.jpg)
ទិដ្ឋភាពនៃខេត្តព្រះសីហនុជាមួយនឹងផ្ទៃសមុទ្រខៀវស្រងាត់ អមដោយអគារខ្ពស់ត្រដែត។ រូបថត រ៉ាស់ហ៊ីម
ព្រះសីហនុៈ ក្រសួងរៀបចំដែនដី និងរដ្ឋបាលខេត្តព្រះសីហនុ ពិភាក្សាគ្នាលើសេចក្តីព្រាងគោលនយោបាយប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង ខណៈរដ្ឋាភិបាលកំណត់ចក្ខុវិស័យឆ្នាំ ២០៣៨ អភិវឌ្ឍខេត្ដនេះជាទីក្រុងអាស៊ាននៃប៉ូលអភិវឌ្ឍន៍ជាតិប្រកបដោយចីរភាពជាមជ្ឈមណ្ឌលកំណើនសេដ្ឋកិច្ចជាតិ និងច្រកចេញចូលអន្តរជាតិមានទំនាក់ទំនងជាមួយទីផ្សារអាស៊ាន និងសកលលោក។
កិច្ចពិភាក្សានេះត្រូវបានធ្វើឡើងកាលពីថ្ងៃទី ២៤ ខែមករា ក្នុងសិក្ខាសាលាមួយស្តីអំពីសេចក្តីព្រាងគោលនយោបាយគ្រប់គ្រងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង។ សិក្ខាសាលានេះក៏មានការចូលរួមពីតំណាងអភិបាលខេត្តជាប់មាត់សមុទ្រ រួមមាន ខេត្តកោះកុង កំពត និងខេត្តកែប ព្រមទាំងមន្ត្រីមកពីស្ថាប័នក្រោមឱវាទជាច្រើនរូបទៀត។
លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ថ្លែងក្នុងពិធីនេះថា ផ្អែកលើក្របខ័ណ្ឌនៃការសិក្សាស្រាវជ្រាវទិន្នន័យតាមរយៈកំណែទម្រង់ និងយុទ្ធសាស្ត្រអភិវឌ្ឍន៍ជាតិ យុទ្ធសាស្ត្រចតុកោណដំណាក់កាលជាបន្តបន្ទាប់ ឆ្លើយតបការផ្លាស់ប្ដូរ ការរីកចម្រើនសេដ្ឋកិច្ចមានសក្តានុពលក្នុងការលើកកម្ពស់សេដ្ឋកិច្ចកម្ពុជា ស្របតាមនិន្នាការតំបន់ និងពិភពលោក។ រាជរដ្ឋាភិបាលក៏បានដាក់ចេញនូវគោលនយោបាយអភិវឌ្ឍន៍វិស័យឧស្សាហកម្ម ដោយកំណត់ប្រែក្លាយខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង។
លោកបានថ្លែងថា៖ «គោលនយោបាយគ្រប់គ្រង ប្រើប្រាស់ដី ដើម្បីអភិវឌ្ឍខេត្តព្រះសីហនុ មានគោលដៅរៀបចំគោលនយោបាយគ្រប់គ្រងវិស័យដីធ្លី ក្នុងនេះមានអនុវិស័យរដ្ឋបាលដីធ្លី អនុវិស័យរៀបចំដែនដី អនុវិស័យបែងចែកដីធ្លី លំនៅឋាន ការគ្រប់គ្រង និងអភិវឌ្ឍវិស័យសំណង់ ការគ្រប់គ្រងអភិវឌ្ឍន៍តំបន់ឆ្នេរសមុទ្រកម្ពុជាក្នុងខេត្តព្រះសីហនុទាមទារឱ្យមានការចូលរួមយ៉ាងសកម្មពីវិស័យពាក់ព័ន្ធ»។
