មណ្ឌលគិរីៈ រដ្ឋលេខាធិការប្រចាំការក្រសួងបរិស្ថានលោក ផៃ ប៊ុនឈឿន បានជំរុញឱ្យមន្ទីរបរិស្ថានខេត្តមណ្ឌលគិរីពង្រឹងការគ្រប់គ្រងធនធានធម្មជាតិឱ្យបានល្អថែមទៀត ដោយសហការជាមួយអាជ្ញាធរមូលដ្ឋានគ្រប់លំដាប់ថ្នាក់។
ការជំរុញនេះត្រូវបានធ្វើឡើងក្នុងអំឡុងពេលកិច្ចប្រជុំបូកសរុបលទ្ធផលការងារបរិស្ថានទូទាំងមណ្ឌលគិរីប្រចាំឆ្នាំ២០២១ និងលើកទិសដៅការងារសម្រាប់អនុវត្តបន្តឆ្នាំ២០២២ របស់មន្ទីរបរិស្ថានខេត្តមណ្ឌលគិរីនាព្រឹកថ្ងៃទី២៨ ខែមករាឆ្នាំ ២០២២។
លោកផៃ ប៊ុនឈឿនបានថ្លែងថា បន្ទាប់ពីមេរោគកូវីដ១៩រីករាលដាល វាបានធ្វើឱ្យមានអសកម្មភាពមួយចំនួនមិនថាកម្ពុជា ឬ ប្រទេសដទៃទេ ហើយចំពោះវិស័យបរិស្ថានក៏បានទទួលរងផលប៉ះពាល់មួយចំនួនដែរ។ ប៉ុន្តែចាប់ពីស្ថានភាពធូរស្បើយ ក្រោយពីរាជរដ្ឋាភិបាលបានចាក់វ៉ាក់សាំងបង្កាជំងឺកូវីដ១៩ ជូនពលរដ្ឋទូទាំងប្រទេសរួចមក សកម្មភាពការងារត្រូវបន្ត និងពង្រឹងឱ្យកាន់តែសកម្មជាងមុនក្នុងការគ្រប់គ្រងបរិស្ថានបន្ថែមទៀត។
លោកក៏បានលើកទឹកចិត្តឱ្យមន្ត្រីជំនាញយកចិត្តទុកដាក់លើការងារអប់រំផ្សព្វផ្សាយលើបទដ្ឋានគតិយុត្តនិងច្បាប់នានា ដើម្បីខេត្តមណ្ឌលគិរីអនាគតជាប៉ូលសេដ្ឋកិច្ចយ៉ាងសំខាន់របស់កម្ពុជា ជាពិសេសលើកកម្ពស់សោភ័ណភាព និងអនាម័យបរិស្ថាន ទុកដាក់សំរាមឱ្យបានត្រឹមត្រូវ នៅតាមរមណីយដ្ឋាន កន្លែងទេសចរណ៍ សណ្ឋាគារ និង រីសតនានា។
ក្រៅពីនោះលោកក៏បានក្រើនរំឭកដល់មន្ត្រីនៃមន្ទីរបរិស្ថានខេត្ត ត្រូវការពារឱ្យបាននូវកេរដំណែលនូវធនធានធម្មជាតិសម្រាប់មនុស្សជំនាន់ក្រោយ។
លោកឈឹម កាន អភិបាលរងខេត្តមណ្ឌលគិរី បានកោតសរសើរ និងវាយតម្លៃខ្ពស់លើសមិទ្ធផលដែលបានសម្រេចបាន និងកិច្ចខិតខំប្រឹងប្រែងនាពេលកន្លងមករបស់មន្ទីរបរិស្ថានខេត្តមណ្ឌលគិរី។ ពិសេសទៅលើកិច្ចការពាធនធានធម្មជាតិ និងអភិរក្សជីវៈចម្រុះ ការទប់ស្កាត់នូវរាល់ការបំពុលបរិស្ថាន ការបំផ្លាញធម្មជាតិ និងការអភិវឌ្ឍសហគមន៍មូលដ្ឋាន ជាដើម។
លោកកែវ សុភគ៌ ប្រធានមន្ទីរបរិស្ថានខេត្តមណ្ឌលគិរី បានលើកឡើងក្នុងពិធីនេះដែរថា ការងារសំខាន់ៗ ដើម្បីឆ្លើយតបទៅនឹងគោលដៅចម្បងៗ រួមមានកិច្ចការពារ អភិរក្ស និងពង្រឹងការអនុវត្តច្បាប់ស្តីពី តំបន់ការពារធម្មជាតិ ការធានានូវគុណភាពបរិស្ថានល្អនៅតាមទីប្រជុំជន ការចូលរួមគ្រប់គ្រងធនធានធម្មជាតិដោយសហគមន៍មូលដ្នាន ការលើកស្ទួយជីវភាពរស់នៅរបស់សហគមន៍មូលដ្ឋាន ដើម្បីកាត់បន្ថយសម្ពាធទៅលើធនធានធម្មជាតិ និងការអប់រំផ្សព្វផ្សាយបរិស្ថានជូនសាធារណជន សំដៅសម្រេចបាននូវគោលបំណងរួមមួយរបស់មន្ទីរបរិស្ថានខេត្តមណ្ឌលគិរី៕