ភ្នំពេញៈ គ្រោះថ្នាក់ចរាចរណ៍ទូទាំងប្រទេសក្នុងរយៈពេល២ថ្ងៃគឺនៅថ្ងៃទី ២៧ និងថ្ងៃទី ២៨ ខែមករានេះ បានបណ្តាលឱ្យមនុស្សស្លាប់ចំនួន១៣នាក់ និងរងរបួសធ្ងន់ស្រាលចំនួន២៩នាក់។ នេះបើយោងតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេសចេញដោយនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ។
គ្រោះថ្នាក់ចរាចរណ៍ផ្លូវគោកទូទាំងប្រទេសនៅថ្ងៃទី២៨ ខែមករា ឆ្នាំ២០២២នេះ បណ្តាលឱ្យមនុស្សស្លាប់៧នាក់(ស្រី១នាក់) របួសធ្ងន់ ៤នាក់ និងរបួសស្រាល ៣នាក់។
របាយការណ៍បញ្ជាក់ថា គ្រោះថ្នាក់ចរាចរណ៍ ដែលបង្កឱ្យមានមនុស្សស្លាប់ និងរបួសធ្ងន់ស្រាលចំនួន១១នាក់នេះ កើតឡើងដោយសារការប៉ះទង្គិចគ្នាចំនួន ៧លើក។
ជាមួយគ្នានេះ កាលពីថ្ងៃទី២៧មករា គ្រោះថ្នាក់ចរាចរណ៍ផ្លូវគោកទូទាំងប្រទេសបានបណ្តាលឱ្យមនុស្សស្លាប់៦នាក់ របួសធ្ងន់ ១០នាក់(ស្រី៣នាក់) និងរបួសស្រាល ១២នាក់(ស្រី៣នាក់)។
របាយការណ៍បានលើកឡើងថា គ្រោះថ្នាក់ចរាចរណ៍ ដែលបង្កឱ្យមានមនុស្សស្លាប់និងរបួសចំនួន២៨នាក់ នៅថ្ងៃទី២៧ខែមករា គឺកើតឡើងដោយសារការប៉ះទង្គិចគ្នាចំនួន ៧លើក៕