.jpg)
សកម្មភាពវគ្គបណ្ដុះបណ្ដាលអំណានថ្នាក់ទី ១ ដល់ទីប្រឹក្សាគរុកោសល្យ និងគ្រូបង្រៀនថ្នាក់ទី ១។ រូបថត USAID
ភ្នំពេញៈ គម្រោងអំណានកម្រិតថ្នាក់ដំបូង (IPEA) ដែលទទួលបានមូលនិធិពីទីភ្នាក់ងារជំនួយអាមេរិក (USAID) និងកិច្ចសហការជាមួយក្រសួងអប់រំ យុវជន និងកីឡាបានផ្តល់ការបណ្តុះបណ្តាលអំពីខ្លឹមសារបង្រៀនថ្នាក់ទី ១ ដល់ទីប្រឹក្សាគរុកោសល្យ និងគ្រូបង្រៀនថ្នាក់ទី ១ ជាង ៥០០ នាក់តាមបណ្ដាស្រុកក្នុងខេត្តកំពង់ឆ្នាំង ដើម្បីឱ្យពួកគេមានបច្ចេកទេសលើការបង្រៀនមេរៀនអំណានកម្រិតថ្នាក់ដំបូងដល់សិស្សប្រកបដោយគុណភាព។
លោក ស៊ឹម សុចិន្ដ្រា ប្រធានផ្នែកបណ្ដុះបណ្ដាលនៃគម្រោង អំណានកម្រិតថ្នាក់ដំបូង ថ្លែងប្រាប់ភ្នំពេញប៉ុស្ដិ៍កាលពីពេលថ្មីៗនេះថា គម្រោងអំណានកម្រិតថ្នាក់ដំបូង Inclusive Primary Education Activity (IPEA) បានផ្តល់វគ្គសិក្ខាសាលាបណ្តុះបណ្តាលអំពីខ្លឹមសារបង្រៀនថ្នាក់ទី ១ ជំហាន ១ ជូនដល់ទីប្រឹក្សាគរុកោសល្យចំនួន ៣៤៥ រូបមកពីខេត្តកំពង់ឆ្នាំងរយៈពេល ៤ ថ្ងៃកាលពីថ្ងៃទី ១៨ ដល់ ២១ មករា ឆ្នាំ ២០២២ នេះ។
លោកថ្លែងថា៖ «ការបណ្ដុះបណ្ដាលនេះមានគោលបំណងឱ្យទីប្រឹក្សាគរុកោសល្យបានដឹងអំពីលំនាំ និងបច្ចេកទេសបង្រៀន កម្មវិធីបង្រៀន និងសម្ភារជំនួយក្នុងការបង្រៀនមេរៀនអំណានរបស់គ្រូថ្នាក់ទី ១ ដោយហេតុថា ទីប្រឹក្សាគរុកោសល្យនឹងត្រូវចុះជួយគាំទ្រគ្រូថ្នាក់ទី ១ ឱ្យបង្រៀនមេរៀនអំណានតាមការណែនាំរបស់គម្រោងអំណានកម្រិតថ្នាក់ដំបូងរបស់យើង»។
លោក សុចិន្ដ្រា បានឱ្យដឹង វគ្គបណ្តុះបណ្តាលនេះក៏មានវត្តមានរបស់មន្ត្រីអប់រំបច្ចេកទេសមកពីការិយាល័យអប់រំ ស្រុក និងមន្ទីរអប់រំខេត្ត ខណៈដែលទីប្រឹក្សាគរុកោសល្យ ដែលមកពី ៧ ស្រុក និងក្រុង ១ រួមមាន ស្រុកកំពង់ត្រឡាច ស្រុកសាមគ្គីមានជ័យ ស្រុកទឹកផុស ស្រុកជលគិរី ស្រុកកំពង់លែង ស្រុករលាប្អៀរ ស្រុកបរិបូណ៌ និងក្រុងកំពង់ឆ្នាំង។ គម្រោងនេះត្រូវបានផ្តល់មូលនិធិដោយទីភ្នាក់ងារជំនួយអាមេរិក USAID ធ្វើការគាំទ្រនូវការដាក់ឱ្យអនុវត្តទូទាំងប្រទេសនូវកម្មវិធីកុមាររៀនកុមារចេះ ដោយសហការជាមួយក្រសួងអប់រំ យុវជន និងកីឡា និងដៃគូអភិវឌ្ឍន៍ជាច្រើនទៀត។
