និយ័តករទូរគមនាគមន៍កម្ពុជា(ន.ទ.ក.) សហការជាមួយនឹងអគ្គស្នងការដ្ឋាននគរបាលជាតិនៃក្រសួងមហាផ្ទៃ បានសម្រេចបិទខ្ទប់គេហទំព័រ ចំនួន ១២៣ ដែលកំពុងធ្វើប្រតិបត្តិការនិងផ្តល់សេវាល្បែងស៊ីសងអនឡាញ និងល្បែងឆ្នោតខុសច្បាប់នៅក្នុងព្រះរាជាណាចក្រកម្ពុជា។
នៅក្នុងសេចក្តីប្រកាសព័ត៌មានរបស់ ន.ទ.ក. នៅថ្ងៃទី២៨ ខែមករា បានឱ្យដឹងថា ន.ទ.ក. ធ្លាប់បានចាត់វិធានការបិទគេហទំព័រដែលដំណើរការអាជីវកម្ម ប្រភេទនេះចំនួន ៧៩ រួចមកហើយកាលពីថ្ងៃទី១៦ ខែវិច្ឆិកា ឆ្នាំ២០២១កន្លងមក។
ន.ទ.ក. បានបញ្ជាក់ថា ៖ «ន. ទ. ក. នឹងបន្តសហការជាមួយអគ្គស្នងការដ្ឋាននគរបាលជាតិ អាជ្ញាធរពាក់ព័ន្ធនិងប្រតិបត្តិករ ទូរគមនាគមន៍ទាំងអស់ ដើម្បីលុបបំបាត់រាល់គេហទំព័រដែលធ្វើប្រតិបត្តិការនិងផ្តល់សេវាល្បែងស៊ីសងអនឡាញ និងល្បែងឆ្នោត ដែលផ្ទុយច្បាប់ និងសារាចរណែនាំរបស់រាជរដ្ឋាភិបាល»។
រាជរដ្ឋាភិបាលកម្ពុជា បានចេញសារាចរណែនាំ ចុះថ្ងៃទី១៨ ខែសីហា ឆ្នាំ២០១៩ ស្តីពីការពង្រឹងការគ្រប់គ្រងអាជីវកម្មល្បែងភ្នាល់តាមម៉ាស៊ីនអេឡិចត្រូនិក តាមរយៈអុីនធឺណិតអនឡាញ ក្នុងនិងក្រៅប្រទេសគ្រប់ប្រភេទ ក្នុងគោលដៅចូលរួមថែរក្សាការពារសន្តិសុខ សណ្តាប់ធ្នាប់សាធារណៈ និងរបៀបរៀបរយក្នុងសង្គម។
ជាមួយគ្នានេះដែរ ន. ទ.ក. ក៏បានអំពាវនាវដល់សាធារណជនទាំងអស់ ចូលរួមរាយការណ៍មកន.ទ.ក. តាមរយៈលេខទូរស័ព្ទ ៦៧៨៩ នៅរៀងរាល់ម៉ោងធ្វើការ ឬតាមបណ្តាញសង្គមហ្វេសប៊ុក «និយ័តករទូរគមនាគមន៍កម្ពុជា» នូវគេហទំព័រដែលកំពុងដំណើរការល្បែងស៊ីសងអនឡាញ និងល្បែងឆ្នោតខុសច្បាប់នៅក្នុងព្រះរាជាណាចក្រកម្ពុជា ដោយ ន. ទ. ក. នឹងរក្សាការសម្ងាត់ជូន៕
វីដេអូ៖