ព្រះសីហនុៈ ទោះបីស្ថិតក្នុងអំឡុងវិបត្តិនៃជំងឺកូវីដ ១៩ ការផ្សព្វផ្សាយចំណុចគន្លឹះទៅកាន់ប្រជាពលរដ្ឋឱ្យងាកមកគោរព និងអនុវត្តច្បាប់ស្តីពីសុវត្ថិភាពចរាចរណ៍ផ្លូវគោកនៅកម្ពុជា និងការកសាងភាពធន់ដល់សហគមន៍តាមរយៈកម្លាំងចលករនៃយុវជនអ្នកស្ម័គ្រចិត្តកាកបាទក្រហមកម្ពុជា នៅតែទទួលបានលទ្ធផលល្អប្រសើរ។ នេះបើតាមលោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជា។
ក្នុងសិក្ខាសាលាឆ្លុះបញ្ចាំងសកម្មភាពការងារយុវជន អ្នកស្ម័គ្រចិត្តកាកបាទក្រហមកម្ពុជា និងសុវត្ថិភាពចរាចរណ៍ឆ្នាំ ២០២១ និងលើកទិសដៅបន្តឆ្នាំ ២០២២ ដែលមានការចូលរួមពីសាខាកាកបាទក្រហមកម្ពុជា ២៥ រាជធានីខេត្ត សរុបចំនួន ៩៣ នាក់ធ្វើឡើងនៅសាលប្រជុំសាលាខេត្តព្រះសីហនុនាថ្ងៃទី ២៨-២៩ ខែមករានេះ។
លោកស្រី ពុំ ចន្ទីនី អគ្គលេខាធិការកាកបាទក្រហមកម្ពុជាលើកឡើងថា ការងារអភិវឌ្ឍយុវជន អ្នកស្ម័គ្រចិត្តទទួលបានផ្លែផ្កាជោគជ័យ និងសមិទ្ធផលសម្រេចបានជាច្រើនទោះបីស្ថិតក្នុងអំឡុងវិបត្តិនៃជំងឺកូវីដ ១៩។
សាខាកាកបាទក្រហមកម្ពុជាបានជំរុញការងារផ្សព្វផ្សាយ បណ្តុះបណ្តាល ការកសាងភាពធន់ដល់សហគមន៍តាមរយៈកម្លាំងចលករនៃយុវជន អ្នកស្ម័គ្រចិត្ត និង ផ្សព្វផ្សាយចំណុចគន្លឹះទៅកាន់ប្រជាពលរដ្ឋឱ្យងាកមកគោរព និងអនុវត្តច្បាប់ស្តីពីសុវត្ថិភាពចរាចរណ៍ ផ្លូវគោកនៅកម្ពុជា។
លោកស្រី អគ្គលេខាធិការកាកបាទក្រហមកម្ពុជាបានកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះប្រធានគណៈកម្មាធិការសាខាកាកបាទក្រហមកម្ពុជា ខេត្តព្រះសីហនុ និងអ្នកពាក់ព័ន្ធទាំងអស់ ដែលបានស្ម័គ្រចិត្តឥតឈប់ឈរលះបង់ពេលវេលាដ៏មមាញឹក និងមានតម្លៃ ចូលរួមចំណែកបំពេញនូវសកម្មភាពមនុស្សធម៌ ចូលរួមឧបត្ថម្ភ គាំទ្រការងារអប់រំ ផ្សព្វផ្សាយអំពីសុវត្ថិភាពចរាចរណ៍ក្នុងបរិបទនៃការរីករាលដាលនៃជំងឺកូវីដ ១៩ និងជួយសម្រាលទុក្ខលំបាករបស់ប្រជាពលរដ្ឋងាយរងគ្រោះ។
លោកស្រីបន្តថា ជាមួយគ្នានោះ ក្រុមយុវជនកាកបាទក្រហមកម្ពុជានៃខេត្តព្រះសីហនុបានសម្ដែងនូវសកម្មភាពនៃការអប់រំផ្សព្វផ្សាយអំពីការប្រើប្រាស់មួកសុវត្ថិភាពឱ្យបានត្រឹមត្រូវស្របតាមការណែនាំ និងការតម្រង់ទិសនៃមន្ដ្រីជំនាញការងារ សុវត្ថិភាពចរាចរណ៍ផងដែរ។
