.jpg)
លោក កើត រិទ្ធ រដ្ឋមន្ត្រីក្រសួងយុត្តិធម៌ និងក្រុមការងារជំនាញ។ រូបថត ក្រសួងយុត្តិធម៌
ភ្នំពេញៈ ក្រុមការងារនៃអនុគណៈកម្មការចំពោះកិច្ចអនុវត្តផែនការសកម្មភាពការងាររបស់ក្រុមការងារត្រួតពិនិត្យរួមនៃក្រុមប្រទេសអាស៊ីប៉ាស៊ីហ្វិកអំពីកិច្ចសហប្រតិបត្តិការអន្តរជាតិ (អ.អ.ផ.) ដឹកនាំដោយលោក កើត រិទ្ធ រដ្ឋមន្ដ្រីក្រសួងយុត្ដិធម៌ កំពុងពន្លឿនអនុវត្ដបេសកកម្ម ការងារប្រឆាំងការសម្អាតប្រាក់ ដើម្បីឱ្យកម្ពុជាទទួលបានការវាយតម្លៃល្អក្នុងការអនុវត្តការងារនេះ។ នេះបើយោងតាមលោក ជិន ម៉ាលីន អ្នកនាំពាក្យក្រសួងយុត្តិធម៌។
លោក ជិន ម៉ាលីន ថ្លែងថា ការងារប្រឆាំងការសម្អាតប្រាក់នេះជាការងារបន្ទាន់ ពីព្រោះនៅក្នុងខែកុម្ភៈខាងមុខនេះ គឺក្រុមការងារហិរញ្ញវត្ថុនឹងរៀបចំមហាសន្និបាត ហើយនឹងមានការវាយតម្លៃសម្រេចអំពីស្ថានភាព (status) របស់កម្ពុជា ដែលកម្ពុជាបច្ចុប្បន្ន គឺស្ថិតនៅក្នុងបញ្ជីប្រផេះក្នុងការអនុវត្តការងារប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ។
លោកថ្លែងថា៖ «មហាសន្និបាតនេះ នឹងមានការសម្រេចថា តើដាក់កម្ពុជាក្នុងបញ្ជីប្រផេះដដែល ដកកម្ពុជាពីប្រផេះ ឬមួយក៏រុញទៅបញ្ជីខ្មៅ ឬមួយក៏រុញទៅចន្លោះពីប្រផេះ ហើយនិងខ្មៅដែលគេហៅថា Dark Gray។ អ៊ីចឹង យើងមិនដឹងថាគេសម្រេចយ៉ាងម៉េចទេ»។
លោក ម៉ាលីន បញ្ជាក់ថា៖ «អនុគណៈកម្មការចំពោះកិច្ចដឹកនាំដោយឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌នេះ គឺមានភារកិច្ចចាំបាច់បន្ទាន់ ដើម្បីអនុវត្ដនូវផែនការសកម្មភាពទាំងឡាយណាដែលនៅសេសសល់ ដែលយើងមិនទាន់បានបំពេញ ដើម្បីធ្វើម៉េចទប់ស្កាត់ កុំឱ្យកម្ពុជាធ្លាក់ទៅក្នុងបញ្ជីខ្មៅ ដោយធ្វើម៉េចឱ្យនៅក្នុងបញ្ជីប្រផេះនេះដដែល ឬមួយក៏អាចដកខ្លួនចេញពីបញ្ជីប្រផេះ។ នេះជាបេសកកម្មបន្ទាន់របស់ក្រុមការងារចំពោះកិច្ចនេះ»។
លោក កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធានអនុគណៈកម្មការចំពោះកិច្ចអនុវត្តផែនការសកម្មភាពការងាររបស់ក្រុមការងារត្រួតពិនិត្យរួមនៃក្រុមប្រទេសអាស៊ីប៉ាស៊ីហ្វិកអំពីកិច្ចសហប្រតិបត្តិការអន្តរជាតិ (អ.អ.ផ.) កាលពីថ្ងៃទី ២៨ ខែមករា ឆ្នាំ ២០២២ បានដឹកនាំកិច្ចប្រជុំលើកទី ១ របស់អនុគណៈកម្មការចំពោះកិច្ច អ.អ.ផ. ដើម្បីពិនិត្យ និងពិភាក្សាផ្តោតជាសំខាន់ទៅលើរបាយការណ៍ស្តីពីសកម្មភាពការងារ និងបញ្ហាប្រឈមពាក់ព័ន្ធនឹងការប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ។
