.jpg)
មន្ត្រីបក្សខ្មែរស្រឡាញ់ជាតិក្នុងពិធីសមាជពីថ្ងៃទី ៣០ មករា។ រូបថត សហការី
ភ្នំពេញៈ សមាជគណបក្សខ្មែរស្រឡាញ់ជាតិ បោះឆ្នោតផ្តល់សេចក្តីទុកចិត្តឱ្យលោក ជីវ កត្តា ជាប្រធានបក្សដឹកនាំចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥ ឆ្នាំ ២០២២ ឯគណបក្សហ៊្វុនស៊ិនប៉ិច គ្រោងរៀបចំធ្វើសមាជ នៅថ្ងៃទី ៩ កុម្ភៈ ដើម្បីបោះឆ្នោតជ្រើសរើស ព្រះអង្គម្ចាស់ នរោត្តម ចក្រាវុធ ធ្វើជាព្រះប្រធានគណបក្ស។
សេចក្តីប្រកាសព័ត៌មានរបស់បក្សខ្មែរស្រឡាញ់ជាតិ ក្រោយបញ្ចប់សមាជនាថ្ងៃទី ៣០ មករា ឱ្យដឹងថា អង្គសមាជបានបោះឆ្នោតផ្តល់សេចក្តីទុកចិត្តដល់បេក្ខភាពលោក ជីវ កត្តា ជាប្រធានគណបក្ស លោក តាន់ ទីន ជាអនុប្រធានប្រចាំការ លោក កង គឹមហាក់ និងលោក ខឺយ ស៊ីនឿន ជាអនុប្រធានគណបក្ស។
បើតាមសេចក្តីប្រកាសព័ត៌មាន អង្គសមាជបោះឆ្នោតអនុម័តលក្ខន្តិកៈគណបក្ស បោះឆ្នោតផ្តល់សេចក្តីទុកចិត្តដល់បេក្ខភាពគណៈកម្មាធិការនាយកគណបក្សចំនួន ៤៥ រូប បោះឆ្នោតផ្តល់សេចក្តីទុកចិត្តដល់បេក្ខភាពសមាសភាពគណៈកម្មាធិការអចិន្រៃ្តយ៍គណបក្សចំនួន ៨ រូប កំណត់ទិសដៅការងារ និងគោលនយោបាយបក្សសម្រាប់ការបោះឆ្នោតជ្រើសរើសក្រុមប្រឹក្សា ឃុំ/សង្កាត់ ឆ្នាំ ២០២២ និងកំណត់អំពី វិស័យសំខាន់ៗសម្រាប់រៀបចំគោលនយោបាយគណបក្ស។
លោក ខឺយ ស៊ីនឿន អនុប្រធានគណបក្សខ្មែរស្រឡាញ់ជាតិថ្លែង ក្រោយបញ្ចប់សមាជថា ការធ្វើសមាជ ដើម្បីជ្រើសរើសក្បាលម៉ាស៊ីនដឹកនាំរបស់គណបក្សចូលរួមបោះឆ្នោតជ្រើសរើសក្រុមប្រឹក្សា ឃុំ-សង្កាត់ នៅថ្ងៃទី ៥ ខែមិថុនា ឆ្នាំ ២០២២។ ពេលនេះ គណបក្សរៀបចំបេក្ខជនឃុំបានចំនួន ៥២ ភាគរយនៅទូទាំងប្រទេសក្នុងនោះក៏មានការអនុវត្តគោលនយោបាយឃុំសង្កាត់រួចហើយដែរ។
លោករំពឹងថា គណបក្សនឹងឈ្នះអាសនៈឃុំ-សង្កាត់ច្រើន ពីព្រោះចរន្តនយោបាយរបស់ប្រជាពលរដ្ឋ និងអ្នកដែលចូលរួមជាមួយគណបក្សខ្មែរស្រឡាញ់ជាតិសុទ្ធសឹងតែអតីតក្រុមប្រឹក្សា-ខេត្ត ក្រុមប្រឹក្សាស្រុក ឃុំ-សង្កាត់ រួមនឹងអ្នកគាំទ្រទាំងអស់របស់អតីតបក្សសង្គ្រោះជាតិ។ នេះ ជាមូលដ្ឋានគ្រឹះដែលខ្មែរស្រឡាញ់ជាតិ ទទួលបានកៅអីឃុំ-សង្កាត់ច្រើន សម្រាប់ការបោះឆ្នោតនៅពេលខាងមុខ។ លោកថ្លែងថា៖ «គណបក្សខ្មែរស្រឡាញ់ជាតិបានប្រកាសជំហរស្មារតីនៃគណបក្សសង្គ្រោះជាតិរបស់ខ្លួនតាំងពីថ្ងៃទី ២ ខែមករា ២០២២។ ជាគោលការណ៍ច្បាប់ គឺមិនខុសទេ។ យើងបន្តស្មារតីរបស់គណបក្សសង្គ្រោះជាតិដែលប្រជាពលរដ្ឋចង់បានការផ្លាស់ប្តូរដឹកនាំ។ មានន័យថា យើងមិនបន្តគណបក្សសង្គ្រោះជាតិទេ»។