លោករដ្ឋលេខាធិការបានឱ្យដឹងថា ការគ្រប់គ្រង ការប្រើប្រាស់ដីធ្លី និងធនធានធម្មជាតិ និងធ្វើសមាហរណកម្មវិស័យពាក់ព័ន្ធដីធ្លីផ្អែកលើមូលដ្ឋានគោលនយោបាយដីធ្លី សៀវភៅដីធ្លី គោលនយោបាយជាតិស្តីពីការរៀបចំដែនដីនៃព្រះរាជាណាចក្រកម្ពុជា។
បើតាមលោក ប៉ែន សុផល គោលនយោបាយអភិវឌ្ឍន៍ប្រើប្រាស់ដីខេត្តព្រះសីហនុមានគោលដៅតម្រង់ទិស កំណត់ការគ្រប់គ្រងប្រើប្រាស់តាមបែបគំរូថ្មី ផ្អែកលើកត្តាភូមិសាស្ត្រនៃតំបន់ឆ្នេរសមុទ្រកម្ពុជា កត្តាធនធានធម្មជាតិ បរិស្ថាន វប្បធម៌ និងតម្រូវការវិវឌ្ឍន៍សេដ្ឋកិច្ចសង្គមស្របតាមគោលនយោបាយ ច្បាប់ បទដ្ឋានគតិយុត្ត ព្រមទាំងការសិក្សាស្រាវជ្រាវពីអន្តរជាតិ មានកូរ៉េខាងត្បូង ចក្រភពអង់គ្លេស ហូឡង់ ម៉ាឡេស៊ី ជប៉ុន ចិន ម៉ូណាកូ ជាដើម។
លោកបានថ្លែងថា៖ «សម្រាប់ជាចក្ខុវិស័យ គោលនយោបាយកំណត់ឆ្នាំ ២០៣៨ មានរយៈពេល ១៥ ឆ្នាំខាងមុខទៀត ដែលជាសសរស្តម្ភដល់វិស័យពាក់ព័ន្ធអភិបាលកិច្ចល្អទាក់ទាញអ្នកវិនិយោគ និងការបង្ការគ្រោះមហន្តរាយ ព្រមទាំងផែនការសកម្មភាពទាំង ៨១ ដែលជាវិធានការគោលនយោបាយសម្រេចគោលដៅប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង»។
អភិបាលខេត្តព្រះសីហនុលោក គួច ចំរើន បង្ហាញការគាំទ្ររាជរដ្ឋាភិបាលចំពោះផែនការប្រែក្លាយខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង។ លោក ក៏បានថ្លែងអំណរគុណចំពោះលោក ហ៊ុន សែន ប្រមុខរាជរដ្ឋាភិបាលកម្ពុជាដែលបានផ្តល់ការគាំទ្រក្នុងការអភិវឌ្ឍពហុវិស័យនៅខេត្តព្រះសីហនុ ដើម្បីធ្វើឱ្យក្លាយទៅជាខេត្តនៃកំណើនសេដ្ឋកិច្ចរបស់ប្រទេសកម្ពុជា។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុថ្លែងនៅថ្ងៃទី ២៧ ខែមករា ថា សេចក្តីព្រាងគោលនយោបាយការប្រើប្រាស់ដីធ្លីនៅខេត្តព្រះសីហនុ បានកំណត់ចំណុចគោលចំនួន ៧ ដើម្បីអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង។ ទី ១ គោលនយោបាយអភិវឌ្ឍន៍វិស័យឧស្សាហកម្មកម្ពុជាប្រែក្លាយ ខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង។
