រាវ ដើម្បីស្វែងរកការពិតលើករណីនេះ។
នៅឯខេត្តបន្ទាយមានជ័យក៏មានគ្រោះអគ្គិភ័យកើតឡើងផងដែរ នៅភូមិឈូក សង្កាត់ម្កាក់ ក្រុងសិរីសោភ័ណ នៅថ្ងៃទី ២៥ មករា បង្កឱ្យឆេះខូចខាតផ្ទះ ៣ ខ្នង និងទ្រព្យសម្បត្តិជាច្រើន។ ប៉ុន្តែមិនបង្កឱ្យមនុស្សស្លាប់ និងរងរបួសនោះទេ។ នេះបើតាមលោក សំ ប្រសិទ្ធ អធិការរងក្រុងសិរីសោភ័ណ។
តាមទិន្នន័យដែលផ្ដល់ឱ្យដោយនាយកដ្ឋានបង្ការពន្លត់អគ្គិភ័យ និងសង្គ្រោះនៃក្រសួងមហាផ្ទៃក្នុងខែមករា ដើមឆ្នាំ ២០២២ នេះ គ្រោះអគ្គិភ័យបានកើតឡើង ៧៥ ករណីនៅទូទាំងប្រទេស ដោយបង្កឱ្យមនុស្ស ២ នាក់ស្លាប់ និងឆេះខូចខាតផ្ទះ ៨០ ខ្នង រោងចក្រចំនួន ១ ព្រមទាំងខូចខាតរថយន្ត គ្រឿងចក្រ ឧបករណ៍ សម្ភារប្រើប្រាស់ និងទ្រព្យសម្បត្តិជាច្រើនទៀត៕
