.jpg)
កេសរកូលព្រៃ។ រូបថត ក្រសួងបរិស្ថាន
ភ្នំពេញៈ វិស័យឯកជន និងអ្នកស្រាវជ្រាវបានចែករំលែកបទពិសោធន៍សំខាន់ៗពីកេសរកូលព្រៃ ហើយបានសន្យាធ្វើកិច្ចសហការជាមួយនឹងក្រសួងបរិស្ថាន ដើម្បីលើកកម្ពស់កិច្ចការអភិរក្សកេសរកូលនៅកម្ពុជា។
ការសន្យាផ្តល់កិច្ចសហការនេះត្រូវបានធ្វើឡើងនាថ្ងៃទី២៨ ខែមករានេះ នៅក្នុងកិច្ចប្រជុំស្តីពី “ការចូលរួមរបស់វិស័យឯកជនក្នុងការគ្រប់គ្រងកេសរកូលនៅកម្ពុជា” រវាងលោកចាន់ សុម៉ាលី អនុរដ្ឋលេខាធិការក្រសួងបរិស្ថាន ទទួលបន្ទុកការងារមជ្ឈមណ្ឌលកេសរកូល ម្ចាស់កសិដ្ឋាន ក្រុមហ៊ុនឯកជន អ្នកសិក្សាស្រាវជ្រាវ សិស្សនិស្សិត និងប្រជាពលរដ្ឋដែលស្រលាញ់កេសរកូលសរុបចំនួន២៧រូប។
ក្រសួងបរិស្ថានបានឱ្យដឹងថា កិច្ចប្រជុំនេះរៀបចំឡើងក្នុងគោលបំណង ដើម្បីផ្លាស់ប្ដូរព័ត៌មានស្តីពីការការពារ និងអភិរក្សប្រភេទកេសរកូលព្រៃ និងពិភាក្សាស្វែងរកយន្តការ និងកិច្ចសហប្រតិបត្តិការពីវិស័យឯកជនក្នុងការគ្រប់គ្រងកេសរកូលនៅកម្ពុជា។
ក្រសួងបានបញ្ជាក់ថា៖«ជាលទ្ធផល អង្គប្រជុំបានផ្លាស់ប្ដូរព័ត៌មានពីប្រភេទសំខាន់ៗនៃកេសរកូលព្រៃរបស់កម្ពុជា ការរៀបចំនិងបណ្ដុះកេសរកូលតាមវិធីសាស្ត្រជាលិការវប្បកម្ម និងបានសន្យាគាំទ្រផ្នែកបច្ចេកទេស និងចែករំលែកពូជកេសរកូលជូនមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ដើម្បីថែរក្សា និងអភិរក្សផងដែរ»។
ក្រៅពីនោះ ក្រុមការងារមជ្ឈមណ្ឌល នឹងរៀបចំជាទម្រង់សម្រង់ព័ត៌មានប្រភេទកេសរកូលព្រៃអាទិភាពសម្រាប់កិច្ចការអភិរក្ស ដើម្បីឱ្យមានភាពងាយស្រួលសម្រាប់កិច្ចសហការផ្តល់ព័ត៌មាន និងទិន្នន័យបន្ថែម និងការសិក្សាពីលទ្ធភាពចងក្រងជាបណ្ដាញអ្នកស្រលាញ់កេសរកូល ដើម្បីដាក់ជូនថ្នាក់ដឹកនាំពិនិត្យ និងសម្រេច។
កេសរកូលព្រៃ ដែលត្រូវបានគេហៅថា អ័រគីដេត្រូវបានហាមឃាត់មិនឱ្យមានការធ្វើអាជីវកម្ម ដើម្បីចៀសវាងការវិនាសផុតពូជពីក្នុងព្រៃធម្មជាតិ។ ក្រសួងបរិស្ថានធ្លាប់បានព្រមានចាត់វិធានការផ្លូវច្បាប់ចំពោះអ្នកប្រមូលទិញ និងប្រកបអាជីវកម្មទិញលក់ កេសរកូលព្រៃក្នុងទ្រង់ទ្រាយធំ ដែលអាចបង្កឱ្យវិនាសបាត់ពូជ។
កម្ពុជាមានកេសរកូលព្រៃប្រមាណជា៥០០ប្រភេទ។ ក្នុងនោះ កេសរកូលជាង២០០ប្រភេទ ដែលមានប្រមាណជា១ពាន់ដើមត្រូវបានយកទៅមជ្ឈមណ្ឌលអភិរក្ស និងស្រាវជ្រាវកេសរកូលសុខអានភ្នំគូលែន ដើម្បីធ្វើការសិក្សាស្រាវជ្រាវ។
ផ្កាកេសរកូល ដែលដាក់តាំងលក់នៅតាមហាងលក់ផ្កានានា គឺជាប្រភេទកេសរកូល ដែលភាគច្រើនបានមកពីការបង្កាត់។ ប៉ុន្តែតាមការសិក្សារបស់អ្នកជំនាញផ្នែកជីវៈចម្រុះ កម្ពុជាអាចចាត់ទុកជាប្រទេសមួយដែលសម្បូរបែបនូវធនធានធម្មជាតិ និងជីវៈចម្រុះ។ ក្នុងចំណោមកេសរកូលទាំងជាង៥០០ប្រភេទនោះ មានតែកេសរកូលប្រមាណ៣៦០ប្រភេទប៉ុណ្ណោះ ដែលត្រូវបានធ្វើអត្តសញ្ញាណរួចរាល់ ហើយមានពូជខ្លះក៏ជាពូជកម្រផងដែរ៕
វីដេអូ៖
