.jpg)
មន្ត្រីរដ្ឋបាលខេត្តព្រះសីហនុ ចុះបម្រើសេវាជូនពលរដ្ឋ កាលពីថ្ងៃទី១២ មករា ២០២២។ រូបថត FB
ភ្នំពេញៈ អភិបាលខេត្តព្រះសីហនុ ជំរុញឱ្យពន្លឿនការបម្រើសេវាសាធារណៈជូនពលរដ្ឋ នៅតាមច្រកចេញចូលតែមួយ នៃខេត្ត ក្រុង ស្រុក ក្នុងខេត្តព្រះសីហនុ ឱ្យបានឆាប់រហ័ស ក្នុងឆ្នាំ២០២២នេះ ក្រោយសង្កេតឃើញថា ផ្នែកខ្លះនៅតែមានភាពយឺតយ៉ាវ។
លោកគួច ចំរើន អភិបាលខេត្តព្រះសីហនុ បានដឹកនាំកិច្ចប្រជុំពន្លឿនការផ្តល់សេវានៅច្រកចេញចូលតែមួយខេត្ត ក្រុង ស្រុក ក្នុងខេត្តព្រះសីហនុ កាលពីថ្ងៃទី២៨ ខែមករា ដោយមានការចូលរួមពី លោកអភិបាលក្រុង ស្រុក មន្ទីរ អង្គភាពពាក់ព័ន្ធក្នុងខេត្តព្រះសីហនុជាច្រើនរូប។
ក្នុងកិច្ចប្រជុំនោះ អភិបាលខេត្តព្រះសីហនុ លើកឡើងថា ការផ្តល់សេវាតាមច្រកចេញចូលតែមួយនាពេលបច្ចុប្បន្ននៅមានភាពយឺតយ៉ាវ ដែលត្រូវតែជំរុញ និងពន្លឿនសេវាបម្រើអតិថិជនឱ្យបានលឿន ឆាប់សម្រាប់ឆ្នាំ២០២២នេះ។ ទន្ទឹមនឹងនោះ មន្ត្រីគ្រប់រូបត្រូវធ្វើការបេ្តជ្ញាចិត្តក្នុងការផ្តល់សេវាឱ្យបានលឿន និងមានតម្លាភាព។
លោកថ្លែងថា៖«មន្ត្រីរបស់យើងដែលមានភារកិច្ចទទួលខុសត្រូវ ផ្តល់សេវានៅតាមច្រកចេញចូលតែមួយបម្រើសេវាសាធារណៈជូនអតិថិជនឱ្យបានទាន់ពេលវេលា»។
លោកអភិបាលខេត្តបញ្ជាក់ថា រាជរដ្ឋាភិបាលបានដាក់ចេញនូវគោលនយោបាយកំណែទម្រង់តាមបែបវិមជ្ឈការ និងវិសហមជ្ឈការនៅថ្នាក់ក្រោមជាតិ បានផ្តល់អំណាចដល់ថ្នាក់ក្រោមជាតិ ដើម្បីបម្រើសេវាជូនប្រជាពលរដ្ឋ ហើយមានសេវានៅផ្នែកខ្លះធ្វើបានល្អ។ ក៏ប៉ុន្តែ ផ្នែកខ្លះនៅតែមានការយឺតយ៉ាវ ដូច្នេះ គ្រប់គ្នាត្រូវទទួលខុសត្រូវប្រកបដោយឆន្ទៈក្នុងការដោះស្រាយសេវាជូនពលរដ្ឋទាំងអស់គ្នា។
លោកគួច ចំរើន បញ្ជាក់ថា៖«ហាមដាច់ខាត មិនអនុញ្ញាតឱ្យអតិថិជនកាន់ឯកសារទៅកាន់មន្ទីរ អង្គភាពផ្ទាល់ខ្លួន។ ដូច្នេះមន្ត្រីជួរមុខ និងជួរក្រោយត្រូវកាន់ឯកសារទៅមន្ទីរ អង្គភាពពាក់ព័ន្ធដោយខ្លួនឯង»។
លោកអ៊ុង ឆាលី អភិបាលរង និងជាប្រធានការិយាល័យច្រកចេញចូលតែមួយស្រុកស្ទឹងហាវ ថ្លែងនៅថ្ងៃទី៣០ មករាថា ការិយាល័យច្រកចេញចូលតែមួយដែលលោកគ្រប់គ្រង បានបម្រើសេវាជូនប្រជាពលរដ្ឋដោយយកចិត្តទុកដាក់ និងមិនមានការយឺតយ៉ាងឡើយ។ ក្នុងការិយាល័យមានឧបករណ៍បច្ចេកទេសទំនើបសម្រាប់បំពេញការងារបានលឿនរហ័ស។ ប្រជាពលរដ្ឋមិនបាច់ចំណាយពេលច្រើនក្នុងការរង់ចាំនោះទេ ព្រោះបច្ចុប្បន្នការងារមិនបាច់សរសេរដៃឡើយ គ្រាន់តែចម្លង កូពីហើយបោះត្រាជូនពលរដ្ឋអាចយកទៅប្រើបានភ្លាម។
លោកថ្លែងថា៖«សម្រាប់នៅស្រុកខ្ញុំ អូខេ អត់មានអីត្រូវយឺតទេ។ បើទាក់ទងនឹងសេវាអត្រានុកូលដ្ឋាន សំបុត្រកំណើតអីហ្នឹង ឱ្យបងប្អូនពលរដ្ឋអង្គុយចាំយកតែម្តង»។
លោកអភិបាលរងស្រុកស្ទឹងហាវ ឱ្យដឹងទៀតថា មិនថា តែសេវាសាធារណៈដូចរៀបរាប់មកខាងលើនេះទេ ទោះបីសេវាផ្សេងៗទៀតពាក់ព័ន្ធ វិស័យកសិកម្ម វិស័យដឹកជញ្ជូន និងវិស័យសំណង់ ជាដើម ភាគច្រើន គឺមិនបាច់ឱ្យពលរដ្ឋពិបាកក្នុងការកាន់ឯកសារធ្វើខ្លួនឯងនោះទេ ពោលគឺមន្ត្រីការិយាល័យច្រកចេញចូលតែមួយធ្វើដោយខ្លួនឯង។
លោកថ្លែងថា៖«ភាគច្រើខ្ញុំអត់តម្រូវឱ្យប្រជាពលរដ្ឋធ្វើដោយខ្លួនឯងទេ ច្រើនតែពួកខ្ញុំយកឯកសារហ្នឹងទៅឃុំស៊ីញ៉េតែម្តង។ បើយូរ យូរត្រង់ពេលនៅជំនាញបន្តិច ព្រោះជួនណា គ្នារវល់ឯកសារច្រើន»៕
