.jpg)
ភ្នំពេញៈ រដ្ឋបាលខណ្ឌច្បារអំពៅបានអំពាវនាវដល់ប្រជាពលរដ្ឋឱ្យមានការសហការក្នុងការការសាងសង់ផ្លូវថ្មីចំនួន ០១ ខ្សែ ចាប់ពីចុងផ្លូវចាស់មុខស្ថានីយទូរទស្សន៍ហង្សមាស ស្ថិតក្នុងសង្កាត់ព្រែកឯង ដល់វត្តព្រះច័ន្ទរង្សី ស្ថិតក្នុងសង្កាត់ក្បាលកោះនៅខែកុម្ភៈ ខាងមុខនេះ។
រដ្ឋបាលខណ្ឌច្បារអំពៅ បានជូនដំណឹងដល់បងប្អូនប្រជាពលរដ្ឋម្ចាស់ក្បាលដីពាក់ព័ន្ធ ស្ថិតក្នុង ភូមិចុងព្រែក សង្កាត់ព្រែកឯង និងភូមិព្រែកធំ សង្កាត់ក្បាលកោះ ពីការសាងសង់ផ្លូវថ្មី ចំនួន ០១ខ្សែ ចាប់ពីចុងផ្លូវចាស់មុខស្ថានីយទូរទស្សន៍ហង្សមាស ស្ថិតក្នុងសង្កាត់ព្រែកឯង រហូតដល់វត្តព្រះច័ន្ទរង្សី ស្ថិតក្នុងសង្កាត់ក្បាលកោះ ស្របតាមប្លង់គោលប្រើប្រាស់ដីធ្លីថ្នាក់ខណ្ឌឆ្នាំ២០៣៥ នៅសប្ដាហ៍ទី១ ខែកុម្ភៈ ឆ្នាំ២០២២។
ខណ្ឌច្បារអំពៅបានសរសេរថា៖«ដូចនេះដើម្បីសម្រួលដល់ការសាងសង់ផ្លូវខាងលើឱ្យមានភាពរលូន រដ្ឋបាលខណ្ឌ សូមឱ្យបងប្អូនប្រជាពលរដ្ឋ ម្ចាស់ក្បាលដីពាក់ព័ន្ធផ្លូវថ្មីដែលត្រូវសាងសង់នេះ ចូលរួមសហការជាមួយអាជ្ញាធរមូលដ្ឋានប្រកបដោយស្មារតីទទួលខុសត្រូវខ្ពស់»។ រដ្ឋបាលខណ្ឌច្បារអំពៅ សង្ឃឹមជឿជាក់យ៉ាងមុតមាំថា បងប្អូនប្រជាពលរដ្ឋ ម្ចាស់ក្បាលដីពាក់ព័ន្ធក្នុងភូមិសាស្ត្រខាងលើ នឹងចូលរួមសហការជាមួយអាជ្ញាធរមូលដ្ឋានក្នុងការសាងសង់ផ្លូវខាងលើ ដើម្បីបម្រើឱ្យផលប្រយោជន៍សាធារណៈ៕
