ភ្នំពេញៈ លោក ឈឹម កាន អគ្គនាយករងនៃអគ្គនាយករដ្ឋបាលនៃក្រសួងមហាផ្ទៃប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែ មករា ឆ្នាំ ២០២២ ឱ្យដឹងថា រហូតមកដល់ពេលនេះមន្ត្រីជាន់ខ្ពស់នៃអតីតគណបក្សសង្គ្រោះជាតិចំនួន ២៩ រូប បានទទួលសិទ្ធិធ្វើនយោបាយឡើងវិញក្នុងចំណោមមនុស្ស ១១៨ នាក់ ដែលបានហាមឃាត់មិនឱ្យធ្វើនយោបាយ។ អ្នកដែលបានសិទ្ធិធ្វើនយោបាយ ឡើងវិញនោះ មានអ្នកខ្លះ បានទៅបង្កើតគណបក្សនយោបាយថ្មី និងអ្នកខ្លះទៀតបានទៅចូលរួមជីវភាពនយោបាយជាមួយគណបក្សដែលមានស្រាប់។
លោកបន្តថា ក្នុងចំណោមមន្ត្រីជាន់ខ្ពស់នៃអតីតគណបក្សសង្គ្រោះជាតិ ដែលបានសិទ្ធិធ្វើនយោបាយឡើងវិញបានបង្កើតគណបក្សចំនួន ៥។
ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាថ្ងៃទី ២៥ ខែ មករា ឆ្នាំ ២០២២ បានចេញព្រះរាជក្រឹត្យត្រាស់បង្គាប់ផ្តល់នីតិសម្បទាឡើងវិញដល់លោក ប្រាក់ យីកាន អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិដែលត្រូវបានហាមឃាត់មិនឱ្យធ្វើសកម្មភាពនយោបាយសម្រាប់រយៈពេល ៥ ឆ្នាំតាមអំណាចសាលដីកាលេខ ៣៤០ (ឆ) ចុះថ្ងៃទី ១៦ ខែ វិច្ឆិកា ឆ្នាំ ២០១៧ របស់តុលាការកំពូល។
លោក យង់ ពៅ គ្រូបង្រៀនផ្នែកវិទ្យាសាស្ត្រនយោបាយនៃរាជបណ្ឌិត្យសភាកម្ពុជាប្រាប់ ភ្នំពេញ ប៉ុស្តិ៍ថា មន្ត្រីជាន់ខ្ពស់នៃអតីតគណបក្សសង្គ្រោះជាតិជាបន្តបន្ទាប់តែងតែស្នើសុំសិទ្ធិធ្វើនយោបាយឡើងវិញ បើទោះបីការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ ខិតជិតចូលមកដល់ក៏ដោយ។
លោកថ្លែងថា៖ «ថ្វីដ្បិតតែការបោះឆ្នោតជ្រើសរើសក្រុមប្រឹក្សាឃុំ សង្កាត់កៀកមកដល់ ប៉ុន្តែមានការបោះឆ្នោតជ្រើសតាំងតំណាងរាស្ត្រនៅឆ្នាំ ២០២៣ ទៀត។ អ៊ីចឹងនេះជាពេលវេលាដែលគាត់មានសេរីភាពក្នុងការជ្រើសរើស»។
លោក ពៅ ថា ការរង់ចាំ គណបក្សសង្គ្រោះជាតិឱ្យរស់ឡើងវិញតាមការទាមទាររបស់អ្នករស់នៅក្រៅស្រុក វាមិនអាចកើតឡើងវិញបាននោះទេ។ មន្ត្រីជាន់ខ្ពស់នៃអតីតគណបក្សសង្គ្រោះជាតិចំនួន ១១៨ រូប ត្រូវបានហាមឃាត់មិនឱ្យចូលរួមសកម្មភាពនយោបាយអស់រយៈពេល ៥ ឆ្នាំ បន្ទាប់ពីតុលាការកំពូលសម្រេចចេញសាលដីការំលាយគណបក្សសង្គ្រោះជាតិកាលពីថ្ងៃទី ១៦ ខែវិច្ឆិកាឆ្នាំ ២០១៧ ពីបទប៉ុនប៉ងផ្តួលរំលំរដ្ឋាភិបាលតាមរយៈការធ្វើបដិវត្តន៍ពណ៌៕
វីដេអូ៖