កំពង់ស្ពឺៈ ក្រសួងធនធានទឹក និងឧតុនិយមកំពុងសិក្សាទីតាំងស្ថិតនៅចន្លោះរវាងឃុំតាសាល និងឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ ដើម្បីសាងសង់អាងស្តុកទឹកថ្មី ដែលអាចផ្ទុកទឹកបានយ៉ាងហោចជាង ១០០ លានម៉ែត្រគុប និងផ្តល់ប្រយោជន៍ជាច្រើនសម្រាប់ស្រោចស្រពដីកសិកម្ម បំពេញតម្រូវការផ្នែកឧស្សាហកម្ម និងការពារការកាប់បំផ្លាញព្រៃឈើ។
លោក វ៉ី សំណាង អភិបាលខេត្តកំពង់ស្ពឺថ្លែងប្រាប់ភ្នំពេញ-ប៉ុស្តិ៍នៅថ្ងៃទី ២៦ ខែមករា ថា រដ្ឋបាលខេត្តកំពង់ស្ពឺបានបង្ហាញទីតាំងភូមិសាស្ត្រជូនក្រសួងធនធានទឹក និងម្ចាស់គម្រោង ដើម្បីសាងសង់អាងស្តុកទឹកថ្មី ស្ថិតនៅចន្លោះឃុំរស្មីសាមគ្គី និងឃុំតាសាល ស្រុកឱរ៉ាល់។ លោកអភិបាលខេត្ត បានអំពាវនាវឱ្យពន្លឿនក្នុងការសិក្សាទីតាំងនេះដើម្បីឆាប់បានអនុវត្តគម្រោងសាងសង់ ដើម្បីបម្រើផលប្រយោជន៍ទូទៅ។
លោកថ្លែងថា៖ «ប្រទេសយើងមានសុខសន្តិភាពហើយ អត់មានរវល់តែទៅរត់លូនឯណាទៀតទេ អ៊ីចឹងឱ្យគាត់ពន្លឿនការងារសិក្សាគម្រោងហ្នឹង។ ការដាក់នៅទីតាំងហ្នឹង គឺអាជ្ញាធរគាំទ្រ ១០០ ភាគរយប្រជាពលរដ្ឋអរសប្បាយជាមួយនឹងគម្រោងនេះ។ គាត់ (មន្ត្រីក្រសួង) ធ្លាប់ចុះមកមើលច្រើនដងហើយ នៅពេលគាត់ពេញចិត្តហើយ ទើបគាត់មកហៅអាជ្ញាធរយើងទៅចូលរួមពិនិត្យបន្ថែម» ។
លោកអភិបាលខេត្តប្រាប់ថា បច្ចុប្បន្នខេត្តកំពង់ស្ពឺមានអាងស្តុកទឹក ទំនប់ និងប្រឡាយសរុបនៅទូទាំងខេត្តមានចំនួន ៣៧៤ ទីតាំង។ ដោយឡែកអាងស្តុកទឹកថ្មីនេះអាចមានសមត្ថភាពស្តុកទឹកបានចំនួនប្រមាណ ១៥០ លានម៉ែត្រគុប បើសិនជាដំណើរការទៅបាននឹងផ្តល់ផលប្រយោជន៍ច្រើនជាអតិបរមា។
លោក វ៉ី សំណាង បញ្ជាក់ថា ប្រយោជន៍សំខាន់ទី ១ គឺ ការពារពីការជន់លិចដោយជំនន់ទឹកភ្លៀង ដែលកន្លងមកខេត្តកំពង់ស្ពឺក៏ដូចជាខេត្តដែលស្ថិតនៅតាមសណ្តស្ទឹង ព្រែកត្នោត ពិសេសរាជធានីភ្នំពេញតែងតែរងនូវការយាយីនៃជំនន់ទឹកភ្លៀងជាបន្តបន្ទាប់ ហើយបានធ្វើឱ្យប្រជាពលរដ្ឋ រងគ្រោះខូចខាតទ្រព្យសម្បត្តិ ហេដ្ឋារចនាសម្ព័ន្ធជាច្រើន។
ដោយសារតែទីរងទឹកភ្លៀងខេត្តកំពង់ស្ពឺមានរហូតដល់ ៣ ស្រុក គឺស្រុកឱរ៉ាល់ សំរោងទង និងភ្នំស្រួច ហេតុនេះទឹកធ្លាក់មកតែ ១កន្លែងធ្វើឱ្យហូរមិនទាន់ បើសិនយើងគ្មានទំនប់ស្ទាក់ទឹកទេនោះ ទឹកនឹងហូរលឿនធ្វើឱ្យមានបញ្ហាជន់លិច។
លោកអភិបាលខេត្តថ្លែងថា៖ «ផ្ទៃរងទឹកភ្លៀងនៅផ្នែកខាងលើ អ៊ីចឹងយើងទប់នៅខាងលើហ្នឹង ទប់នៅកន្លែងផ្ទៃរងទឹកភ្លៀងហ្នឹង យើងធ្វើទំនប់ក្បែរហ្នឹង អ៊ីចឹងនៅពេលភ្លៀងមកជន់តំបន់ហ្នឹង យើងមានអាងហ្នឹងស្តុកទុកទឹកនៅទីនោះ ហើយយើងបើកវាតាមតម្រូវការរបស់យើង អ៊ីចឹងទៅ យើងនឹងអាចបញ្ចៀសបាននូវការជន់លិចលឿនបាន» ។
