.jpg)
សមត្ថកិច្ចតាមដានអ្នកជំងឺកូវីដ ១៩ ព្យាបាលនៅផ្ទះ ក្នុងស្រុកគាស់ក្រឡ ខេត្តបាត់ដំបង។ រូបថត FB
ភ្នំពេញៈ មន្ត្រីជាន់ខ្ពស់នៃក្រសួងសុខាភិបាលបានឱ្យដឹងថា អ្នកជំងឺកូវីដ ១៩ ដែលកំពុងសម្រាកព្យាបាលនៅតាមផ្ទះ សុំកុំព្យាយាមនៅបន្តព្យាបាលនៅផ្ទះបើស្ថានភាពធ្ងន់ធ្ងរ ដោយត្រូវតែបញ្ជូនអ្នកជំងឺទៅសម្រាកព្យាបាលនៅមន្ទីរពេទ្យដើម្បីធ្វើការជួយសង្គ្រោះបានទាន់ពេលវេលា។
រដ្ឋលេខាធិការនៃក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស លោកស្រី ឱ វណ្ណឌីន បានថ្លែងដូចនេះតាមរយៈការផ្តល់បទសម្ភាសមួយកាលពីថ្ងៃទី ២៦ ខែមករា ឆ្នាំ ២០២២។
លោកស្រីបានលើកឡើងថា ប្រមុខរាជរដ្ឋាភិបាលកម្ពុជាបានសម្រេចឱ្យអ្នកជំងឺកូវីដ ១៩ គ្រប់ប្រភេទ រួមទាំងអ្នកជំងឺដែលឆ្លងវីរុសកូវីដបំប្លែងថ្មីប្រភេទអូមីក្រុងអាចសម្រាកព្យាបាលនៅតាមផ្ទះបាន ដោយត្រូវយកចិត្តទុកដាក់អនុវត្តឱ្យបានត្រឹមត្រូវតាមគោលការណ៍ប្រតិបត្តិ (SOP) ដែលណែនាំដោយគណៈកម្មការអន្តរក្រសួងប្រយុទ្ធនឹងជំងឺកូវីដ ១៩ ក៏ដូចជាក្រសួងសុខាភិបាល។
លោកស្រី ឱ វណ្ណឌីន ថ្លែងថា៖ «សូមបងប្អូនយើងដែលសម្រាកព្យាបាលនៅផ្ទះនេះ មេត្តាបន្តរក្សាការនៅដាច់ដោយឡែកពីក្រុមគ្រួសារឱ្យបានហ្មត់ចត់ជាទីបំផុតដើម្បីចៀសវាងនូវការចម្លងបន្តទៀតក្នុងក្រុមគ្រួសាររបស់ខ្លួន និងត្រូវរក្សាឱ្យបាននូវការថែទាំសុខភាពរបស់យើងឱ្យបានល្អ និងកុំឱ្យមានការចម្លងបន្តគ្នាពីបុគ្គលទៅក្រុមគ្រួសារ និងពីបុគ្គលទៅក្នុងសហគមន៍»។
ជាមួយគ្នានេះដែរ លោកស្រីក៏បានលើកឡើងពីឱសថសម្រាប់ព្យាបាលជំងឺកូវីដ ១៩ ម៉ូលនូពីរ៉ាវា (Molnupiravir) ដោយត្រូវធ្វើការពិគ្រោះ ប្រឹក្សាយោបល់ និងវេជ្ជបញ្ជា និងការណែនាំពីក្រុមគ្រូពេទ្យផងដែរ។
លោកស្រី ឱ វណ្ណឌីន បានបញ្ជាក់ថា៖ «ឱសថនេះប្រើប្រាស់សម្រាប់បុគ្គលដែលមានបញ្ហារោគសញ្ញាកម្រិតស្រាលទៅកម្រិតមធ្យម ដោយឡែកអ្នកដែលមានស្ថានភាពធ្ងន់ សុំកុំទុកអ្នកជំងឺដើម្បីព្យាបាលនៅផ្ទះឱ្យសោះ ដោយចាំបាច់ត្រូវតែបញ្ជូនគាត់ទៅព្យាបាលនៅមន្ទីរពេទ្យដើម្បីទទួលបានការពិនិត្យ ព្យាបាល និងជួយសង្គ្រោះទាន់ពេលវេលា»។
គួររំឭកផងដែរថា ក្រសួងសុខាភិបាលកម្ពុជាបានអនុញ្ញាតឱ្យប្រើប្រាស់ក្នុងលក្ខខណ្ឌបន្ទាន់នូវឱសថប្រភេទ Molnupiravir របស់អាមេរិក ដែលជាប្រភេទឱសថគ្រាប់ប្រើតាមមាត់ប្រឆាំងនឹងមេរោគកូវីដ ១៩ (Antiviral) ដែលមានសុវត្ថិភាព និងប្រសិទ្ធភាពខ្ពស់ សម្រាប់ព្យាបាលជំងឺកូវីដ ១៩។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលនៅថ្ងៃទី ៣ ខែវិច្ឆិកា ឆ្នាំ ២០២១ បានចេញវិញ្ញាបនបត្រអនុញ្ញាតប្រើប្រាស់ក្នុងលក្ខខណ្ឌបន្ទាន់ឱ្យមានការប្រើប្រាស់ឱសថ Molnupiravir របស់អាមេរិក ដោយលោកបានលើកឡើងថាលក្ខខណ្ឌនៃការប្រើប្រាស់ឱសថនេះ គឺប្រើតែក្នុងអំឡុងពេលគ្រោះអាសន្នសុខភាពសាធារណៈនៃជំងឺកូវីដ ១៩ ដែលកំពុងកើតមាន និងជាជម្រើសនៃការព្យាបាលដែលស្ថិតក្រោមការស្រាវជ្រាវ និងវាយតម្លៃ។
លោកស្រី ឱ វណ្ណឌីន ក៏បានបញ្ជាក់ផងដែរថា សម្រាប់ស្រី្តមានផ្ទៃពោះ និងស្ត្រីដែលកំពុងបំបៅកូនដោយទឹកដោះត្រូវចៀសវាងប្រើប្រាស់ឱសថប្រភេទ Molnupiravir នេះ ដោយសារមិនទាន់មានការសិក្សាច្បាស់ណាមួយបញ្ជាក់នៅឡើយថា ឱសថនេះត្រូវបានអនុញ្ញាតឱ្យស្ត្រីមានផ្ទៃពោះ និងបំបៅកូនដោយទឹកដោះប្រើនោះទេ។
លោកនាយករដ្ឋមន្ត្រី ហ៊ុន សែន កាលពីយប់ថ្ងៃទី ២១ ខែមករា បានសម្រេចធ្វើការកែប្រែលក្ខខណ្ឌនៃការព្យាបាលអ្នកជំងឺកូវីដ ១៩បំប្លែងថ្មីប្រភេទអូមីក្រុង ដោយលោកចេញបទបញ្ជាអនុញ្ញាតឱ្យអ្នកជំងឺអាចសម្រាកព្យាបាលនៅគេហដ្ឋានបានទាំងជនជាតិខ្មែរ និងបរទេស ដោយសារជំងឺនេះមានការចម្លងលឿន តែមិនមែនជាជំងឺដែលគ្រោះថ្នាក់នោះឡើយ ប៉ុន្តែក្នុងករណីដែលមិនមានកន្លែង ឬផ្ទះមិនអាចសម្រាកព្យាបាលបាន អ្នកជំងឺអាចមកសម្រាកព្យាបាលនៅមន្ទីរពេទ្យរបស់រដ្ឋបាន៕
