លោក ស ខេង រដ្ឋមន្ត្រីក្រសួងមហាផ្ទៃ។ រូបថត ក្រសួងមហាផ្ទៃ
ភ្នំពេញៈ ក្រសួងមហាផ្ទៃ ណែនាំឱ្យរដ្ឋបាលរាជធានី-ខេត្ត រៀបចំ សន្និបាតបូកសរុបលទ្ធផលការងារ ប្រចាំឆ្នាំ ២០២១ និងលើកទិសដៅការងារឆ្នាំ ២០២២ឡើងវិញឱ្យបានមុនដំណាច់ខែមករានេះ ក្រោយពីខកខានរៀបចំក្នុងឆ្នាំ ២០២០ ដោយសារកូវីដ ១៩។
លិខិតរបស់រដ្ឋមន្ត្រីក្រសួងមហាផ្ទៃលោក ស ខេង ជម្រាបជូនអភិបាលរាជធានី-ខេត្ត ចុះថ្ងៃទី ២៦ មករា បញ្ជាក់ថា នាពេលកន្លងមកដោយសារការផ្ទុះរីករាលដាលនៃជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ក្រសួងមហាផ្ទៃបានសម្រេចផ្អាកជាបណ្ដោះអាសន្ននូវការរៀបចំសន្និបាតត្រួតពិនិត្យលទ្ធផលការងារប្រចាំឆ្នាំ ២០២០ និងលើកទិសដៅការងារឆ្នាំ ២០២១។
លិខិតបន្ថែមថា ប៉ុន្តែបច្ចុប្បន្នកម្ពុជាអាចគ្រប់គ្រង និងទប់ស្កាត់ការឆ្លងរាលដាលនៃជំងឺកូវីដ ១៩ ប្រកបដោយជោគជ័យព្រមទាំងបានបិទបញ្ចប់ព្រឹត្តិការណ៍ សហគមន៍ ២០ កុម្ភៈ កាលពីថ្ងៃទី ២០ ខែធ្នូ ឆ្នាំ ២០២១ ដែលជាបរិយាកាសដ៏ល្អប្រសើរក្នុងកិច្ចដំណើរការសកម្មភាពសេដ្ឋកិច្ច-សង្គមតាមគន្លងប្រក្រតីភាពថ្មីក្នុងក្របខ័ណ្ឌទូទាំងប្រទេស។ ឈរលើមូលដ្ឋាននេះ ក្រសួងមហាផ្ទៃស្នើឱ្យរដ្ឋបាលរាជធានី-ខេត្ត ដំណើរការរៀបចំសន្និបាតបូកសរុបលទ្ធផល ការងារឆ្នាំ ២០២១ និងលើកទិសដៅការងារឆ្នាំ ២០២២ របស់ខ្លួនឡើងវិញ ក្រោយការរៀបចំសន្និបាតត្រួតពិនិត្យលទ្ធផលការងារឆ្នាំ ២០២១ របស់ក្រសួងមហាផ្ទៃ។
លិខិតបញ្ជាក់ថា៖ «រដ្ឋបាលរាជធានី-ខេត្តត្រូវរៀបចំរបាយការណ៍បូកសរុបលទ្ធផលការងារប្រចាំឆ្នាំ ២០២១ កម្មវិធីលម្អិត និងឯកសារពាក់ព័ន្ធ រួចផ្ញើជូនមកនាយកដ្ឋានកិច្ចការរដ្ឋបាលរាជធានី-ខេត្តនៃអគ្គនាយកដ្ឋានរដ្ឋបាល ក្រសួង មហាផ្ទៃ តាមរយៈ Telegram លេខ ០១២ ៥០៦ ៥២៩ ឱ្យបានមុនដំណាច់ខែមករា ឆ្នាំ ២០២២ ជាកំណត់»។
អភិបាលខេត្តកែប លោក សោម ពិសិដ្ឋ ប្រាប់ភ្នំពេញប៉ុស្តិ៍ថា សម្រាប់ខេត្តកែបបានរៀបចំរបាយការណ៍ប្រចាំឆ្នាំ និងបានឆ្លងតាមនីតិវិធីទាំងគណៈអភិបាល និងក្រុមប្រឹក្សាខេត្តរួចអស់ហើយ។ ខាងខេត្តរង់ចាំតែសុំគោលការណ៍ពីប្រធានក្រុមការងាររាជរដ្ឋាភិបាលចុះជួយមូលដ្ឋានខេត្ត និងរាយការណ៍ជូនក្រសួងមហាផ្ទៃ ក្រោយក្រសួងធ្វើសន្និបាតបូកសរុបលទ្ធផលការងារ ខេត្តនៅពេលខាងមុខនេះ។