លោកថា កំពង់ស្ពឺមានទឹកស្រោចស្រពផ្នែកកសិកម្មមានតិចតួច ប៉ុន្តែជាតំបន់ដែលសម្បូរខាងផ្នែកឧស្សាហកម្ម ដែលត្រូវការទឹកប្រើប្រាស់ច្រើនជាចាំបាច់។ ក្រៅពីជួយការពារជំនន់ទឹកភ្លៀងហូរធ្លាក់ទៅរាជធានីភ្នំពេញ ខេត្តកណ្តាល និងតាកែវ អាងស្តុកទឹកថ្មីនេះ ក៏នឹងអាចជួយការពារការបាត់បង់ព្រៃឈើផងដែរ ព្រោះការធ្វើអាងស្តុកទឹកនេះនឹងបិទផ្លូវចេញចូលមិនឱ្យជនប្រព្រឹត្តបទល្មើសអាចចេញចូលកាប់ឈើបានឡើយ។
លោកថ្លែងថា៖ «កន្លែងហ្នឹងបើសិនជាយើងធ្វើហើយ យើងអាចទប់ទឹកបាន ហើយព្រៃឈើសត្វព្រៃអីនៅជុំវិញហ្នឹងរឹតតែប្រសើរឡើង ព្រោះយើងធ្វើចំជ្រលងដែលធ្វើឱ្យជនខិលខូចមួយចំនួន ដែលចេះតែចូលទៅលួចកាប់ឈើនៅខាងក្នុងៗ នៅពេលដែលយើងបិទទំនប់ហ្នឹងភ្លាម គឺអ្នកដែលចូលកាប់ឈើខាងក្នុងហ្នឹង លែងមានផ្លូវចេញចូលបានទៀតហើយ» ។
លោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយមខេត្តកំពង់ស្ពឺថ្លែងនៅថ្ងៃទី ២៦ ខែមករាថា មន្ត្រីជាន់ខ្ពស់ក្រសួងធនធានទឹក និងម្ចាស់គម្រោង ទើបបានចុះទៅពិនិត្យដល់ទីតាំងកាលពីថ្ងៃទី ២៥ ខែមករា ដើម្បីសិក្សាបឋម ចំពោះទំហំ ប្រវែង និងការសាងសង់ត្រូវរៀបចំយ៉ាងណាខ្លះនោះ នៅមិនទាន់មានការសម្រេចនៅឡើយ។
លោកថ្លែងថា៖ «ម្ចាស់ជំនួយគេអត់ទាន់និយាយថា ម៉េចទេ ព្រោះគេកំពុងសិក្សាមើលដែរ មើលសក្តានុពលវា ថាតើវាមានអាទិភាពយ៉ាងម៉េច សិក្សាអំពីផលប៉ះបាល់បរិស្ថាន សិក្សាពីសង្គមថែមទៀត»។
លោក ចាន់ យុត្តថា អ្នកនាំពាក្យក្រសួងធនធានទឹក និងឧតុនិយមថ្លែងនៅថ្ងៃទី ២៦ ខែមករាថាក្រោយពីបានចុះទៅពិនិត្យមើលជាក់ស្តែងឃើញថា ទីតាំងនោះមានអំណោយផលសម្រាប់សាងសង់អាងស្តុកទឹក ដោយសារទីនោះមិនមានប៉ះពាល់ និងមានជួរភ្នំព័ទ្ធជុំវិញ។ ហេតុនេះគ្រាន់តែលើកទំនប់បន្ថែមក្នុងរង្វង់ ៥០០ ម៉ែត្រតភ្ជាប់ពីភ្នំមួយទៅភ្នំ ១ នឹងបង្កើតបានជាអាងទឹក ១។
លោកប្រាប់ថា ក្រោយពីបានចុះទៅពិនិត្យដល់កន្លែងភាគីពាក់ព័ន្ធប្រមូលបានទិន្នន័យមួយចំនួន សម្រាប់ធ្វើការពិភាក្សាគ្នាអំពីជំហានបន្ទាប់ថានឹងត្រូវធ្វើអ្វីបន្តទៀត។ លោកថ្លែងថា ចាប់ពីថ្ងៃទី ២៧ ខែមករា តទៅ ក្រសួងនិងស្ថាប័នពាក់ព័ន្ធនឹងចាប់ផ្តើមពិភាក្សាគ្នាជាមួយ ទីភ្នាក់ងារបារាំងសម្រាប់ការអភិវឌ្ឍ ដើម្បីលម្អិតការងារនេះបន្ថែមទៀត។
លោកថ្លែងថា៖ «បើយើងលើកក្នុងកម្រិតមួយឱ្យលិចលើផ្ទៃដីប្រមាណប្រហែលជា ៥,៧ ឬ ៥,៨ គីឡូម៉ែត្រការ៉េក្រិតកម្ពស់បណ្តោយលិចប្រហែលប៉ុណ្ណឹងយើងបានទឹកប្រហែលជាក្នុងរង្វង់ ១១០ លានម៉ែត្រគុប តែបើយើងលើកក្រិតឱ្យខ្ពស់បន្តិចទៀត ឱ្យផ្ទៃដីហ្នឹងលិចក្នុងរង្វង់ ១៣ គីឡូម៉ែត្រការ៉េ យើងបានទឹកប្រហែលជា ២២០ ទៅ ២៣០ លានម៉ែត្រគុប»៕