ឧត្តរមានជ័យៈ ចាងហ្វាងសារព័ត៌មានក្នុងស្រុកមួយបានដាក់ពាក្យបណ្តឹងទៅកាន់ក្រសួងយុត្តិធម៌ ដោយប្តឹងចៅក្រមចំនួន ២ រូប និងព្រះរាជអាជ្ញារងចំនួន ២ រូបដោយអះអាងថា មន្ត្រីតុលាការទាំងនោះបានកាត់ក្តីដោយអយុត្តិធម៌ពាក់ព័ន្ធសំណុំរឿងជម្លោះដីធ្លីជាមួយមន្ត្រីយោធា។
លោក ប៉ែន នួន អាយុ ៤៤ ឆ្នាំរស់នៅភូមិរំចេក ឃុំអន្លង់វែង ស្រុកអន្លង់វែង ខេត្តឧត្តរមានជ័យ ដែលមានតួនាទីជាចាងហ្វាងគេហទំព័រស្រទាប់យុវវ័យបានដាក់ពាក្យបណ្តឹងចូលទៅកាន់ក្រសួងយុត្តិធម៌ ដើម្បីស្នើសុំអន្តរាគមន៍កាលពីថ្ងៃទី ២៥ ខែមករា ឆ្នាំ ២០២២។
យោងតាមពាក្យបណ្តឹងរបស់លោក ប៉ែន នួន បានប្តឹងបុគ្គលចំនួន ៤ រូបរួមមាន លោក ស៊ឹម ពិចិត្រ អតីតចៅក្រមសាលាដំបូងខេត្តឧត្តរមានជ័យ លោក គង់ រតនា អតីតព្រះរាជអាជ្ញារងអមសាលាដំបូងខេត្តឧត្តរមានជ័យ លោក លោក អ៊ុ សុភក្តិ ព្រះរាជអាជ្ញារងអមសាលាដំបូងរាជធានីភ្នំពេញ និងលោក អួង វុទ្ធា ចៅក្រមសាលាដំបូងរាជធានីភ្នំពេញ។
នៅក្នុងពាក្យបណ្តឹងនោះលោក ប៉ែន នួន បានជម្រាបទៅកាន់រដ្ឋមន្ត្រីក្រសួងយុត្តិធម៌ថា លោកត្រូវបានមន្ត្រីតុលាការខាងលើកាត់ក្តីកំបាំងមុខយ៉ាងអយុត្តិធម៌ កាលពីថ្ងៃទី ៦ ខែមករា ឆ្នាំ ២០២២ តាមពាក្យបណ្តឹងរបស់ឈ្មោះ អ៊ុក គឹមលី ជាយោធាពាក់ផ្កាយ ២ ដោយបានប្តឹងលោក កាលពីថ្ងៃទី ១៧ ខែធ្នូ ឆ្នាំ ២០២០ រឿងផ្សាយព័ត៌មានពាក់ព័ន្ធបញ្ហាដីធ្លី។
លោកបន្តថា ការប្តឹងនោះ បន្ទាប់ពីលោកចេញផ្សាយព័ត៌មានពិតរឿងករណីវិវាទដីរវាងពលរដ្ឋ ៤ គ្រួសារនៅលើផ្ទៃដី ៦ ហិកតា ស្ថិតនៅភូមិសាមគ្គី ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ។
ក្នុងពាក្យបណ្តឹងដដែលនោះលោកបានស្នើសុំអន្តរាគមន៍ពីក្រសួងយុត្តិធម៌ដោយបានគូសបញ្ជាក់ថា៖ «ខ្ញុំបាទជាជនរងគ្រោះដ៏ពិតប្រាកដ ដែលត្រូវបានបុគ្គលជាយោធាពាក់ផ្កាយ ២ ឈ្មោះ អ៊ុក គឹមលី និងឈ្មោះ យឹម សេន រំលោភយកដីហើយប្ដឹងខ្ញុំបាទឱ្យសងជំងឺចិត្តបន្ថែមទៀត ពិតជាអយុត្តិធម៌ខ្លាំងណាស់ ព្រោះខ្ញុំបាទមានឯកសារគ្រប់គ្រាន់ និងសាក្សីម្ចាស់ដីសម្រាប់ធ្វើអំណះអំណាងផ្លូវច្បាប់»។
