.jpg)
កូនឈើដែលអាជ្ញាធរពាក់ព័ន្ធយកទៅដាំនៅតំបន់ព្រៃលិចទឹកបឹងទន្លេសាបពីថ្ងៃទី ២៥ មករា។ រូបថត BTV
សៀមរាបៈ ក្រសួងបរិស្ថាន និងអាជ្ញាធរខេត្តសៀមរាបនៅថ្ងៃទី ២៥ ខែមករា បានរួមគ្នាដាំដើមឈើឡើងវិញ ចំនួន ២ ០០០ ដើមនៅតំបន់អភិរក្សបឹងពារាំង ព្រំប្រទល់តំបន់ ៣ និងតំបន់ប្រើប្រាស់ច្រើនយ៉ាង បឹងទន្លេសាប ស្ថិតក្នុងទឹកដីខេត្តសៀមរាប ដើម្បីថែរក្សា អភិរក្សធនធានធម្មជាតិ និងជីវចម្រុះនៅបឹងទន្លេសាបឱ្យមាននិរន្តរភាពទៅថ្ងៃអនាគត។
លោក ស៊ុន គង់ ប្រធានមន្ទីរបរិស្ថានខេត្តសៀមរាបថ្លែងនៅថ្ងៃទី ២៥ ខែមករាថា ការដាំកូនឈើនៅខេត្តសៀមរាបនេះជាគោលការណ៍របស់រដ្ឋមន្ត្រីក្រសួងបរិស្ថាន ដែលលោកបានផ្តល់កូនឈើព្រៃលិចទឹក ដើមឫស្សី និងពូជគ្រាប់ត្នោត ដើម្បីយកទៅដាំនៅក្នុងព្រំដំបន់ ៣ និងតំបន់ប្រើប្រាស់ច្រើនយ៉ាងនៅក្នុងខេត្តសៀមរាបចំនួន ៤០ ហិកតា។
លោកថា ផ្ទៃដី ៤០ ហិកតានេះ គឺដាំជាជំហានៗដែលជំហានដំបូង គឺដាំចំនួន ៥ ហិកតា ដែលមានកូនឈើព្រៃលិចទឹកចម្រុះជាង ២ ០០០ ដើម។ មកដល់បច្ចុប្បន្នផ្ទៃដីតំបន់ ៣ នៃបឹងទន្លេសាបក្នុងទឹកដីខេត្តសៀមរាប មានការដកហូតបានចំនួនជាង ២៥០០ ហិកតានៅក្នុង ៦ ក្រុងស្រុក។
លោកប្រធានមន្ទីរប្រាប់ថា ការដាំកូនឈើនេះមានការចូលរួមពីមន្ត្រីជាន់ខ្ពស់ក្រសួងបរិស្ថាន រដ្ឋបាលខេត្តសៀមរាប និងមន្ទីរជុំវិញខេត្ត រដ្ឋបាលសង្កាត់ជ្រាវ សហភាពសហព័ន្ធយុវជនកម្ពុជា (សសយក) ខេត្តសៀមរាបប្រជាពលរដ្ឋ និងអ្នកពាក់ព័ន្ធផ្សេងៗទៀត សរុបប្រមាណ ២០០ នាក់។ គ្រាប់ត្នោតចំនួន ១២ ០០០ គ្រាប់នឹងគ្រោងប្រគល់ឱ្យទៅបណ្តារដ្ឋបាលក្រុងស្រុក ឬសង្កាត់យកទៅដាំនៅតាមព្រំតំបន់ ៣។
លោកបញ្ជាក់ថា៖ «ព្រឹកមិញ (២៥ មករា) យើងដាំនៅចំណុចបឹងពារាំង ដែលជាតំបន់អភិរក្សមិនថាប្រភេទត្រី មិនថា ប្រភេទសត្វទេ គឺយើងធ្វើម៉េចឱ្យព្រៃលិចទឹកដុះលូតលាស់ឡើងវិញ ដើម្បីការពារផលប្រយោជន៍ធនធានធម្មជាតិ ក៏ដូចជា ការរក្សាបានប្រព័ន្ធអេកូឡូស៊ីនៅក្នុងតំបន់ប្រើប្រាស់ច្រើនយ៉ាងបឹងទន្លេសាបនេះ»។
បើតាមលោកប្រធានមន្ទីរដើមឈើចំនួន ២ ០០០ ដើមនោះ រួមមាន ឫស្សី (ឫស្សីស្រុក និងឫស្សីពីងពង់) ២០០ ដើម រាំងទឹក ៣០០ ដើមសណ្ដាន់ ១ ៣០០ ដើម និងរំដេញ ២០០ ដើម។ កូនឈើទាំងនោះត្រូវដាំ ៥ ម៉ែត្រគុណ ៥ ម៉ែត្រ ប្រវែងជួរ ៥ ម៉ែត្រ និងចន្លោះពីដើមមួយទៅដើមមួយមានប្រវែង ៥ ម៉ែត្រពោលគឺក្នុង ១ ហិកតាអាចដាំបាន ៤០០ ដើម។
