.jpg)
លោកស្រី អ៊ឹង កន្ថាផាវី ពេលចូលរួមពិធីខួបទី៧៣ឆ្នាំ នៃការបង្កើតសាធារណរដ្ឋឥណ្ឌាពីថ្ងៃ២៨ មករា ។ ហេង ជីវ័ន
ភ្នំពេញៈ ស្ថានទូតឥណ្ឌាប្រចាំកម្ពុជាបានប្រារព្ធទិវាសាធារណរដ្ឋឥណ្ឌាលើកទី៧៣និងប្តេជ្ញាពង្រឹងកិច្ចសហប្រតិបត្តិការប្រកបដោយផ្លែផ្កាបន្ថែមទៀតជាមួយកម្ពុជាដើម្បីជាប្រយោជន៍រវាងប្រទេសនិងប្រជាជនទាំង២ បន្ទាប់ពីបានភ្ជាប់ទំនាក់ទំនងការទូតនឹងគ្នា កាលពីឆ្នាំ ១៩៥២។
ឯកអគ្គរដ្ឋទូតវិសាមញនិងពេញសមត្ថភាពនៃសាធារណរដ្ឋឥណ្ឌាប្រចាំកម្ពុជាលោកស្រី Devyani Khobragade នៅថ្ងៃទី២៦ ខែមករា ឆ្នាំ ២០២២ បានរៀបចំទិវាសាធារណរដ្ឋឥណ្ឌាលើកទី៧៣ (២៦ មករា ឆ្នាំ ១៩៥០) នៅរាជធានីភ្នំពេញ ដោយមានការចូលរួមអបអរសារទរពីគណៈប្រតិភូជាច្រើននៃប្រទេសទាំង២។
នាឱកាសនោះ លោកស្រី Devyani Khobragade បានថ្លែងអំណរគុណចំពោះលោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីដែលបានផ្តល់កិត្តិយសក្នុងឱកាសនេះ ហើយក៏ជាគ្រឹះដ៏រឹងមាំសម្រាប់ទំនាក់ទំនងទ្វេភាគីឥណ្ឌានិងកម្ពុជា ជាពិសេសសម្រាប់ការពង្រឹងកិច្ចខិតខំប្រឹងប្រែងរបស់ឥណ្ឌាក្នុងកិច្ចសហប្រតិបត្តិការអភិវឌ្ឍន៍ និងការពង្រឹងសិទ្ធិអំណាចស្ត្រីនៅកម្ពុជា។
នៅក្នុងពិធីនោះ លោកស្រីបានរៀបរាប់ពីសារៈសំខាន់ពិសេសនៃប្រវត្តិសាស្ត្រឥណ្ឌា ដែលនៅក្នុង ឆ្នាំ១៩៥០ រដ្ឋធម្មនុញ្ញឥណ្ឌាបានចូលជាធរមានដែលធ្វើឱ្យប្រទេសមានភាពឯករាជ្យជាថ្មីនិងក្លាយជាសាធារណរដ្ឋអធិបតេយ្យ និងប្រជាធិបតេយ្យ។
ជុំវិញទំនាក់ទំនងចាស់ទុំរវាងប្រទេសដៃគូអរិយធម៌ទាំង២គឺឥណ្ឌា-កម្ពុជាលោកស្រី Khobragadeបានមានប្រសាសន៍ថាទំនាក់ទំនងនេះមានអាយុកាលជិត២សហស្សវត្សរ៍និងបានបង្កើតចំណងមិត្តភាពដ៏រឹងមាំរវាងប្រជាជននិងវប្បធម៌ទាំង២ជាពិសេសបន្ទាប់ពីរបបខ្មែរក្រហមប្រល័យពូជសាសន៍។
លោកស្រីថា៖«ការអភិវឌ្ឍនៃទំនាក់ទំនងទ្វេភាគីនិងពហុភាគីត្រូវបានផ្តល់ឱ្យជាមួយនឹងគុណសម្បត្តិដែលមិនអាចប្រៀបផ្ទឹមបានហើយឥណ្ឌារំពឹងថា ទំនាក់ទំនងនឹងរីកចម្រើនបន្ថែមទៀតនិងរឹងមាំ នៅក្នុងប៉ុន្មានឆ្នាំខាងមុខ»។
ក្នុងន័យនេះ ស្រីឯកអគ្គរដ្ឋទូតបានលើកឡើងពីការរួមចំណែកសំខាន់ៗមួយចំនួនដែលធ្វើឡើងដោយប្រទេសឥណ្ឌាក្នុងវិស័យកិច្ចសហប្រតិបត្តិការអភិវឌ្ឍន៍ ការកសាងសមត្ថភាព ការស្រាវជ្រាវសុខភាព និងវេជ្ជសាស្ត្រ កិច្ចសហប្រតិបត្តិការរវាងសភាទាំង២ និងការស្ដារឡើងវិញនូវបូជនីយដ្ឋានវប្បធម៌នៅកម្ពុជា រួមទាំងប្រាសាទអង្គរវត្ត ប្រាសាទតាព្រហ្ម និង ប្រាសាទព្រះវិហារ ។ល។
