.jpg)
កម្មវិធីអប់រំរបស់ជប៉ុនចុះអនុស្សរណៈជាមួយ CCF ផ្តល់ការអប់រំលើកម្មវិធីអប់រំ STEM ដល់សិស្សបឋម។ រូបថត CCF
ភ្នំពេញៈ កម្មវិធីបច្ចេកវិទ្យាអប់រំរបស់ប្រទេសជប៉ុន ឈ្មោះ Think!Think! តាមរយៈការផ្ដល់មូលនិធិដោយទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) បានចុះអនុស្សរណៈនៃការយោគយល់ជាមួយអង្គការមូលនិធិកុមារកម្ពុជា (CCF) ផ្ដល់ការអប់រំសាកល្បងលើកម្មវិធីអប់រំបែប STEM ដល់សិស្សកម្រិតបឋមសិក្សាប្រមាណ ២០០ នាក់នៅថ្នាក់រៀនរបស់ CCF ដោយមិនគិតថ្លៃ។
សេចក្តីប្រកាសព័ត៌មានស្ដីពីភាពជាដៃគូរវាង Think!Think! និងអង្គការ CCF ឱ្យដឹងថា កាលពីថ្ងៃទី ២៦ ខែមករា JICA កំពុងផ្តល់មូលនិធិដល់ Think!Think! ដែលជាកម្មវិធីផ្តោតលើជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) សម្រាប់កុមារក្នុងការចាប់ផ្តើមភាពជាដៃគូថ្មីជាមួយអង្គការ CCF ឆ្ពោះទៅការសាកល្បងកម្មវិធីអប់រំបែប STEM របស់ពួកគេក្នុងថ្នាក់ CCF ដោយមិនគិតថ្លៃ។
«តាមរយៈកិច្ចសហប្រតិបត្ដិការនេះនឹងផ្តល់នូវការប្រើប្រាស់សម្រាប់សិស្សចំនួន ២០០ នាក់ ដែលកំពុងសិក្សាថ្នាក់បឋមសិក្សានៅថ្នាក់រៀនរបស់ CCF ដើម្បីសាកល្បងក្នុងរយៈពេល ៣ ខែ ក្នុងការសិក្សាកម្មវិធីនេះ ដោយផ្ដោតលើជំនាញការគិតបែបស៊ីជម្រៅ ការគិតរកហេតុ និងផល និងការយល់ដឹងកាន់តែទូលំទូលាយអំពី STEM»។ នេះបើតាមសេចក្ដីប្រកាស។
សេចក្ដីប្រកាសឱ្យដឹងថា ភាពជាដៃគូនេះគឺជាចំណុចសំខាន់សម្រាប់ JICA ពីព្រោះជាភាពជាដៃគូដំបូងគេ ដែលធ្វើការជាមួយអង្គការក្រៅរដ្ឋាភិបាលក្នុងប្រទេសកម្ពុជា ដើម្បីផ្តល់ជូននូវការប្រើប្រាស់កម្មវិធី Think!Think! នេះ។ JICA បានទទួលស្គាល់នូវការងាររបស់អង្គការមូលនិធិកុមារកម្ពុជា ក្នុងការផ្លាស់ប្តូរជីវិតរបស់កុមារក្រីក្រ ជនក្រីក្រ និងខ្វះខាតបំផុតនៅកម្ពុជា តាមរយៈការអប់រំប្រកបដោយគុណភាពខ្ពស់ ការបណ្តុះបណ្តាលភាពជាអ្នកដឹកនាំ និងកម្មវិធីគាំទ្រដោយផ្ទាល់នៅតំបន់ស្ទឹងមានជ័យតាំងពីឆ្នាំ ២០០៤ រហូតមក។