ទី ២ ចក្ខុវិស័យឆ្នាំ ២០៣៨ ខេត្តព្រះសីហនុត្រូវបានគ្រប់គ្រង ប្រើប្រាស់បែងចែក និងអភិវឌ្ឍប្រកបដោយសមធម៌ តម្លាភាព ប្រសិទ្ធភាព អភិវឌ្ឍន៍ខេត្តជាតំបន់សេដ្ឋកិច្ចពិសេសគំរូពហុបំណង ជាទីក្រុងអាស៊ាននៃប៉ូលអភិវឌ្ឍន៍ជាតិប្រកបដោយចីរភាព ជាមជ្ឈមណ្ឌលកំណើនជាតិ មជ្ឈមណ្ឌលហិរញ្ញវត្ថុអន្តរជាតិ ច្រកចេញចូលអន្តរជាតិ មជ្ឈមណ្ឌលភ័ស្តុភាជាតិ មានទំនាក់ទំនងជាមួយទីផ្សារអាស៊ាន និងសកលលោក។
ទី ៣ គោលបំណង ប្រើប្រាស់ដីធ្លី ការបែងចែកដី ការអភិវឌ្ឍដែនដីនគរូបនីយកម្ម អភិវឌ្ឍន៍ខេត្តប្រកបដោយប្រសិទ្ធភាព និងបរិយាបន្នមានភាពទាក់ទាញ និងឧត្ដមភាពប្រកួតប្រជែងសំដៅ រួមចំណែកប្រែក្លាយកម្ពុជាជាប្រទេសមានចំណូលមធ្យមកម្រិតខ្ពស់។ ទី ៤ យុទ្ធសាស្ត្រ អនុវិស័យរដ្ឋបាលដីធ្លី អនុវិស័យរៀបចំដែនដី ការគ្រប់គ្រង ការអភិវឌ្ឍតំបន់ឆ្នេរសមុទ្រកម្ពុជា អនុវិស័យបែងចែកដីធ្លី ការគ្រប់គ្រង និងអភិវឌ្ឍន៍វិស័យសំណង់។ យុទ្ធសាស្ត្រសមាហរណកម្មវិស័យពាក់ព័ន្ធទៅនឹងដីធ្លី ការពង្រឹងការគ្រប់គ្រងអភិបាលកិច្ចល្អ និងស្ថាប័នយុទ្ធសាស្ត្រទាក់ទាញការវិនិយោគ និងធនធានការគ្រប់គ្រងហានិភ័យសំខាន់ៗ និងបង្ការគ្រោះមហន្តរាយធម្មជាតិ។
ទី ៥ ផែនការសកម្មភាពអភិវឌ្ឍន៍ខេត្តព្រះសីហនុរយៈពេលខ្លី (២០២១-២០២៥) រយៈពេល មធ្យម ( ២០២៥-២០៣០) រយៈពេលវែង (២០៣០-២០៣៨)។ ទី ៦ ក្របខ័ណ្ឌអនុវត្ត និងយន្តការដឹកនាំសម្របសម្រួល តាមដាន វាយតម្លៃ ធានាប្រសិទ្ធភាពនៃការអនុវត្តគោលនយោបាយគ្រប់គ្រង និងប្រើប្រាស់ដីធ្លី អង្គភាពថ្នាក់ជាតិ និងថ្នាក់ខេត្ត។ ក្រសួងស្ថាប័នពាក់ព័ន្ធត្រូវរៀបចំផែនការសកម្មភាព ដើម្បីអនុវត្តតាមដានវាយតម្លៃត្រួតពិនិត្យ ឆ្លើយតបទៅនឹងយុទ្ធសាស្ត្រតាមវិស័យក្នុងការគ្រប់គ្រងដីធ្លី និងធនធានធម្មជាតិឱ្យមាននិរន្តរភាពស្របតាមចក្ខុវិស័យនៃគោលនយោបាយ។
ទី ៧ សេចក្តីសន្និដ្ឋាន សកម្មភាពទាំងនេះត្រូវប្រើប្រាស់ជាមូលដ្ឋានសម្រាប់រៀបចំសកម្មភាពរបស់អង្គភាពថ្នាក់ជាតិ និងថ្នាក់ក្រោមជាតិ តាមដានត្រួតពិនិត្យធានាបាននូវការអនុវត្តប្រកបដោយការទទួលខុសត្រូវប្រសិទ្ធភាពពីក្រសួងស្ថាប័នពាក់ព័ន្ធ វិស័យឯកជន និងប្រជាពលរដ្ឋសំដៅសម្រេចឱ្យបានចក្ខុវិស័យ ដើម្បីធានានូវការអភិវឌ្ឍសេដ្ឋកិច្ចសង្គមជាក់ស្ដែង៕