លោកថ្លែងថា៖ «គម្រោងនៅក្នុងឆ្នាំនេះយើងផ្ដោតលើកម្រិតអំណានថ្នាក់ទី ១ ដើម្បីឱ្យកុមារពូកែអានមានបំណិនអានច្បាស់លាស់ចាប់ពីថ្នាក់ទី ១ ឡើងទៅ គឺគម្រោងបានបណ្ដុះបណ្ដាលគ្រូថ្នាក់ទី ១ ឱ្យគាត់យល់ច្បាស់អំពីវិធីនៅក្នុងការបង្រៀនកុមារ រាប់តាំងពីរៀនសូររហូតដល់ការអាន។ យើងមានគោលបំណងឱ្យកុមារកម្ពុជា សិក្សាថ្នាក់បឋមសិក្សាដែលមាន និងមិនមានពិការភាពទាំងអស់ទទួលបានជំនាញអំណានកម្រិតថ្នាក់ដំបូងដែលប្រកបដោយគុណភាព»។
លោកបានឱ្យដឹងថា គម្រោង IPEA និងអង្គការដៃគូកាលពីថ្ងៃទី ៣ ដល់ទី ៦ មករា ២០២២ កន្លងទៅក៏បានផ្តល់វគ្គបណ្តុះបណ្តាលតម្រង់ទិសដល់លោកគ្រូអ្នកគ្រូបង្រៀនថ្នាក់ទី ១ ចំនួន ២១៩ រូបដែលមកពីស្រុកចំនួន ៥ ក្នុងខេត្តកំពង់ឆ្នាំង ដែលរួមមាន ស្រុកកំពង់ត្រឡាច ស្រុកទឹកផុស ស្រុកបរិបូណ៌ ស្រុកជលគីរី និងក្រុងកំពង់ឆ្នាំងផងដែរ។ បន្ទាប់ពីវគ្គបណ្តុះបណ្តាល សិក្ខាកាមទាំងអស់នឹងត្រូវយកវិធីសាស្ត្រទាំងនោះដើម្បីបង្រៀនសិស្សរបស់គាត់។
លោក ស៊ឹម ប្រិម ប្រធានមន្ទីរអប់រំ យុវជន និងកីឡា ខេត្ដកំពង់ឆ្នាំងថ្លែងកាលពីថ្ងៃទី ២៧ មករានេះថា តាមរយៈ គម្រោង IPEA បានជួយបណ្ដុះបណ្ដាលដល់ទីប្រឹក្សាគរុកោសល្យមកពីសាលារៀននៅតាមបណ្ដាស្រុកគោលដៅលើបច្ចេកទេសក្នុងការបង្រៀន និងរៀនដល់សិស្ស ហើយទីប្រឹក្សាគរុកោលស្យនឹងបន្តចែករំលែកចំណេះដឹងទាំងនេះទៅដល់លោកគ្រូ អ្នកគ្រូនៅតាមសាលារៀនដទៃទៀតនៅតាមមូលដ្ឋានដោយផ្ទាល់។
លោកថ្លែងថា៖ «គម្រោងនេះបានចាប់ផ្ដើមបណ្ដុះបណ្ដាលដល់ទីប្រឹក្សាគរុកោស្យតាមបណ្ដាស្រុកគោលដៅតាំងពីចុងខែធ្នូឆ្នាំ ២០២១ មកម្ល៉េះ ឥឡូវគម្រោងកំពុងបណ្ដុះបណ្ដាលលើបច្ចេកទេសនេះដល់លោកគ្រូអ្នកគ្រូនៅតាមសាលាបន្តទៀតជាជំហានៗ»។
លោក ស៊ឹម ប្រិម បានឱ្យដឹងថា តាមរយៈគម្រោងបណ្ដុះបណ្ដាលនេះ លោកគ្រូអ្នកគ្រូទទួលបានបច្ចេកទេសក្នុងការបង្រៀនសិស្សថ្នាក់ទី ១ បានល្អប្រសើរជាងមុន ហើយជំហានបន្ទាប់ទៀត គម្រោងនឹងបន្តបណ្ដុះបណ្ដាលបច្ចេកទេសអំណានកម្រិតថ្នាក់ដំបូងនេះទៅដល់ឪពុកម្ដាយ អ្នកអាណាព្យាបាលកុមារថែមទៀត។
លោក តាន់ ប៊ុនហុង ប្រធានមន្ទីរអប់រំ យុវជន និងកីឡា ខេត្ដកំពង់ធំ បានឱ្យដឹងថា កាលពីឆ្នាំ ២០២១ គម្រោង IPEA បានជួយបណ្ដុះបណ្ដាលដល់ទីប្រឹក្សាគរុកោសល្យ និងលោកគ្រូអ្នកគ្រូថ្នាក់ទី ១ និងថ្នាក់ទី ២ នៅក្នុងខេត្ដកំពង់ធំ។ តាមរយៈគម្រោងនេះ គឺបានបណ្ដុះបណ្ដាលគ្រូនៅតាមស្រុកទៅតាមសៀវភៅណែនាំស្ដីអំពីអំណានកម្រិតថ្នាក់ដំបូងដែលរៀបចំដោយក្រសួងអប់រំ ដើម្បីពង្រឹងសមត្ថភាពលើការបង្រៀនដល់លោកគ្រូអ្នកគ្រូ។