តាមរយៈកិច្ចប្រជុំនេះ លោក កើត រិទ្ធ បានដាក់ចេញនូវផែនការ និងទិសដៅការងារមួយចំនួនព្រមទាំងបានបែងចែកតួនាទី និងភារកិច្ចដល់អនុប្រធាន និងសមាជិកនៃ អ.អ.ផ. ក្នុងគោលដៅពង្រឹងការអនុវត្តផែនការសកម្មភាពការងារ ដែលត្រូវបានដាក់ចេញដោយ ICRC-JG សំដៅធានាឱ្យកម្ពុជាទទួលបានការវាយតម្លៃល្អក្នុង ការអនុវត្តការងារប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ តាមរយៈការវាយតម្លៃរបស់ ICRC-JG ដែលនឹងប្រព្រឹត្តទៅនៅក្នុងមហាសន្និបាតរបស់ក្រុមការងារហិរញ្ញវត្ថុនាខែកុម្ភៈខាងមុខនេះ។
លោកបានណែនាំឱ្យអនុប្រធាន និងសមាជិកនៃ អ.អ.ផ. ខិតខំបំពេញការងារប្រកបដោយស្មារតីទទួលខុសត្រូវខ្ពស់ ដើម្បីបុព្វហេតុជាតិ និងមាតុភូមិ ក៏ដូចជាពង្រឹងកិច្ចសហការប្រតិបត្តិការរវាងគ្នា និងគ្នាឱ្យកាន់តែល្អបន្តទៀត។
បើតាមក្រសួងយុត្តិធម៌ អនុគណៈកម្មការចំពោះកិច្ចអនុវត្តផែនការសកម្មភាពការងាររបស់ក្រុមការងារត្រួតពិនិត្យរួមនៃក្រុមប្រទេសអាស៊ីប៉ាស៊ីហ្វិកអំពីកិច្ចសហប្រតិបត្តិការអន្តរជាតិ (អ.អ.ផ.) ត្រូវបានបង្កើតឡើងតាមរយៈសេចក្តីសម្រេចលេខ ០០១ សសរ/គសហ ចុះថ្ងៃទី ២១ ខែមករា ឆ្នាំ ២០២២ របស់គណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ។
អ.អ.ផ. មានតួនាទី និងភារកិច្ចចម្បងៗក្នុងការតាមដាន ត្រួតពិនិត្យការអនុវត្តផែនការសកម្មភាពការងាររបស់ ICRC-JG រហូតដល់ប្រទេសកម្ពុជាត្រូវបានដកចេញពីបញ្ជីប្រផេះ។ សិក្សាស្រាវជ្រាវលើប្រភពបញ្ហាដែលបង្កការរាំងស្ទះ និងយឺតយ៉ាវដល់ការអនុវត្តផែនការសកម្មភាពនេះ។ រៀបចំប្រតិបត្តិការស្តង់ដា សម្រាប់មន្ត្រីអនុវត្តច្បាប់ពាក់ព័ន្ធនឹងការងារសម្អាតប្រាក់ និងហិរញ្ញប្បទានភេរវកម្ម និងការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ ព្រមទាំងដឹកនាំ និងត្រួតពិនិត្យការអនុវត្តរបស់ក្រសួងស្ថាប័ន ដែលទទួលខុសត្រូវក្នុងការចូលរួមអនុវត្តច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម និងច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ និងលិខិតបទដ្ឋានគតិយុត្តពាក់ព័ន្ធផ្សេងទៀត។
លោក ជិន ម៉ាលីន បញ្ជាក់ថា៖ «យើងឃើញហើយ កិច្ចប្រជុំមានរៀបចំជាក្រុមការងារ ជាយន្តការ ជាវិធានការ ផែនការសកម្មភាពក្នុងការអនុវត្ដវិធានការដើម្បីបំពេញនូវលក្ខខណ្ឌ ក៏ដូចជាសកម្មភាពមួយចំនួនដែលយើងមិនទាន់បានបំពេញ ដូចជាការពង្រីកធនធានមនុស្សក្នុងការប្រឆាំងបទល្មើសសម្អាតប្រាក់ ការពង្រឹងសមត្ថភាពជំនាញមន្ដ្រីអនុវត្ដច្បាប់របស់យើង ការពង្រឹងវិធានការច្បាប់ និងលទ្ធផលនៃការទប់ស្កាត់ បង្ក្រាបជាក់ស្ដែងពាក់ព័ន្ធទៅនឹងបទល្មើសសម្អាតប្រាក់នេះ»៕
