.jpg)
បណ្ណកម្មសិទ្ធដីត្រូវមន្ត្រីនៅខេត្តកំពង់ឆ្នាំងរៀបចំចែកជូនពលរដ្ឋ។ រូប សហការី
ភ្នំពេញៈ គិតត្រឹមឆ្នាំ ២០២១ ក្រសួងរៀបចំដែនដី នគរូបនីយកម្ម និងសំណង់បានចេញបណ្ណកម្មសិទ្ធិដីជាង ៦ លានបណ្ណ ហើយក្រសួងគ្រោងនឹងចុះបញ្ជីសម្រេចឱ្យបានជាង ៥០ ម៉ឺនក្បាលដីដែលនៅសេសសល់ក្នុងឆ្នាំ ២០២២ ដើម្បីបញ្ចប់ការចុះបញ្ជីចំនួនក្បាលដីប៉ាន់ស្មានដំបូង ៧ លានក្បាលដី។
របាយការណ៍របស់ក្រសួងរៀបចំដែនដី ឆ្នាំ ២០២១ បានឱ្យដឹងថា ក្នុង ១ ឆ្នាំ ២០២១ ក្រសួងបានចេញបណ្ណកម្មសិទ្ធិដីចំនួន ៣៣៨ ៣៦៣ បណ្ណ និងចែកដល់ដៃប្រជាពលរដ្ឋចំនួន ២៥៥ ៥៤៧ បណ្ណ។ សរុបលទ្ធផលពីពេលចាប់ផ្តើមអនុវត្តដល់ដំណាច់ឆ្នាំ ២០២១ ក្រសួងបានចេញបណ្ណកម្មសិទ្ធិដី ចំនួន ៦ ៤១៥ ៣១១ បណ្ណ ស្មើនឹង ៩១,៦% នៃចំនួនក្បាលដីប៉ាន់ស្មានដំបូង ៧ លានក្បាលដី។ ក្រសួងបញ្ជាក់ថា លទ្ធផលដែលសម្រេចបាននេះគឺលើសផែនការ ១,៦% ធៀបនឹងសូចនាករ ដែលបានកំណត់ក្នុងផែនការយុទ្ធសាស្ត្ររបស់ក្រសួង ដែលគ្រោងឱ្យបាន ៩០% ត្រឹមឆ្នាំ ២០២១។
តាមលទ្ធផលដែលសម្រេចបាននេះ ក្រសួងរៀបចំដែនដីបន្តជំរុញ និងគាំទ្រមនី្ទររៀបចំដែនដី នគរូបនីយកម្ម សុរិយោដី និងសំណង់ (ដ.ន.ស.ស) រាជធានី ខេត្ត ដើម្បីធ្វើការចុះបញ្ជីដីធ្លីដំបូងសម្រេចឱ្យបានជាង ៥០ ម៉ឺនក្បាលដី ដែលនៅសេសសល់តាមរយៈការជំរុញការប្រកាសកំណត់តំបន់វិនិច្ឆ័យ ការបិទផ្សាយជាសាធារណៈ ការចេញបណ្ណ និងការចែកបណ្ណដល់ខ្នងផ្ទះប្រជាពលរដ្ឋ ដើម្បីបញ្ចប់ការចុះបញ្ជីដីធ្លីចំនួន ៧ លានក្បាលដីនៅក្នុងឆ្នាំ ២០២២ នេះ។
ដោយឡែកវិវាទដីធ្លីវិញក្រសួងរៀបចំដែនដី បានទទួលពាក្យបណ្តឹងចំនួន ១៦៥ ករណី (ទទួលពីគណៈកម្មការរដ្ឋបាលចំនួន ១៥១ ករណី) ដោះស្រាយបញ្ចប់នីតិវិធីចំនួន ១៣៩ ករណី (បញ្ចប់ជាស្ថាពរចំនួន ៥៧ ករណី មាន ២៤៧ គ្រួសារ ស្មើនឹងផ្ទៃដីទំហំ ៦០,០៧ ហិកតា ច្រានចោលពាក្យបណ្តឹង បន្ទាប់ពីស៊ើបអង្កេតឃើញថា ខុស សមត្ថកិច្ចចំនួន ៥៤ ករណី និងភាគីស្នើសុំដកពាក្យបណ្តឹងចំនួន ២៨ ករណី)។