ក្នុងការប្រើប្រាស់កម្មវិធី Think!Think! ក្នុងថ្នាក់ទី ៥ និងថ្នាក់ទី ៦ នៅ CCF នេះ JICA សង្ឃឹមថា Think!Think! នឹងជួយចូលរួមចំណែកក្នុងការពង្រីកការចូលប្រើប្រាស់លើវិស័យ STEM សម្រាប់សិស្សនៅក្នុងកម្រិតបឋមសិក្សាឱ្យបានកាន់តែច្រើនឡើងថែមទៀត។
លោក Kaneko Ryota តំណាង JICA ថ្លែងថា JICA បានគាំទ្រវិស័យអប់រំសាធារណៈជាច្រើន ដូចជាការបើកមហាវិទ្យាល័យបណ្តុះបណ្តាលគ្រូបង្រៀន។ ប៉ុន្តែកិច្ចសហការនេះគឺជាគម្រោងថ្មីមួយដែលព្យាយាមគាំទ្រដល់អង្គការក្រៅរដ្ឋាភិបាល និងវិស័យឯកជន។
លោកថ្លែងថា៖ «យើងសង្ឃឹមថា អ្នកដឹកនាំនាពេលអនាគតរបស់ប្រទេសកម្ពុជាកាន់តែច្រើនមិនត្រឹមតែត្រូវបានទទួលការបណ្តុះបណ្តាលចេញពីវិស័យសាធារណៈប៉ុណ្ណោះទេ ប៉ុន្តែក៏មានអង្គការក្រៅរដ្ឋាភិបាល ដូចជាសាលារៀនរបស់លោក Scott Neeson ផងដែរ»។
លោក ដៃគី វ៉ាតាណាបេ (Daiki Watanabe) នាយកប្រតិបត្តិនៃ Think!Think! កម្ពុជា ថ្លែងថា កម្មវិធី Think!Think! នឹងត្រូវបានប្រើប្រាស់ដោយសិស្សបឋមសិក្សា CCF ចំនួន ២០០ នាក់ ក្នុងកម្មវិធីសិក្សា STEM របស់ពួកគេនៅលើមូលដ្ឋានសាកល្បង មុនពេលត្រូវបានវាយតម្លៃសម្រាប់ការដាក់ឱ្យប្រើប្រាស់កាន់តែទូលំទូលាយ។
លោកថ្លែងថា៖ «ខ្ញុំជឿថា កម្មវិធីរបស់យើងអាចជួយសិស្សនៅអង្គការមូលនិធិកុមារកម្ពុជាឱ្យទទួលបានការសិក្សាលើជំនាញសំខាន់ៗក្នុងសតវត្សរ៍ទី ២១ ហើយខ្ញុំសង្ឃឹមថា កិច្ចសហប្រតិបត្តិការ រវាង CCF Think!Think! និង JICA នឹងអាចបណ្តុះបណ្តាលអ្នកដឹកនាំនាពេលអនាគតបន្ថែមទៀតចេញពីតំបន់ក្រីក្រមួយនៃប្រទេសកម្ពុជា»។
អង្គការ CCF ជឿជាក់ថា ជាមួយនឹងការអប់រំប្រកបដោយគុណភាព និងភាពជាអ្នកដឹកនាំកុមារម្នាក់មានសក្តានុពលក្នុងការលើកស្ទួយគ្រួសារទាំងមូលចេញពីភាពក្រីក្រ ហើយនៅពេលដែលកុមារមានការអប់រំនោះនឹងមានឥទ្ធិពលយ៉ាងខ្លាំងក្នុងការផ្លាស់ប្តូរសង្គមមួយ។
«តាមរយៈការវិនិយោគលើសុខភាព ការអប់រំ និងសុខុមាលភាពរបស់កុមារ និងជនក្រីក្រ យើងកំពុងផ្តល់នូវជំនាញ ទំនុកចិត្ត និងភាពស្មោះត្រង់ដែលពួកគេត្រូវការដើម្បីក្លាយជាអ្នកដឹកនាំនៃការផ្លាស់ប្តូរជាវិជ្ជមាននៅក្នុងសហគមន៍របស់ពួកគេ»។ នេះបើតាមអង្គការ CCF៕
