ខេត្តកំពង់ចាមៈ លោក អ៊ុន ចាន់ដា អភិបាលខេត្តកំពង់ចាម បានថ្លែងក្រើនរំឭក ដល់មន្ត្រីសុខាភិបាលខេត្ត សូមបន្តបម្រើសេវា ជូនប្រជាពលរដ្ឋ ប្រកបដោយក្រមសីលធម៌ និងវិជ្ជាជីវៈ គឺត្រូវពិនិត្យ និងព្យាបាលអ្នកជំងឺ ដោយយកចិត្តទុកដាក់ ធ្វើយ៉ាងណាកុំឱ្យមានការថ្នាំងថ្នាក់ចិត្ត ពីអ្នកជំងឺនិងក្រុមគ្រួសារ។
លោក អ៊ុន ចាន់ដា បានថ្លែងបែបនេះ ក្នុងពេលដែលលោកអញ្ជើញជាអធិបតីក្នុងពិធីសំណេះសំណាលជាមួយមន្ត្រីរាជការ នៃមន្ទីរសុខាភិបាលរដ្ឋបាលខេត្តកំពង់ចាមនៅថ្ងៃទី២៨មករាឆ្នាំ២០២១។
បើតាមរដ្ឋបាលខេត្តកំពង់ចាម ក្នុងពិធីជួបសំណេះសំណាលនោះលោក អ៊ុន ចាន់ដា បានថ្លែងក្រើនរំឭក ដល់មន្ត្រីសុខាភិបាលខេត្ត សូមបន្តបម្រើសេវាជូនប្រជាពលរដ្ឋ ប្រកបដោយក្រមសីលធម៌ និងវិជ្ជាជីវៈ។ គ្រូពេទ្យ ត្រូវពិនិត្យ និងព្យាបាលអ្នកជំងឺ ដោយយកចិត្តទុកដាក់ស្មោះត្រង់ ផ្អែកលើចំណេះដឹងវេជ្ជសាស្ត្រ និងបើចាំបាច់ ត្រូវរកជំនួយពីអ្នកដែលមានសមត្ថភាពខ្ពស់ជាង។
លោកអភិបាលខេត្ត បានមានប្រសាសន៍បន្ថែមថា កន្លងទៅដោយសារតែការងារមមាញឹកពេក ការបម្រើសេវារបស់គ្រូពេទ្យ ធ្លាប់មានបញ្ហាខ្លះ ក្នុងការប្រើសម្ដីមិនបានសមរម្យ ជាមួយអ្នកជំងឺ ដែលធ្វើឱ្យប៉ះពាល់ដល់អារម្មណ៍អ្នកជំងឺ និងក្រុមគ្រួសារ ហើយប្រការនោះត្រូវបានកែប្រែ និងមានការផ្លាស់ប្ដូរឥរិយាបថច្រើន រហូតមកដល់បច្ចុប្បន្ននេះ នៅមានតិចតួចតែប៉ុណ្ណោះ។
លោកបញ្ជាក់ថា៖«ប៉ុន្តែបើទោះជាយ៉ាងនេះក្តី សូមឱ្យមន្ត្រីសុខាភិបាលរបស់យើង ខិតខំបន្តកែប្រែបន្ថែមទៀត ចៀសវាងមានការថ្នាំងថ្នាក់ចិត្ត ពីប្រជាពលរដ្ឋ ដែលគាត់កំពុងមានបញ្ហាសុខភាព ហើយរត់មករកជំនួយពីក្រុមគ្រូពេទ្យ»។
ទន្ទឹមនឹងនោះដែរ លោកអភិបាលខេត្ត បានសម្ដែងការកោតសរសើរ និងអរគុណជាអនេក នូវកិច្ចខិតខំប្រឹងប្រែង របស់មន្ត្រីបុគ្គលិក សុខាភិបាល និងក្រុមគ្រូពេទ្យទាំងអស់ ដែលកន្លងមកនេះ ទទួលបានគុណសម្បត្តិទាំងអស់គ្នា ដែលបានសហការគ្នា បម្រើសេវាប្រកបដោយវិជ្ជាជីវៈផ្ទាល់ ជាមួយប្រជាពលរដ្ឋ ធ្វើឱ្យយើងទទួលបាននូវស្ថានការណ៍បានល្អប្រសើរនៃជំងឺកូវីដ១៩ ដូចថ្ងៃនេះ។
លោកវេជ្ជបណ្ឌិត គឹមសួរ ភីរុណ ប្រធានមន្ទីរសុខាភិបាល នៃរដ្ឋបាលខេត្តកំពង់ចាម បានថ្លែងថា រយៈពេល ២ឆ្នាំចុងក្រោយ ប្រទេសកម្ពុជា ក៏ដូចជាសកលលោកទាំងមូល បានធ្លាក់ចូលទៅក្នុងវិបត្តិធ្ងន់ធ្ងរ ដោយសារជំងឺកូវីដ១៩ ធ្វើឱ្យប៉ះពាល់ដល់អាយុជីវិត និងជីវភាពរស់នៅរបស់ប្រជាពលរដ្ឋ។
ប៉ុន្តែក្រោមការដឹកនាំ«ប្រកបដោយគតិបណ្ឌិត របស់សម្ដេចអគ្គមហាសេនាបតី តេជោ ហ៊ុន សែន បានដាក់ចេញនូវផែនការយុទ្ធសាស្ត្រ និងវិធានការប្រកបដោយប្រសិទ្ធភាព ដើម្បីទប់ទល់នឹងជំងឺនេះ រហូតមកដល់បច្ចុប្បន្នស្ថានភាពជំងឺកូវីដ១៩ បានធូរស្រាល ប្រទេសយើង ត្រូវបានបើកដំណើរការឡើងវិញ ដោយស្ថិតនៅក្នុងការប្រុងប្រយ័ត្នជាប្រចាំ អនុវត្តនូវវិធានការ ៣កុំ ៣ការពារ»។
លោកប្រធានមន្ទីរសុខាភិបាល បានលើកឡើងថា ដោយឡែកនៅក្នុងខេត្តកំពង់ចាម ក្នុងការប្រយុទ្ធប្រឆាំងនឹងជំងឺកូវីដ១៩ គឺថ្នាក់ដឹកនាំគ្រប់លំដាប់ថ្នាក់ ទាំងកងកម្លាំងប្រដាប់អាវុធ មន្ទីរអង្គភាពពាក់ព័ន្ធ និងមន្ត្រីបុគ្គលិកសុខាភិបាលទាំងអស់ បានខិតខំលះបង់អស់កម្លាំងកាយចិត្ត និងស្មារតីដើម្បីប្រឆាំងនឹងជំងឺកូវីដ១៩ ធ្វើឱ្យស្ថានភាព មានភាពធូរស្រាលឡើងវិញគួរជាទីមោទន:៕
វីដេអូ៖