លោកឱ្យដឹងថា របាយការណ៍ដែលបានបូកសរុបលទ្ធផលការងារ រួមមាន នយោបាយ សេដ្ឋកិច្ច សង្គម ការងារសណ្តាប់ធ្នាប់ បរិស្ថាន អនាម័យ និងទិសដៅអភិវឌ្ឍន៍ រត់តាមត្រីវិស័យ ផែនការអភិវឌ្ឍន៍ប្រចាំឆ្នាំ និងកម្មវិធីវិនិយោគ ៣ ឆ្នាំរំកិលជាដើម។ លោកបានដាក់ទិសដៅនៅឆ្នាំ ២០២២ ផ្តោតសំខាន់ជាចម្បងត្រូវរក្សាការពារសន្តិភាព ស្ថិរភាពនយោបាយ សម្រាប់ការបោះឆ្នោត និងសណ្តាប់ធ្នាប់សង្គមទូទៅ និងជំរុញកំណើនការវិនិយោគ។
លោកថ្លែងថា៖ «ទី ១ បើសិនគ្មាន សន្តិសុខ សណ្តាប់ធ្នាប់ សន្តិភាព យើងធ្វើអីមិនបានទេ។ នេះផ្តោតសំខាន់ជាអាទិភាព។ ទី ២ ជំរុញសេដ្ឋកិច្ចមូលដ្ឋានក្នុងសហគមន៍ និងមុខរបរ និងជំរុញកំណើនប្រជាជនក្នុងមូលដ្ឋាន។ បានន័យ ថាជំរុញកំណើនវិស័យទេសចរណ៍ ដោយរៀបចំឱ្យបានល្អប្រសើរ។ បើកទេសចរណ៍ មនុស្សមកលេងចំណូលចូលដល់ប្រជាជនហើយមានការងារធ្វើ ហើយទី ៣ គឺជំរុញកំណើនការវិនិយោគ។ យើងខិតខំទាក់ទាញ កៀរគរវិនិយោគទាំងវិស័យឯកជន និងរដ្ឋ»។
លិខិតដដែលឱ្យដឹងថា ទិសដៅការងារដែលក្រសួងមហាផ្ទៃបានកំណត់ក្នុងសន្និបាតប្រចាំឆ្នាំ កម្មវិធីនយោបាយរបស់រាជរដ្ឋាភិបាលដែលបានដាក់ចេញ ក្រសួង ណែនាំដល់រដ្ឋបាលរាជធានី-ខេត្តត្រូវយកចិត្តទុកដាក់អនុវត្តនូវកិច្ចការចាំបាច់មួយចំនួន។
កិច្ចការទាំងនោះ រាជធានី-ខេត្តត្រូវធ្វើការពិភាក្សា និងបូកសរុបលទ្ធផលការងារប្រឡងប្រណាំង អនុវត្តគោលនយោបាយ «ភូមិ ឃុំ សង្កាត់មានសុវត្ថិភាព» និងបូកសរុបវាយតម្លៃលទ្ធផលការងារក្រុមប្រឹក្សាឃុំ សង្កាត់អាណត្តិទី ៤ រួមទាំងយន្តការគាំទ្រដល់ក្រុមប្រឹក្សាឃុំ-សង្កាត់ ទៅក្នុងរបៀបវារៈនៃពិធីសន្និបាតរបស់ខ្លួន។
អភិបាលខេត្តកំពង់ស្ពឺលោក វ៉ី សំណាង ថ្លែងថា សម្រាប់ឆ្នាំ ២០២១ ខេត្តធ្វើបាន ៦ គម្រោងធំដែលភាគច្រើនទៅលើវិស័យហេដ្ឋារចនាសម្ព័ន្ធ និងការកែលម្អផ្លូវ។ គម្រោងទាំងនោះ រួមមាន បំពាក់បង្គោលភ្លើង អ៊ុតផ្លូវកៅស៊ូ រៀបចំប្រព័ន្ធលូ រៀបចំខឿនសងខាងផ្លូវ លើកកម្ពស់ឱ្យប្រសើរឡើងនូវកំណាត់ផ្លូវមួយចំនួន គម្រោងស្ថាបនារង្វង់មូលផ្លែត្នោត និងការសាងសង់អគារការិយាល័យច្រកចេញចូលតែមួយជាដើម។
ឯគម្រោងក្រុង-ស្រុកសម្រេចបានមាន ២០ គម្រោង គឺការសាងសង់ផ្លូវបេតុងផ្លូវក្រាលក្រួសធម្មជាតិ សាងសង់ស្ពានបេតុង និង ជីកស្រះទឹក។ ចំណែកគម្រោងឃុំ-សង្កាត់មាន ៩០ គម្រោង ក្នុងនោះអនុវត្តបាន ១០០ ភាគរយមាន ៧៩ គម្រោង ដែលភាគច្រើនលើវិស័យហេដ្ឋារចនាសម្ព័ន្ធ។
សម្រាប់ទិសដៅនៅឆ្នាំ ២០២២ លោកអភិបាលខេត្ត បញ្ជាក់ថា៖ «យើងសុំបំបែកភូមិ ដោយបង្ខិតសេវាឱ្យកៀកកិតជាមួយប្រជាជន។ កាលពីមុនមានភូមិ ១ ៣៧៧ ភូមិ ឥឡូវយើងសុំបំបែក ១៧ ភូមិទៀត ដោយសារគាត់ចេះតែប្រមូលផ្តុំនៅឆ្ងាយៗ ហើយយើងនឹងកែប្រែព្រំប្រទល់ភូមិដែរ»៕