បើតាមលោក ខឺយ ស៊ីនឿន គណបក្សខ្មែរស្រឡាញ់ជាតិមានប៉ូល ២ ដែលគណបក្សផ្សេងៗមិនមាននោះទេ។ ព្រោះថ្នាក់ដឹកនាំមួយចំនួនរបស់បក្សរួមមានលោក ជីវ កក្តា ជាអតីតតំណាងរាស្ត្រគណបក្សសមរង្ស៊ី និងអតីតតំណាងរាស្ត្ររបស់អតីតគណបក្សសង្គ្រោះជាតិ លោក តាន់ ទីន ជាអតីតមន្ត្រីគណបក្សសញ្ជាតិខ្មែរ គណបក្ស សមរង្ស៊ី និងគណបក្សសង្គ្រោះជាតិ។ រីឯលោក កង កឹម ហាក់ ជាអតីតតំណាងរាស្ត្រគណបក្សសង្គ្រោះជាតិ និងជាមន្ត្រីរបស់គណបក្សសិទ្ធិមនុស្ស និងលោក ខឺយ ស៊ីនឿន អតីតសមាជិកគណៈកម្មាធិការនាយកនៃបក្សសិទ្ធិមនុស្ស និងមកពីសង្គ្រោះជាតិ ជាដើម។
ដោយឡែក លោក ញឿន រ៉ាដែន អ្នកនាំពាក្យបក្សហ៊្វុនស៊ិនប៉ិច ប្រាប់ភ្នំពេញប៉ុស្តិ៍នៅថ្ងៃទី ៣០ មករា ថា គណបក្សហ៊្វុនស៊ិនប៉ិច នឹងរៀបចំសមាជរបស់ខ្លួននៅថ្ងៃទី ៩ កុម្ភៈ ហើយនឹងមានអ្នកចូលរួមប្រមាណ ៥០០ នាក់មកពីថ្នាក់ខេត្ត ស្រុក និងក្រុមការងារ ដើម្បីបោះឆ្នោតថ្វាយព្រះអង្គម្ចាស់នរោត្តម ចក្រាវុធ ដែលជាព្រះរាជបុត្ររបស់សម្តេចក្រុមព្រះ នរោត្តម រណឫទ្ធិ ធ្វើជាព្រះប្រធានដឹកនាំគណបក្ស។ ការធ្វើសមាជបោះឆ្នោតថ្វាយព្រះអង្គម្ចាស់នរោត្តម ចក្រាវុធ ធ្វើជាព្រះប្រធានស្របតាមបំណងចុងក្រោយរបស់សម្តេចក្រុមព្រះ នរោត្តម រណឫទ្ធិ ដែលជាអតីតព្រះប្រធានបក្សហ៊្វុនស៊ិនប៉ិច និងដើម្បីចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ ២០២២។
លោកថ្លែងថា៖ «បើសិនជាយើង នៅតែបន្តបង្អែបង្អង់ទៀត វាកាន់តែយូរ ព្រោះការបោះឆ្នោត វាកាន់តែខិតចូលមកកាន់តែជិតហើយ។ គោលដៅនេះ មិនរាថយនោះទេ។ ដូចកន្លងមកនេះអ៊ីចឹង ចុះមូលដ្ឋាន គឺយើងចុះមូលដ្ឋាន។ នៅពេលដែលចុះមូលដ្ឋានហើយដល់ម៉ោងដែលយើងមានពេលវេលាសមស្រប ធ្វើសមាជ ធ្វើតែម្តង»។
បើតាម លោក ញឿន រ៉ាដែន ក្រសួងមហាផ្ទៃបានទទួលស្គាល់ព្រះអង្គម្ចាស់ នរោត្តម ចក្រាវុធ រួចហើយ បន្ទាប់ពីត្រូវបានសម្តេចក្រុមព្រះ នរោត្តម រណឫទ្ធិ តែងតាំង ធ្វើជាព្រះអនុប្រធាន និងប្រធានស្តីទីក្នុងការគ្រប់គ្រង។ ដូច្នេះមានតែព្រះអង្គម្ចាស់នរោត្តម ចក្រាវុធទេដែលស្របច្បាប់ និងលក្ខន្តិកៈក្នុងការកោះហៅ និងរៀបចំធ្វើសមាជ។ ក្នុងសមាជនឹងសម្រេចជ្រើសរើសអនុប្រធាន កំណត់នយោបាយរបស់គណបក្ស និងកែលក្ខន្តិកៈមួយចំនួន។
លោក ឈឹម កាន អគ្គនាយករងនៃអគ្គនាយកដ្ឋានរដ្ឋបាលក្រសួងមហាផ្ទៃថា៖ «គណបក្សនីមួយៗបានកំណត់ឆ្នាំ និងពេលវេលាដែលគេត្រូវធ្វើសមាជ នៅក្នុងលក្ខន្តិកៈរបស់គាត់។ ដូរលក្ខន្តិកៈអី គឺដូរបានក្នុងច្បាប់អត់មាន [ហាម] ទេ ប៉ុន្តែបើដូរថ្នាក់ដឹកនាំត្រូវដាក់មកក្រសួងទទួលស្គាល់ផ្លូវការសាជាថ្មី»៕