ក្រសួងរៀបចំដែនដីសរសេរថា៖ «លទ្ធផលក្រុមដោះស្រាយវិវាទដីធ្លីចល័តក្រុង ស្រុក ខណ្ឌ អនុវត្តបានចំនួន ១៣៥ ករណី (បញ្ចប់ជាស្ថាពរ ចំនួន ៤៧ ករណី ច្រានចោលពាក្យបណ្ដឹងបន្ទាប់ពីស៊ើបអង្កេតឃើញថាខុសសមត្ថកិច្ចចំនួន ៥១ ករណី ភាគីស្នើសុំដកពាក្យបណ្តឹងចំនួន ១៩ ករណី និងបញ្ជូនទៅគណៈកម្មការសុរិយោដី ថ្នាក់-ខេត្តចំនួន ១៨ ករណី)»។
បើតាមក្រសួងរៀបចំដែនដីគិតពីចាប់ផ្តើមអនុវត្តឆ្នាំ ២០០៣ ដល់ដំណាច់ឆ្នាំ ២០២១ គណៈកម្មការសុរិយោដីក្រុង ស្រុក ខណ្ឌ បានទទួលពាក្យបណ្តឹងចំនួន ៩ ១២៦ ករណី ដោះស្រាយបញ្ហាប់នីតិវិធីចំនួន ៨ ៣៤៨ ករណី (ក្នុងនោះ បញ្ចប់ជាស្ថាពរចំនួន ៤ ៣៤៦ ករណី ច្រានចោលពាក្យបណ្ដឹង បន្ទាប់ពីស៊ើបអង្កេតឃើញថា ខុសសមត្ថកិច្ចចំនួន ៣ ០២៣ ករណី ភាគីស្នើសុំដកពាក្យបណ្តឹងចំនួន ៩៧៩ ករណី និងកំពុងដោះស្រាយចំនួន ៧៧៨ ករណី។
ក្រសួងសរសេរថា៖ «លទ្ធផលក្រុមដោះស្រាយវិវាទដីធ្លីចល័តក្រុង ស្រុក ខណ្ឌ អនុវត្តបានចំនួន ៤ ០៨៨ ករណី (ក្នុងនោះបញ្ចប់ ជាស្ថាពរចំនួន ២ ០៣២ ករណី ច្រានចោលពាក្យបណ្តឹង បន្ទាប់ពីស៊ើបអង្កេតចំនួន ១ ១៨៨ ករណី ភាគីស្នើសុំដកពាក្យចំនួន ៥០៥ ករណី និងបញ្ជូនទៅគណៈកម្មការសុរិយោដីថ្នាក់-ខេត្តចំនួន ៣៦៣ ករណី)»។
លោក ស៊ឹង សែនករុណា អ្នកនាំពាក្យសមាគមអាដហុកថ្លែងនៅថ្ងៃទី ២៧ ខែមករាថា មូលហេតុនៃវិវាទដីធ្លីកន្លងមកកើតឡើងដោយសារតែមានតំបន់មួយចំនួន មានភាពយឺតយ៉ាវក្នុងការបញ្ជាក់នូវបណ្ណកម្មសិទិ្ធទាំងឯកជន ឬពលរដ្ឋជាដើម។ លោកថា ជារឿងល្អប្រសើរ បើសិនជាខាងក្រសួងរៀបចំដែនដី ពន្លឿនឱ្យចេញបណ្ណបានឆាប់បញ្ចប់ ប៉ុន្តែទន្ទឹមនឹងការចេញបណ្ណនេះក្រសួងដែនដីគួរពិនិត្យមើលវិវាទដីធ្លី ដែលមានទំនាស់រ៉ាំរ៉ៃ ដែលមិនទាន់ដោះស្រាយ ដោយពិនិត្យមើល និងរកដំណោះស្រាយជូនប្រជាពលរដ្ឋ ហើយផ្តល់បណ្ណកម្មសិទ្ធិជូនពួកគាត់ដើម្បីកាត់បន្ថយការប៉ះពាល់ ឬការចំណាយដែលធ្វើឱ្យជីវភាពពលរដ្ឋកាន់តែធ្លាក់ដុនដាបដោយសារតែមានបញ្ហាវិវាទដីធ្លី។
លោកថ្លែងថា៖ «រឿងបណ្ណកម្មសិទ្ធិនេះតាមខ្ញុំទទួលព័ត៌មានមួយចំនួន គឺមានការបញ្ជាក់ពីប្រមុខរាជរដ្ឋាភិបាលលោកថ្លែងអំពីការបញ្ជាក់ផ្តល់បណ្ណកម្មសិទ្ធិជូនដល់ពលរដ្ឋដែលរស់នៅ ឬក៏កាន់កាប់ដីសារពើភណ្ឌរបស់រដ្ឋអីទាំងអស់ហ្នឹង ក៏មានឱ្យធ្វើការកាត់ចេញដែរ ប៉ុន្តែមកទល់ពេលនេះ ពលរដ្ឋទាំងនោះថា មិនទាន់ផ្តល់ជូនពួកគាត់ឱ្យបានគ្រប់គ្នានៅឡើយទេ»។
លោកថា ជុំវិញបញ្ហានេះក្រសួងគួរតែពិនិត្យមើលឡើងវិញទាំងអស់ពោលគឺទាំងបណ្ណដែលត្រូវផ្តល់កម្មសិទ្ធិជាង ៥០ ម៉ឺនដែលនៅសេសសល់ រួមទាំងបញ្ហាវិវាទនានា និងការរាំងស្ទះនៃការសុំបណ្ណកម្មសិទ្ធិពីប្រជាពលរដ្ឋដែលគាត់មានជីវភាពក្រីក្រ គឺត្រូវមានការត្រួតពិនិត្យ និងផ្តល់ជូនគាត់ឱ្យបានឆាប់ សម្រាប់ឱ្យពួកគាត់យកទៅប្រើប្រាស់ក្នុងជីវភាពរស់នៅរបស់ពួកគាត់។
ភ្នំពេញប៉ុស្តិ៍ មិនអាចទំនាក់ទំនងសុំការបំភ្លឺបន្ថែមពីលោក សេង ឡូត អ្នកនាំពាក្យក្រសួងដែនដីនគរូបនីយកម្ម និងសំណង់បានទេនៅថ្ងៃទី ២៧ ខែមករា។ ប៉ុន្តែយ៉ាងណាក៏ដោយ ប្រធានគណៈកម្មការដោះស្រាយវិវាទដីធ្លីខេត្តកំពង់ស្ពឺថ្លែងនៅថ្ងៃទី ២៦ ខែមករាថា អាជ្ញាធរខេត្តតែងជំរុញឱ្យមន្ទីរជំនាញយកចិត្តទុកដាក់ដោះស្រាយវិវាទដីធ្លី និងពិនិត្យមើលឱ្យបានត្រឹមត្រូវចំពោះអ្នកដែលបានរស់នៅលើដីរដ្ឋក្នុងរយៈពេលយូរស្របតាមការណែនាំរបស់លោកនាយករដ្ឋមន្ត្រី។ ដោយឡែកសម្រាប់ទីតាំងដែលមានភាពអនាធិបតេយ្យខុសនីតិវិធី គឺត្រូវតែធ្វើការដកហូតទុកជាសម្បត្តិរដ្ឋវិញ៕
