.jpg)
សៀមរាបៈ អាជ្ញាធរស្រុកបន្ទាយស្រី សុំការយោគយល់ពីសំណាក់ភ្ញៀវទេសចរក្នុងស្រុកមួយដែលមកលេង ឬឆ្លងកាត់ស្រុកបន្ទាយស្រីឈប់ទុកកាកសំណល់សំរាមចោលដោយឥតសណ្តាប់ធ្នាប់តាមផ្លូវសាធារណៈ ព្រោះកន្លែងទាំងនេះមិនមែនជាកន្លែងចោលសំរាមនោះទេ បើទោះជាគ្មានម្ចាស់នៅនឹងកន្លែងក៏ដោយ។
លោក ឃឹម ហ្វីណង់ អភិបាលស្រុកបន្ទាយស្រីបានឱ្យដឹងតាមរយៈហ្វេសប៊ុកនៅថ្ងៃទី ២៩ ខែមករានេះថា ជាទម្លាប់ល្អមួយរបស់អ្នកស្រុកបន្ទាយស្រី នៅរៀងរាល់មុនពេលបុណ្យទានម្តងៗ ដើម្បីត្រៀមខ្លួនទទួលស្វាគមន៍អ្នកទេសចរមកទស្សនាដើរលេងកម្សាន្តនៅក្នុងស្រុក តែងដើររើសសំរាមសម្អាតតាមផ្លូវសាធារណៈ និងទីកន្លែងមួយចំនួន ដែលភ្ញៀវទេសចរឈប់ចតដើម្បីទទួលទានអាហារ ហើយមិនបានសម្អាតដោយទុកសំរាមនៅពាសវាលពាសកាល។
លោកអភិបាលស្រុកបន្ទាយស្រីលើកឡើងថា អ្នកបន្ទាយស្រីភាគច្រើនឈប់ចោលសំរាមពាសវាលពាសកាលទៀតហើយ ហើយសំរាមក៏លែងសូវមានទៀតដែរ តែអ្នកភូមិតែងលួចត្អួញត្អែរថា ពិបាកតែអ្នកចម្ងាយ អ្នកធ្វើដំណើរឆ្លងកាត់ និងអ្នកទេសចរទេ។ លោកថ្លែងថា ៖«ភាគច្រើនគឺសង្កេតឃើញមាននៅតាមដងផ្លូវសាធារណៈ ទីវាលដីទំនេរដែលអាចឈប់ចតឡាន រ៉ឺម៉ក គោយន្ត ហូបចុករួចហើយពង្រាយស្បោងប្លាស្ទិក ដបទឹកសុទ្ធ និងកញ្ចប់ប្រអប់ស្នោទុកចោលនៅទីនោះដោយឥតសណ្តាប់ធ្នាប់»។
លោក ឃឹម ហ្វីណង់ បានសម្តែងការសោកស្តាយចំពោះភ្ញៀវទេសចរមួយចំនួន និងបានសុំការយោគយល់លើរឿងនេះ ពីសំណាក់ភ្ញៀវទេសចរក្នុងស្រុកទាំងអស់ដែលមកលេង ឬឆ្លងកាត់ស្រុកបន្ទាយស្រី។ លោកថា គួរអាណិតដល់គ្នាអ្នករើស និងផ្តល់ការគោរពទៅដល់ទម្លាប់ស្អាតរបស់អ្នកបន្ទាយស្រីផង ជាពិសេសពេលមកលេងបន្ទាយស្រីក្នុងឱកាសបុណ្យចូលឆ្នាំចិនខាងមុខនេះ៕