លោកស្រីបានបញ្ជាក់ថា ឥណ្ឌានិងកម្ពុជាក៏បានសន្យាពង្រឹងចំណងមិត្តភាពឱ្យកាន់តែរឹងមាំថែមទៀតខណៈប្រទេសទាំង២បានប្រារព្ធខួបទី៧០ឆ្នាំនៃការបង្កើតទំនាក់ទំនងការទូតរវាងប្រទេសទាំង ២ ចាប់ពីឆ្នាំ ១៩៥២មក។
លោកស្រីថា៖«ឥណ្ឌាប្តេជ្ញាចិត្តយ៉ាងមុតមាំថានឹងធ្វើការយ៉ាងជិតស្និទ្ធក្នុងក្របខ័ណ្ឌទ្វេភាគី ដើម្បីជំរុញទំនាក់ទំនងស្និទ្ធស្នាលនិងកិច្ចសហប្រតិបត្តិការប្រកបដោយផ្លែផ្ការវាងប្រទេសទាំង២ដែលនាំមកនូវផលប្រយោជន៍ទៅវិញទៅមកមិនត្រឹមតែសម្រាប់ឥណ្ឌា និង កម្ពុជា ប៉ុណ្ណោះទេប៉ុន្តែសម្រាប់តំបន់ទាំងមូល»។
ខណៈកម្ពុជាជាប្រធានអាស៊ានសម្រាប់ឆ្នាំនេះលោកស្រីឯកអគ្គរដ្ឋទូត Khobragade មានប្រសាសន៍ថា ឥណ្ឌាទន្ទឹងរង់ចាំការពង្រីកការគាំទ្រដែលអាចធ្វើទៅបានចំពោះអាទិភាពរបស់កម្ពុជាក្នុងឆ្នាំនៃការធ្វើជាប្រធានអាស៊ាន។លោកស្រីក៏បានបញ្ជាក់ពីការរួមចំណែករបស់ឥណ្ឌាដែលមានពលរដ្ឋឥណ្ឌាជិត ៣០០០នាក់ បានរកស៊ីនិងជួយដល់ការផ្លាស់ប្តូរសេដ្ឋកិច្ចនៅកម្ពុជា។
រដ្ឋមន្ត្រីក្រសួងកិច្ចការនារីលោកស្រីអ៊ឹង កន្ថាផាវី ដែលបានចូលរួមក្នុងពិធីទទួលបដិសណ្ឋារកិច្ចក្នុងឋានៈជាប្រធានភ្ញៀវកិត្តិយសបានមានប្រសាសន៍ថាចាប់តាំងពីការបង្កើតទំនាក់ទំនងការទូតនៅឆ្នាំ ១៩៥២ ប្រទេសទាំង២បានរីករាយនិងលើកកម្ពស់ទំនាក់ទំនងមិត្តភាពនិងកិច្ចសហប្រតិបត្តិការទ្វេភាគីជាច្រើនឆ្នាំកន្លងមកដែលនាំមកនូវផលប្រយោជន៍រវាងប្រទេសទាំង២។
លោកស្រីក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនៃប្រទេសឥណ្ឌាសម្រាប់ការប្តេជ្ញាចិត្តនិងការគាំទ្រឥតឈប់ឈរចំពោះកម្ពុជាក្នុងវិស័យនយោបាយនិងសេដ្ឋកិច្ចក្នុងកម្មវិធីជំនួយដែលរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ចសង្គមរបស់កម្ពុជា ដូចជា គម្រោងផលប៉ះពាល់រហ័សក៏ដូចជាផ្តល់អាហារូបករណ៍សម្រាប់និស្សិតកម្ពុជានិងកិច្ចការពារថែរក្សាអភិរក្សសម្បត្តិវប្បធម៌ជាដើម។
លោកស្រី អ៊ឹង កន្ថាផាវី ក៏បានរំឭកផងដែរជាមួយនឹងការវាយតម្លៃខ្ពស់ដែលឥណ្ឌាជាប្រទេសប្រជាធិបតេយ្យដ៏ធំបំផុតបានពង្រីកការទទួលស្គាល់និងការគាំទ្រដល់រដ្ឋាភិបាលកម្ពុជាបន្ទាប់ពីកម្ពុជាត្រូវបានរំដោះចេញពីរបបខ្មែរក្រហមប្រល័យពូជសាសន៍និងការរួមចំណែកយ៉ាងសកម្មរបស់ឥណ្ឌាចំពោះដំណើរការសន្តិភាពនិងការរួមចំណែកក្នុងអំឡុងបេសកកម្មអ៊ុនតាក់នៅកម្ពុជា៕
