.jpg)
គ្រោះថ្នាក់ចរាចរណ៍របួស និងស្លាប់ក្មេង នៅខណ្ឌកំបូល កាលពីថ្ងៃទី ២៦ មករា។ រូបថត ហ្វេសប៊ុក
ភ្នំពេញៈ នគរបាលចរាចរណ៍កំពុងរៀបចំសំណុំរឿងទៅសាលាដំបូងរាជធានីភ្នំពេញករណី រថយន្តឡិចស៊ីសបុកម៉ូតូបណ្តាលឱ្យក្មេងប្រុសអាយុ ៧ ខែម្នាក់ស្លាប់ និងឪពុកម្តាយរបួសធ្ងន់ដែលកើតហេតុកាលពីយប់ថ្ងៃទី ២៦ មករា នៅខណ្ឌកំបូល ខណៈជនបង្កជាម្ចាស់រថយន្តកំពុងត្រូវសមត្ថកិច្ចសាកសួរនៅស្នងការដ្ឋាននគរបាល រាជធានីភ្នំពេញនៅថ្ងៃទី ២៧ មករា។
លោក ឆេង សារិម នាយផ្នែកដោះស្រាយវិវាទគ្រោះថ្នាក់ចរាចរណ៍នៃស្នងការដ្ឋាននគរបាលរាជធានីភ្នំពេញឱ្យដឹងនៅថ្ងៃទី ២៧ មករាថា ម្ចាស់រថយន្តបង្កឈ្មោះ សួន ចាន់ថន ភេទប្រុស អាយុ ២៩ ឆ្នាំជាមន្ត្រីពន្ធនាគារមានលំនៅភូមិកំរៀង សង្កាត់ពងទឹក ខណ្ឌដង្កោ រាជធានីភ្នំពេញ ត្រូវបានសមត្ថកិច្ចឃាត់ខ្លួនភ្លាមៗបន្ទាប់កើតហេតុកាលពីយប់ថ្ងៃទី ២៦ មករា។
ចំណែកក្មេងរងគ្រោះស្លាប់ឈ្មោះ ថន សុវណ្ណមង្គល ភេទប្រុស ឣាយុ ៧ ខែ ដែលម្តាយឈ្មោះ ញាញ់ សុធឿន ឣាយុ ៣៥ ឆ្នាំ (មេផ្ទះ) និងឪពុកឈ្មោះ ចក់ ធារ៉ា អាយុ ៣៥ ឆ្នាំ មានរបរជាជាងដែក។ ទាំង ២ នាក់ប្តីប្រពន្ធរងរបួសធ្ងន់។
លោក សារិម ថ្លែងថា៖ «ករណីនេះខាងសមត្ថកិច្ចជំនាញចរាចរណ៍កំពុងសាកសួរម្ចាស់រថយន្តឡិចស៊ីសហើយក៏កំពុងរៀបចំកសាងសំណុំរឿងទៅតុលាការដែរ។ គាត់ក្រៅពីដោះស្រាយសំណងរដ្ឋប្បវេណីហើយក៏ត្រូវជាប់បណ្តឹងអាជ្ញាផងទៀត»។
បើតាមលោក សារិមថា កាលពីវេលាម៉ោងប្រហែល ៨ យប់ថ្ងៃទី ២៦ មករា ឆ្នាំ ២០២២ មានករណីគ្រោះថ្នាក់ចរាចរណ៍មួយកើតឡើងបង្កដោយបុរសម្នាក់ឈ្មោះ សួន ចាន់ថន បើករថយន្ត LEXUS RX300 ពណ៌ស ពាក់ស្លាកលេខភ្នំពេញ 2AA-4566 ក្នុងទិសដៅពីកើតទៅទិសលិចក្នុងទិសដៅស្របគ្នា។ លុះដល់ចំណុចកើតហេតុតាមបណ្តោយផ្លូវជាតិលេខ ៤ ក្នុងសង្កាត់កំបូល ខណ្ឌកំបូល រាជធានីភ្នំពេញបានបុកម៉ូតូ ១ គ្រឿង ម៉ាក HONDA C125 ពណ៌ខ្មៅ ពាក់ស្លាកលេខ កំពង់ចាម 1T-1918 ដែលមានមនុស្សជិះឌុបគ្នា ៣ នាក់ (ប្តីប្រពន្ធ និងកូន)។ បន្ទាប់មករថយន្តបង្កបានបន្តទៅបុកកង់បី ២ គ្រឿងទៀត ប៉ុន្តែម្ចាស់ម៉ូតូកង់បីគ្រាន់តែរងរបួសស្រាលទេ។
លោក ឆេង សារិម បន្តទៀតថា ក្រោយកើតហេតុភ្លាមៗនគរបាលមូលដ្ឋាន ខណ្ឌកំបូលរួមនឹងមន្ត្រីចរាចរណ៍រាជធានីភ្នំពេញបានចុះដល់កន្លែងកើតហេតុដើម្បីចាត់ចែងដឹកជនរងគ្រោះទៅមន្ទីរពេទ្យ។
រីឯអ្នកបើករថយន្តត្រូវបានមន្ត្រីជំនាញចរាចរណ៍ធ្វើការត្រួតពិនិត្យឃើញថាមានជាតិឣាល់កុលក្នុងខ្លួនកម្រិត ០,៩៨mg/L (បើកបរក្នុងសភាពស្រវឹង)។
ចំណែកជនរងគ្រោះភាគីម៉ូតូដែលមានកូនតូចឈ្មោះ ថន សុវណ្ណមង្គល ភេទប្រុស ឣាយុ ៧ ខែបានស្លាប់ពេលបញ្ជូនដល់មន្ទីរពេទ្យគន្ធបុប្ជា។
រីឯម្តាយឪពុកក្មេងទាំង ២ នាក់របួសធ្ងន់ ហើយត្រូវបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈ៕
