.jpg)
មណ្ឌលគិរីៈ សហគមន៍ព្រៃឈើបានបន្តជួបប្រជុំជាមួយនឹងអាជ្ញាធរមូលដ្ឋាន មន្ត្រីជំនាញពាក់ព័ន្ធ រៀបចំបំពាក់បន្ថែមនូវស្លាកដីព្រៃសហគមន៍ និងផ្ទាំងរូបភាពផ្សព្វផ្សាយ ដើម្បីអប់រំ និងទប់ស្កាត់បទល្មើសព្រៃឈើ និងសត្វព្រៃ។
ក្រុមការងារអនុវត្តគម្រោង “ការបង្កើនសមត្ថភាពមន្ត្រីរដ្ឋបាលព្រៃឈើ និងសហគមន៍មូលដ្ឋាន ដើម្បីអនុវត្តឱ្យមានប្រសិទ្ធភាពកម្មវិធីសហគមន៍ព្រៃឈើក្នុងខេត្តមណ្ឌលគិរី និងក្រចេះ” បានរៀបចំកិច្ចប្រជុំពិភាក្សាស្តីពីការពង្រឹងការអនុវត្តច្បាប់ស្តីពីព្រៃឈើ និងការអនុវត្តគម្រោងITTO PD836/17 Rev2 (F)ក្នុងដែនគ្រប់គ្រងរបស់សហគមន៍ព្រៃឈើរបស់ខ្លួនក្នុងខេត្តមណ្ឌលគិរី និងការស្វែងរកដំណោះស្រាយរួមគ្នាជាមួយអាជ្ញាធរមូលដ្ឋាន គណៈកម្មការសហគមន៍ព្រៃឈើ និងមន្ត្រីអនុវត្តគម្រោង ដើម្បីអនុវត្តឱ្យមានប្រសិទ្ធភាពលើការលុបបំបាត់សកម្មភាពកាប់រានទន្ទ្រានដីព្រៃសហគមន៍ និងការទប់ស្កាត់បទល្មើសព្រៃឈើ និងសត្វព្រៃក្នុងដែនគ្រប់គ្រងរបស់សហគមន៍ព្រៃឈើអូរចុងណាច។ នេះបើយោងតាមហ្វេសប៊ុកសហគមន៍ព្រៃឈើកាលពីថ្ងៃសុក្រទី២៨ខែមករានេះ។
ក្រៅពីនោះ ក្រុមការងារអនុវត្តគម្រោងបានសហការជាមួយគណៈកម្មការសហគមន៍ព្រៃឈើពីងព្រង់ក្លង់ពេសថូ ចុះពិនិត្យជាក់ស្តែងពីស្ថានភាពទូទៅនៅក្នុងតំបន់សហគមន៍ព្រៃឈើ និងការបំពាក់បន្ថែមនូវស្លាកដីព្រៃសហគមន៍ និងផ្ទាំងរូបភាពផ្សព្វផ្សាយស្តីពីបទល្មើសព្រៃឈើនៅតាមដងផ្លូវឆ្លងកាត់ក្នុងតំបន់ព្រៃសហគមន៍។ សកម្មភាពនេះធ្វើឡើងក្នុងគោលបំណងដើម្បីផ្សព្វផ្សាយ និងបញ្ជ្រាបនូវព័ត៌មានស្តីពីតំបន់ដែនគ្រប់គ្រងសហគមន៍ព្រៃឈើពីងព្រង់ក្លង់ពេសថូ និងការទប់ស្កាត់នូវសកម្មភាពបទល្មើសព្រៃឈើ និងសត្វព្រៃក្នុងដែនព្រៃសហគមន៍។
ក្រុមការងារក៏បានកំពុងតែធ្វើការចុះល្បាតការពារ បង្ក្រាប និងទប់ស្កាត់បទល្មើសកាត់ឈើខុសច្បាប់ និងសកម្មភាពកាប់រានទន្ទ្រានយកដីព្រៃសហគមន៍យកធ្វើជាកម្មសិទ្ធិ ហើយនឹងចុះជួបនិងធ្វើការពិភាក្សាការងារជាមន្ទីរបរិស្ថានខេត្តមណ្ឌលគិរី ដើម្បីពង្រឹងការការពារ និងគ្រប់គ្រងព្រៃឈើសហគមន៍ផងដែរ។
ក្រសួងកសិកម្ម រុក្ខាប្រមាញ់ និងនេសាទបានចេញប្រកាសទទួលស្គាល់សហគមន៍ព្រៃឈើសរុបមានចំនួន ៥៣៦ ដែលមានទំហំផ្ទៃដីសរុបចំនួន ៤៤៩ ៤៧៥ ហិកតា នៅទូទាំងប្រទេសគិតត្រឹមឆ្នាំ២០២១កន្លងមកនោះ៕
