ភ្នំពេញៈ រដ្ឋសភានៃព្រះរាជាណាចក្រកម្ពុជាបានបដិសេធការចោទប្រកាន់ដោយគ្មានមូលដ្ឋានរបស់លោក Charles Santiago ប្រធានសមាជិកសភាអាស៊ានដើម្បីសិទ្ធិមនុស្ស (APHR) ចំពោះការធ្វើដំណើររបស់លោកនាយករដ្ឋមន្ត្រី ហ៊ុន សែន ទៅជួបមេដឹកនាំយោធាមីយ៉ាន់ម៉ាកាលពីថ្ងៃទី ៧-៨ មករាថា ជាដំណើរការបំផ្លាញកុងសង់ស៊ីស ៥ ចំណុចរបស់អាស៊ាន។
សេចក្តីថ្លែងការណ៍គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភាចុះថ្ងៃទី ២៤ ខែមករាបានឱ្យដឹងថា លោក Charles Santiago ដែលបច្ចុប្បន្នជាប្រធានសមាជិកសភាអាស៊ានដើម្បីសិទ្ធិមនុស្ស (APHR) និងជាសមាជិកសភាមកពីគណបក្សប្រឆាំងនៅប្រទេសម៉ាឡេស៊ីជារឿយៗត្រូវបានគេមើលឃើញថា មានជាប់ពាក់ព័ន្ធជាមួយនឹងសកម្មជននយោបាយជ្រុលនិយមមួយក្តាប់តូច ក្រុមអ្នកនយោបាយដែលចង់បង្កសង្គ្រាម ឬក្រុមជនក្រៅច្បាប់មួយចំនួន។
សេចក្ដីថ្លែងការណ៍ដដែលនេះអះអាងថា៖ «ការញុះញង់ឱ្យមានការរិះគន់ និងចេតនាប្រឆាំងនឹងរដ្ឋាភិបាលស្របច្បាប់ និងបេសកកម្មស្វែងរកសន្តិភាពរបស់សម្តេចតេជោ ហ៊ុន សែន គឺជាការប្រឆាំងទាំងស្រុង ចំពោះសន្តិភាព និងជាអំពើអសីលធម៌»។
អ្នកវិភាគនយោបាយកម្ពុជាលោក គិន ភា ថ្លែងថា គោលបំណងទស្សនកិច្ចរបស់នាយករដ្ឋមន្ត្រីកម្ពុជា គឺចង់មើលឃើញមីយ៉ាន់ម៉ាវិលត្រឡប់ទៅរកភាពប្រក្រតីឡើងវិញ ជាពិសេសចង់បានការវិលត្រឡប់មកវិញរបស់មីយ៉ាន់ម៉ាគ្រប់កិច្ចប្រជុំនានារបស់អាស៊ាន៕