.jpg)
សមត្ថកិច្ចបង្ហាញជនសង្ស័យ និងវត្ថុតាងនេសាទខុសច្បាប់។ រូបថត FB
ស្ទឹងត្រែងៈ បុរសម្នាក់ត្រូវបានតុលាការខេត្តស្ទឹងត្រែងសម្រេចឃុំខ្លួនជាបណ្ដោះអាសន្នក្នុងពន្ធនាគារ ពាក់ព័ន្ធសំណុំរឿងនេសាទត្រីដោយប្រើឧបករណ៍នេសាទខុសច្បាប់នៅក្នុងតំបន់អភិរក្សអន្លង់ត្រីមេពូជ។ មន្ត្រីជំនាញរដ្ឋបាលជលផលខេត្តស្ទឹងត្រែងបានឱ្យដឹងកាលពីថ្ងៃទី ២៦ ខែមករា ឆ្នាំ ២០២២។
លោក ស្រី សមវិចិត្រ ប្រធានខណ្ឌរដ្ឋបាលជលផល ខេត្តស្ទឹងត្រែងបានប្រាប់ភ្នំពេញ-ប៉ុស្តិ៍ថា បុរសជាប់ចោទក្នុងបទល្មើសនេសាទត្រីខុសច្បាប់ក្នុងករណីខាងលើនេះ ឈ្មោះ ឌិត ស៊ីថូង អាយុ ៣៧ ឆ្នាំមានលំនៅភូមិដនឡូង ឃុំសេកុង ស្រុកសៀមប៉ាង ខេត្តស្ទឹងត្រែង។
លោកបានបញ្ជាក់ថា៖ «ជនសង្ស័យត្រូវបានចាប់ខ្លួនកាលពីថ្ងៃពុធសប្ដាហ៍មុន ខណៈកំពុងធ្វើសកម្មភាពនេសាទត្រីក្នុងតំបន់អភិរក្សអន្លង់ត្រីមេពូជ ដោយប្រើឧបករណ៍ឆក់នៅតាមដងទន្លេសេកុង ក្នុងភូមិសាស្ត្រ ភូមិដនឡូង ឃុំសេកុង»។
បើតាមលោក សមវិចិត្រ ក្នុងអំឡុងពេលនៃការឃាត់ខ្លួនជនសង្ស័យរូបនេះ កម្លាំងសមត្ថកិច្ចខណ្ឌរដ្ឋបាលជលផល ដែលមានការចូលរួមសហការពីប្រជាសហគមន៍នេសាទ និង អាជ្ញាធរមូលដ្ឋានឃុំសេកុងបានចាប់រឹបអូសវត្ថុតាងមួយចំនួនដែលក្នុងនោះរួមមាន ត្រីត្រសក់ (ProbarbusLabeamajor) ចំនួន ៤ ក្បាលមានទម្ងន់សរុប ១២,៣៥ គីឡូក្រាម (ងាប់) អាគុយកម្លាំង ៧០ អំពែ ចំនួន ២ គ្រឿង ដុំឆក់ [អាំងឌុចទ័រ] ១ គ្រឿង និង កាណូត ១ គ្រឿង ដែលមានម៉ាស៊ីនកម្លាំង ១៨ សេះខ្សែកាបចំនួន ១២ ខ្សែ ខ្សែភ្លើងប្រវែង ៣ ម៉ែត្រ ថ្នងដងត្រី ១ គ្រឿង និងពិលឆ្លុះ ១ គ្រឿង។
លោក សមវិចិត្រ បានថ្លែងទៀតថា៖ «ជនសង្ស័យត្រូវបានតុលាការបង្គាប់ឱ្យនាំយកទៅឃុំខ្លួនក្នុងពន្ធនាគារខេត្តស្ទឹងត្រែងជាបណ្ដោះអាសន្ន ដោយចោទប្រកាន់ពីបទនេសាទត្រីដោយប្រើឧបករណ៍ឆក់តាមមាត្រា ៩៨ នៃច្បាប់ជលផល»។
យោងតាមមាត្រា ៩៨ នៃច្បាប់ជលផល ជនសង្ស័យនឹងប្រឈមការផ្ដន្ទាទោសជាប់ពន្ធនាគារពី ៣ ឆ្នាំទៅ ៥ ឆ្នាំ ហើយវត្ថុតាងនៃបទល្មើសត្រូវរឹបអូសជាទ្រព្យសម្បត្តិរដ្ឋ។
ទន្ទឹមនឹងនេះ លោក សមវិចិត្រ បានថ្លែងឱ្យដឹងទៀតថាបទល្មើសនេសាទត្រីក្នុងតំបន់អភិរក្ស អន្លង់ត្រីមេពូជ និង អន្លង់ផ្សោត ដែលបានកើតឡើងនាពេលថ្មីៗនេះបានបង្កឱ្យមានក្តីកង្វល់ជាខ្លាំង ចំពោះការបាត់បង់នូវប្រភេទត្រីកម្រមួយចំនួន ដែលកំពុងប្រឈមជិតផុតពូជពីតំបន់ទឹកសាបនៅកម្ពុជា ដូចជាត្រីប៉ាវ៉ា (BanganaHeri) ត្រីប៉ាសេអ៊ី (MekonginaErythrospila) ត្រីគល់រាំង (Giant Fish)... និង ត្រីត្រសក់ រួមទាំងសត្វផ្សោតទន្លេមេគង្គផងដែរ។ ជាក់ស្ដែង កាលពីដើមខែមករាកន្លងទៅថ្មីៗនេះ ទាំងអ្នកភូមិ និងមន្ត្រីជំនាញខណ្ឌរដ្ឋបាលជលផលបានប្រទះឃើញសត្វផ្សោត ១ ក្បាលមានជាប់មងនៅផ្នែកកន្ទុយរបស់វា ដែលផ្សោតនោះគឺផ្សោត ១ ក្បាលចុងក្រោយក្នុងតំបន់អន្លង់ផ្សោតឃុំព្រះរំកិលនៃស្រុកបុរីអូរស្វាយសែនជ័យ។
លោកបានបញ្ជាក់ថា៖ «តាមរយៈមន្ត្រីជំនាញផ្នែកអភិរក្សសត្វផ្សោតថ្នាក់ជាតិ និងអ្នកជំនាញការសត្វផ្សោតអន្តរជាតិ ផ្សោត ១ ក្បាលដែលមានមងជាប់កន្ទុយរបស់វានោះនឹងមិនអាចមានជីវិតរស់នៅបានយូរនោះទេ ហើយគ្មានមធ្យោបាយក្នុងការជួយសង្គ្រោះវាបានដែរ»។
ជាមួយគ្នានេះ លោក សមវិចិត្រ ក៏បានអំពាវនាវសូមឱ្យមានការចូលរួមពីគ្រប់ភាគីពាក់ព័ន្ធទាំងអស់ ពិសេសប្រជាពលរដ្ឋក្នុងមូលដ្ឋាន ក្នុងកិច្ចការពារធនធានមច្ឆជាតិទឹកសាប នៅក្នុងប្រទេសកម្ពុជាដោយបញ្ឈប់នូវការប្រើប្រាស់ឧបករណ៍នេសាទខុសច្បាប់គ្រប់ប្រភេទ និង បញ្ឈប់ការនេសាទក្នុងតំបន់អភិរក្សអន្លង់ត្រីមេពូជ និងអន្លង់ផ្សោត៕
