.jpg)
សៀមរាបៈ អាជ្ញាធរស្រុកបន្ទាយស្រីកំពុងបញ្ជ្រាបការយល់ដឹងនិងជំរុញឱ្យបងប្អូនប្រជាពលរដ្ឋគ្រប់ភូមិទាំងអស់នៃស្រុកបន្ទាយស្រីប្រើប្រាស់បង្គន់អនាម័យគ្រប់ៗផ្ទះ ដែលតាមគម្រោងនិងអាចសម្រេចបាននូវការបញ្ឈប់ការបន្ទោបង់ពាសវាលពាសកាលទាំងស្រុង (Open Defecation Free - ODF) ត្រឹមដំណាច់ឆ្នាំ ២០២២ នេះ។
លោក ឃឹម ហ្វីណង់ អភិបាលស្រុកបន្ទាយស្រី បានឱ្យដឹងថា ចំណុចចាប់ផ្តើមមួយនៃដំណើរឆ្ពោះទៅកាន់ការបញ្ឈប់ទាំងស្រុងនូវការបន្ទោបង់ពាសវាលពាសកាលនៅតាមសហគមន៍ជនបទនៃស្រុកបន្ទាយស្រី គឺ អាជ្ញាធរស្រុក មន្ត្រីជំនាញ និងអង្គការដៃគូកំពុងតែជំរុញឱ្យបងប្អូនប្រជាពលរដ្ឋនៅក្នុងភូមិទាំងអស់នៃស្រុកបន្ទាយស្រី មានការប្រើប្រាស់បង្គន់អនាម័យគ្រប់ៗផ្ទះ និងអាចសម្រេចបាននូវការបញ្ឈប់ការបន្ទោបង់ពាសវាលពាសកាលទាំងស្រុង (Open Defecation Free - ODF) ត្រឹមដំណាច់ឆ្នាំ២០២២នេះ។
លោកអភិបាលស្រុកបញ្ជាក់ថា ការជំរុញឱ្យប្រជាជនបញ្ឈប់ការបន្ទោបង់ពាសពាលពាសកាលនេះ ធ្វើឡើងតាមរយៈ កម្មវិធីបំផុសឱ្យ «សហគមន៍ដឹកនាំអនាម័យ - Community-led Total Sanitation» ដែលទទួលបានការគាំទ្រថវិកាដោយអង្គការភ្លែនអន្តរជាតិកម្ពុជា និងដឹកនាំអនុវត្តផ្ទាល់ដោយមន្ត្រីជំនាញនៃក្រសួងអភិវឌ្ឍន៍ជនបទ ជាមួយនឹងអង្គការយូរីដូ។
លោកថ្លែងថា ៖«ក្នុងនាមជាស្រុកទេសចរណ៍ និងជាស្រុកដែលតែងតែឱ្យតម្លៃខ្ពស់ទៅលើការងារបរិស្ថានអនាម័យ ខ្ញុំសង្ឃឹមជឿជាក់ថានឹងមានការចូលរួមទូលំទូលាយពីសំណាក់បងប្អូនប្រជាពលរដ្ឋនៅក្នុងស្រុកទាំងមូល ហើយយើងនឹងអាចសម្រេចគោលដៅមួយនេះបាន ដើម្បីលើកកម្ពស់ការយល់ដឹងពីសារៈសំខាន់នៃអនាម័យសុខភាពមូលដ្ឋាន ភាពថ្លៃថ្នូរ និងភាពស៊ីវីល័យនៃគុណភាពជីវិតនៅតាមទីជនបទ ឱ្យស័ក្តិសមជាប្រជាពលរដ្ឋរស់នៅក្នុងស្រុកទេសចរណ៍មួយផងដែរ» ៕
វីដេអូ៖