លោកថ្លែងថា៖ «ទីប្រឹក្សាគរុកោសល្យគម្រោងបានជ្រើសរើសគ្រូឧទ្ទេសពីសាលាគរុកោសល្យពីមន្ទីរអប់រំ និងពីការិយាល័យរបស់មន្ទីរអប់រំ និងពីការិយាល័យអប់រំស្រុកយកមកបណ្ដុះបណ្ដាលបំប៉នជំហានដំបូងមុននឹងឱ្យពួកគេបណ្ដុះបណ្ដាលបន្តទៅដល់គ្រូបង្រៀនថ្នាក់ទី ១ ថ្នាក់ទី ២ នៅតាមសាលារៀន»។
លោក ប៊ុនហុង បានឱ្យដឹងថា តាមរយៈគម្រោងនេះគឺបានបណ្ដុះបណ្ដាលដោយពង្រឹងទៅលើវិធីសាស្ដ្រចំនួន ៣ គឺទី ១ គឺគ្រូអាន ទី ២ គ្រូ និងសិស្សអាន និងទី ៣ សិស្សអាន ដើម្បីឱ្យការបង្រៀន និងការរៀនមានភាពសកម្ម។
យោងតាមឯកសារស្តីពីគម្រោងគាំទ្រភាសាខ្មែរថ្នាក់ដំបូងរបស់ USAID បានឱ្យដឹងថា ទោះបីជាមានការកែទម្រង់ការអប់រំយ៉ាងខ្លាំងក៏ដោយ ប្រទេសកម្ពុជានៅតែប្រឈមក្នុងការធានានូវលទ្ធផលសិក្សារបស់សិស្សឱ្យកាន់តែប្រសើរនៅទូទាំងប្រទេស។
យោងតាមការវាយតម្លៃនាពេលថ្មីៗនេះបានបង្ហាញថា មានត្រឹមតែ ៣២% ប៉ុណ្ណោះនៃសិស្សប្រុសថ្នាក់ទី ៣ មានចំណេះដឹងភាសាខ្មែរ បើប្រៀបធៀបទៅនឹងសិស្សស្រីចំនួន ៥៨%។ ខណៈពេលដែលមានត្រឹមតែ ៨% នៃសិស្សដែលមានអាយុ ១៥ ឆ្នាំទទួលបានចំណេះដឹងអប្បបរមានៃជំនាញអំណាន និងចំនួន ១០% នៃសិស្សដែលទទួលបានកម្រិតអប្បបរមានៃចំណេះដឹងលើមុខវិជ្ជាគណិតវិទ្យា។
បើតាម USAID គម្រោងគាំទ្រភាសាប៉ុន្តែថ្នាក់ដំបូង បង្កើនធនធានតាមរយៈភាពជាដៃគូជាមួយក្រសួងអប់រំ យុវជន និងកីឡា អង្គការមិនមែនរដ្ឋាភិបាលជាតិ និងអន្តរជាតិ និងដៃគូអភិវឌ្ឍន៍ដើម្បីសម្រេចបាននូវលទ្ធផលទ្រង់ទ្រាយធំ និងផលប៉ះពាល់កម្រិតជាតិលើការសិក្សាថ្នាក់ដំបូង។ គម្រោងនេះផ្តោតលើកិច្ចអន្តរាគមន៍ ដើម្បីសម្រេចបាននូវលទ្ធផលសំខាន់ៗ ដូចជា ទី ១ កែលម្អការបង្រៀនអក្ខរកម្មថ្នាក់ដំបូងផ្អែកលើភ័ស្តុតាងប្រកបដោយបរិយាប័ន្ន ទី ២ ពង្រឹងភាពជាដៃគូក្នុងការលើកកម្ពស់កិច្ចសហការ ការសម្របសម្រួល និងក្រុមការងាររវាងដៃគូដែលគាំទ្រដល់ការសិក្សាថ្នាក់ដំបូងប្រកបដោយបរិយាប័ន្ន និង ទី ៣ បង្កើត និងអនុវត្តផែនការសាកល្បង និងពង្រីកកម្មវិធីសិក្សាថ្នាក់ដំបូងផ្អែកលើភ័ស្តុតាងរបស់ក្រសួងអប់រំ៕