លោកស្រីលើកឡើងទៀតថា ជំហានទី ១ នៃការកសាងយុទ្ធសាស្ត្រ ២០២១-២០៣០ សម្រាប់រយៈពេល ១០ ឆ្នាំទៅខាងមុខនឹងចេញជា ២ ដំណាក់កាល គឺដំណាក់កាលទី ១ ពីឆ្នាំ ២០២១-២០២៥ និងដំណាក់កាលទី ២ ២០២៦-២០៣០ ដែលនឹងកំណត់សូចនាករ លទ្ធផលរំពឹងទុក និងពេលវេលាច្បាស់លាស់សម្រាប់អនុវត្ត ហើយដែលត្រូវមានសង្គតិភាពជាមួយនឹងឯកសារគោលនយោបាយតាមវិស័យដទៃទៀតរបស់កាកបាទក្រហមកម្ពុជា។
លោកស្រីថ្លែងថា៖ «យុទ្ធសាស្ត្រនេះមានទស្សនវិស័យ បេសកកម្ម សសរស្តម្ភ និងគុណតម្លៃ ព្រមទាំងបានប្តូរពីវិស័យស្នូល ទៅជាវិស័យអាទិភាពវិញនៅក្នុងយុទ្ធសាស្ត្រនេះ» ។
លោកស្រីអគ្គលេខាធិការបានសង្កត់ធ្ងន់លើការងារពង្រឹង និងពង្រីកកម្លាំងយុវជន និងអ្នកស្ម័គ្រចិត្ត កាកបាទក្រហមកម្ពុជា ស្របតាមអនុស្សរណៈយោគយល់រវាងកាកបាទក្រហមកម្ពុជាជាមួយក្រសួងអប់រំ យុវជន និងកីឡា និងអនុសាសន៍ណែនាំរបស់លោកស្រីបណ្ឌិតប្រធាន លើបរិមាណ និងគុណភាពជាចម្បង។
លោកស្រីបញ្ជាក់ថា៖ «លើកកម្ពស់ និងឱ្យតម្លៃលើភាពលេចធ្លោរបស់សាខា កក្រក រាជធានី ខេត្ត ក្នុងការដឹកនាំ និងសម្របសម្រួលការងារអភិវឌ្ឍន៍យុវជន និងអ្នកស្ម័គ្រចិត្ត កាកបាទក្រហមកម្ពុជា និងតម្រង់ទិសការរៀបចំផែនការអភិវឌ្ឍន៍សាខា កក្រក រាជធានី ខេត្ត ៥ ឆ្នាំ (២០២១-២០២៥) ក្នុងជំហានទី ១ នៃយុទ្ធសាស្ដ្រ ២០២១-២០៣០ របស់កាកបាទក្រហមកម្ពុជា»។
លោក គួច ចំរើន ប្រធានគណៈកម្មាធិការសាខា កាកបាទក្រហមកម្ពុជា ខេត្តព្រះសីហនុ បានមានប្រសាសន៍ថា ទោះបីកម្ពុជាស្ថិតក្នុងបរិការណ៍នៃការរាតត្បាតជំងឺកូវីដ ១៩ ក្នុងនាមអាជ្ញាធរខេត្ត នៅតែបានបន្តចូលរួមចំណែកយ៉ាងសកម្មក្នុងការអនុវត្តយុទ្ធសាស្ត្រចតុកោណ កិច្ចការអភិវឌ្ឍសង្គម និងសេដ្ឋកិច្ចកម្ពុជារបស់រាជរដ្ឋាភិបាល និងផែនការយុទ្ធសាស្ត្រអភិវឌ្ឍន៍នៅថ្នាក់ក្រោមជាតិ ដោយបានសម្រេចនូវសមិទ្ធផលជារូបវ័ន្ត និងអរូបវ័ន្តសំខាន់ៗជាច្រើន។
លោកថា ទន្ទឹមជាមួយគ្នានោះបេសកកម្មបុព្វហេតុការងារមនុស្សធម៌របស់កាកបាទក្រហមកម្ពុជា និយាយដោយឡែកសាខាបានឆ្លើយតបបន្ទាន់ជួយសម្រាលទុក្ខលំបាកប្រជាពលរដ្ឋរងគ្រោះ និងងាយរងគ្រោះដោយគ្រោះមហន្តរាយនានារួមទាំងគ្រោះថ្នាក់ចរាចរណ៍ ការអប់រំសុខភាព និងលើកកម្ពស់សុខភាពប្រជាពលរដ្ឋក្នុងសហគមន៍។ លោកថ្លែងថា៖ «ចាត់តាំងកម្លាំងមន្ត្រីប្រតិបត្តិ អ្នកស្ម័គ្រចិត្ត និងយុវជន កាកបាទក្រហមកម្ពុជា ចូលរួមចំណែកទប់ស្កាត់ការចម្លងវីរុសកូវីដ ១៩ យកអស់កម្លាំងកាយចិត្ត ធ្វើការផ្សព្វផ្សាយ ចំណេះដឹងអំពីវិធានការការពារ និងការងារលើកកម្ពស់គោលការណ៍គ្រឹះ តម្លៃមនុស្សរបស់ចលនា និងការអភិវឌ្ឍស្ថាប័ន អភិវឌ្ឍន៍ធនធាន។ល។»៕