.jpg)
អ្នកនាំពាក្យអង្គភាពប្រឆាំងអំពើពុករលួយ (អ.ប.ព. )ប្រកាសពីការបញ្ជូនខ្លួនជនសង្ស័យ ឈ្មោះ ទូច ទិត្យវឌ្ឍនា មន្ត្រីនាយកដ្ឋានកិច្ចការគតិយុត្ត ពាក្យប្តឹង និងអន្តរជាតិនៃអង្គភាពប្រឆាំងអំពើពុករលួយ ទៅសាលាដំបូងរាជធានីភ្នំពេញ។Anti-Corruption Unit
ភ្នំពេញៈ អ្នកនាំពាក្យអង្គភាពប្រឆាំងអំពើពុករលួយ (អ.ប.ព. )ប្រកាសពីការបញ្ជូនខ្លួនជនសង្ស័យ ឈ្មោះ ទូច ទិត្យវឌ្ឍនា មន្ត្រីនាយកដ្ឋានកិច្ចការគតិយុត្ត ពាក្យប្តឹង និងអន្តរជាតិនៃអង្គភាពប្រឆាំងអំពើពុករលួយ ទៅសាលាដំបូងរាជធានីភ្នំពេញ ដើម្បីបន្តនីតិវិធីច្បាប់នៅថ្ងៃទី ២៨ ខែមករា ឆ្នាំ ២០២២។
យោងតាមលិខិតប្រកាសព័ត៌មានរបស់អង្គភាពប្រឆាំងអំពើពុករលួយដែលភ្នំពេញប៉ុស្តិ៍ទទួលបាននៅថ្ងៃនេះ បានឱ្យដឹងថា ក្រុមស៊ើបអង្កេតផ្ទៃក្នុងនៃអង្គភាពប្រឆាំងអំពើពុករលួយបានធ្វើការប្រមូលព័ត៌មាន ភ័ស្តុតាងជាបន្តបន្ទាប់ព្រមទាំងស្តាប់ចម្លើយរបស់ ឈ្មោះ ទូច ទិត្យវឌ្ឍនា ភេទប្រុស អាយុ ២៧ ឆ្នាំមន្ត្រីនាយកដ្ឋានកិច្ចការគតិយុត្ត ពាក្យប្តឹង និងអន្តរជាតិ រួចមក។ អង្គភាពប្រឆាំងអំពើពុករលួយបានរកឃើញថា ជនរូបនេះបានជាប់សង្ស័យបានប្រព្រឹត្តល្មើសដែលប្បញ្ញាតក្នុងមាត្រា ៥៩២ (បទវីតិក្រម) នៃក្រមព្រហ្មទណ្ឌ និងមាត្រា ៣២ នៃច្បាប់ស្តីពីការប្រឆាំងអំពើពុករលួយ។ អ.ប.ព. បញ្ជាក់ថា ជនសង្ស័យឈ្មោះ ទូច ទិត្យវឌ្ឍនា បានប្រើប្រាស់វិធីនានា ក្នុងពេលដែលខ្លួនកំពុងទទួលខុសត្រូវទទួលពិនិត្យពាក្យប្តឹង ដើម្បីរកប្រយោជន៍ផ្ទាល់ខ្លួនខុសច្បាប់ ហើយពេលដែលខ្លួនត្រូវបញ្ឈរជើងផ្អាកការងារហើយក្តី ក៏ឈ្មោះនេះមិនបានបញ្ឈប់សកម្មភាពខុសច្បាប់របស់ខ្លួន ហើយទាញយកផលប្រយោជន៍ពីពាក្យប្តឹងដែលខ្លួនមិនទទួលបន្ទុកទៀតផង។
អ.ប.ព. សរសេរក្នុងលិខិតថា៖ «អង្គភាពប្រឆាំងអំពើពុករលួយ បានសម្រេចបញ្ជូនខ្លួនជនសង្ស័យខាងលើនៅថ្ងៃទី ២៨ ខែមករា ឆ្នាំ ២០២២ ទៅសាលាដំបូងរាជធានីភ្នំពេញ ដើម្បីបន្តនីតិវិធីច្បាប់»។
អង្គភាពប្រឆាំងអំពើពុករលួយសូមលើកទឹកចិត្តដល់សាធារណជនចូលរួមផ្តល់ព័ត៌មានមកអង្គភាពប្រឆាំងអំពើពុករលួយជាបន្ទាន់ ក្នុងករណីដែលមានជនខិលខូចណាម្នាក់ អះអាងថាខ្លួនអាចប្រើប្រាស់តួនាទីរបស់ខ្លួនជាមន្ត្រី អ.ប.ព. ដើម្បីជួយសម្រួលដល់កិច្ចការល្មើសច្បាប់ណាមួយ ៕