លោក ប៉ែន នួន ប្រាប់ភ្នំពេញប៉ុស្តិ៍បន្ថែមថា ក្រសួងយុត្តិធម៌បានពិនិត្យឯកសារ និងទទួលយកពាក្យបណ្តឹងរបស់លោក ប៉ុន្តែមិនទាន់មានការឆ្លើយនៅឡើយទេ។ ទោះយ៉ាងណាលោកសង្ឃឹមថា ក្រសួងនឹងផ្តល់អន្តរាគមន៍រឿងនេះ។ បន្ថែមពីនេះលោកថា៖ «សម្រាប់រឿងក្តីឧត្តរមានជ័យ មេធាវីខ្ញុំបានប្តឹងទៅឧទ្ធរណ៍ហើយ ប៉ុន្តែនៅសាលាដំបូងក្រុងភ្នំពេញវិញ មេធាវីខ្ញុំ គាត់ដាក់ប្តឹងទាស់ឱ្យសវនាការឡើងវិញ ដោយសារតែគាត់កាត់ក្តីចោលយើង ដោយមិនមានការជូនដំណឹង»។
អ្នកនាំពាក្យតុលាការខេត្តឧត្តរមានជ័យលោក ឆេង ហុង ប្រាប់ភ្នំពេញប៉ុស្តិ៍ថា ការសម្រេចយ៉ាងណានោះជាឆន្ទានុសិទ្ធិរបស់ចៅក្រម។ លោកថា គិតត្រឹមថ្ងៃទី ២៦ ខែមករានេះ លោកមិនទាន់ទទួលលិខិតអន្តរាគមន៍ពីក្រសួងយុត្តិធម៌ឡើយ។ «ក្រសួងយុត្តិធម៌មិនទាន់បញ្ជូនលិខិតមកសាលាដំបូងខេត្តទេ បើមិនទាន់មានលិខិតទេខ្ញុំអត់មានមូលដ្ឋានអីដើម្បីបកស្រាយច្រើនដែរ»។
ទាក់ទងនឹងសំណុំរឿងនេះ លោក ប៉ែន នួន បានរៀបរាប់ថា នៅថ្ងៃទី ៦ ខែមករា ឆ្នាំ ២០២២ ចៅក្រមសាលាដំបូងរាជធានីភ្នំពេញ និងលោក អ៊ុ សុភក្តិ ព្រះរាជអាជ្ញារងបានកាត់កំបាំងមុខឱ្យលោកសងជំងឺចិត្តទៅឱ្យឈ្មោះ អ៊ុក គឹមលី ជាដើមបណ្តឹង ៦ លានរៀល និងធ្វើការជាកពិន័យ ៣ លានរៀល។ ក្នុងសំណុំរឿងតែមួយនេះដែរ បុគ្គលពាក់ផ្កាយ ២ ឈ្មោះ អ៊ុក គឹមលី បានប្តឹងលោកទៅសាលាដំបូងខេត្តឧត្តរមានជ័យផង និងទៅសាលាដំបូងក្រុងភ្នំពេញផង។ ចៅក្រមឈ្មោះ ស៊ឹម ពិចិត្រ និងព្រះរាជអាជ្ញារង ឈ្មោះ គង់ រតនា នៃសាលាដំបូងខេត្តឧត្ដរមានជ័យបានជំនុំជំម្រះកាត់ក្តីឱ្យលោកសងជំងឺចិត្តទៅឱ្យឈ្មោះ អ៊ុក គឹមលី ៤០ លានរៀល និងឈ្មោះ យឹម សេន ៤០ លានរៀល និងផាកពិន័យចូលរដ្ឋ ៥ លានរៀល។
រដ្ឋលេខាធិការក្រសួងយុត្តិធម៌លោក ជិន ម៉ាលីន បានថ្លែងយ៉ាងខ្លីនៅថ្ងៃទី ២៦ មករាថា ក្រសួងនឹងធ្វើការពិនិត្យតាមសមត្ថកិច្ចរបស់ខ្លួន។
មិនអាចទាក់ទងភាគីដើមបណ្តឹង ដើម្បីស្នើសុំធ្វើអត្ថាធិប្បាយលើបញ្ហានេះបានទេ៕