លោក ស៊ុន គង់ បានឱ្យដឹងទៀតថា ជំហានបន្ទាប់មន្ទីរបរិស្ថានគ្រោងដាំកូនឈើលើផ្ទៃដី ៣៥ ហិកតាទៀត ក្នុងភូមិសាស្ត្រ ៦ ក្រុងស្រុកនៃខេត្តសៀមរាប ប៉ុន្តែមិនទាន់កំណត់ទីតាំងច្បាស់លាស់នៅឡើយទេ។ ការដាំដើមឈើលើកក្រោយនេះនឹងដាំនៅពេលរដូវភ្លៀងជោកជាំមកដល់ដោយឡែកកូនឈើដែលបានដាំរួចរាល់នេះក៏មានការថែទាំដោយធ្វើការស្រោចទឹកក្នុង ១ ខែ ៣ ដងផងដែរ។
យោងតាមការណែនាំរបស់លោកនាយករដ្ឋមន្ត្រី ហ៊ុន សែន កាលពីថ្ងៃ ២៨ ខែវិច្ឆិកា ២០២១ បញ្ជាក់ថា ត្រូវដកហូតដីដែលបានកាប់រុករានរំលោភកាន់កាប់ខុសច្បាប់ និងត្រូវដាំឫស្សី និងកូនឈើព្រៃលិចទឹកជាច្រើនប្រភេទឡើងវិញ រួមមានឫស្សី ពីងពង់ ឫស្សីស្រុក ឫស្សីព្រៃ ដើមរាំងទឹក ដើមរំដេញ ដើមល្វា ដើមតង្កៀបក្តាម និងសណ្តាន់លើផ្ទៃដីដែលបានដកហូតសរុបទំហំ ៤៧ ០១៤,៦៩ ហិកតា ក្នុងភូមិសាស្ត្រខេត្តចំនួន ៥ មានខេត្តកំពង់ឆ្នាំងទំហំ ២៧៨៣៨,១៤ ហិកតាត្រូវដាំស្តារសាកល្បងទំហំ ៥០ ហិកតា ខេត្តកំពង់ធំទំហំ ៩ ១០៩,៧៩ ហិកតាត្រូវដាំស្តារសាកល្បងទំហំ ៤៥ ហិកតា ខេត្តសៀមរាប ទំហំ ២ ២៤៨,៦១ ហិកតា ត្រូវដាំសាកល្បងទំហំ ៤០ ហិកតា ខេត្តបាត់ដំបងទំហំ ៤ ៣៤៧,១៥ ហិកតាត្រូវដាំស្តារសាកល្បងទំហំ ៤០ ហិកតា និងខេត្តបន្ទាយមានជ័យទំហំ ៣ ៤៧១,០០ ហិកតា ត្រូវដាំស្តារសាកល្បងទំហំ ២៥ ហិកតា។
លោក លី សំរិទ្ធិ អភិបាលរង និងជាអ្នកនាំពាក្យរដ្ឋបាលខេត្តសៀមរាបបានថ្លែងនៅថ្ងៃទី ២៥ ខែមករាថា ខេត្តសៀមរាបបានធ្វើការដាំកូនឈើឡើងវិញនៅក្នុងតំបន់ ៣ ជាបន្តបន្ទាប់ដូចខេត្តផ្សេងៗនៅជាប់តំបន់បឹងទន្លេសាបផងដែរ។
លោក លី សំរិទ្ធិ បានបញ្ជាក់ថា ប្រជាពលរដ្ឋបានប្រគល់ដីជូនរដ្ឋវិញជាបន្តបន្ទាប់ដែលរហូតមកដល់បច្ចុប្បន្ននេះបានប្រមាណ ២ ៦០០ ហិកតាហើយ។ ដីនេះនឹងត្រូវដាំដើមឈើឡើងវិញ ព្រោះជាទីដីដែលអស់ព្រៃដោយសារកន្លងមកពលរដ្ឋបានទន្ទ្រានយក។
លោកបានបញ្ជាក់ទៀតថា៖ «ផ្ទៃដីដែលយើងយកបានវិញហ្នឹង គឺត្រូវដាំកូនឈើឡើងវិញឱ្យបានពេញ ព្រោះផ្ទៃដីនេះជាដីដែលអស់ព្រៃ ដែលពលរដ្ឋកាប់រានកន្លងមកហើយធ្វើការបង្កបង្កើនផលអ៊ីចឹងទៅ។ ឥឡូវគាត់មកប្រគល់ឱ្យអាជ្ញាធរវិញហើយ ចំនួន ២ ៦០០ ហិកតា ហើយនៅមានបន្តបន្ទាប់ទៀត វាមិនទាន់អស់ទេនៅមានតិចៗបន្តបន្ទាប់មក កើនឡើង ៤-៥ ហិកតា ៤-១០ ហិកតាក្នុង ១ ថ្ងៃ»៕
