សៀមរាបៈ អាជ្ញាធរស្រុកបន្ទាយស្រីសុំការយោគយល់ពីសំណាក់ភ្ញៀវទេសចរក្នុងស្រុកមួយចំនួនដែលមកលេង ឬឆ្លងកាត់ស្រុកបន្ទាយស្រីឈប់ទុកកាកសំណល់សំរាមចោលពាសវាលពាសកាលនៅតាមផ្លូវសាធារណៈ ព្រោះកន្លែងទាំងនេះមិនមែនសម្រាប់សំរាមនោះទេ បើទោះជាគ្មានម្ចាស់នៅនឹងកន្លែងក៏ដោយ។
លោក ឃឹម ហ្វីណង់ អភិបាលស្រុកបន្ទាយស្រីបានឱ្យដឹងតាមរយៈហ្វេសប៊ុកនៅថ្ងៃទី ២៩ ខែមករាថា ជាទម្លាប់ល្អមួយរបស់អ្នកស្រុកបន្ទាយស្រីនៅមុនពេលបុណ្យទានម្តងៗ ដើម្បីត្រៀមខ្លួនស្វាគមន៍អ្នកទេសចរមកកម្សាន្តក្នុងស្រុកតែងដើររើសសំរាមសម្អាតតាមផ្លូវសាធារណៈ និងទីកន្លែងមួយចំនួនដែលភ្ញៀវទេសចរមកឈប់ចត ដើម្បីទទួលទានអាហារ ហើយមិនបានសម្អាតដោយទុកសំរាមនៅពាសវាលពាសកាល។
លោកអភិបាលស្រុកបានបន្តថា អ្នកបន្ទាយស្រីភាគច្រើនឈប់ចោលសំរាមពាសវាលពាសកាលទៀតហើយ ហើយសំរាមក៏លែងសូវមានទៀតដែរ ប៉ុន្តែអ្នកភូមិតែងត្អួញថា ពិបាកតែអ្នកចម្ងាយ អ្នកធ្វើដំណើរឆ្លងកាត់ និងអ្នកទេសចរទេ។ លោកថ្លែងថា៖ «ភាគច្រើនគឺសង្កេតឃើញមាននៅតាមដងផ្លូវសាធារណៈ ទីវាលដីទំនេរដែលអាចឈប់ចតឡាន រ៉ឺម៉ក គោយន្ត ហូបចុករួចហើយពង្រាយស្បោងប្លាស្ទិក ដបទឹកសុទ្ធ និងកញ្ចប់ប្រអប់ស្នោទុកចោលនៅទីនោះដោយឥតសណ្តាប់ធ្នាប់»។
លោក ឃឹម ហ្វីណង់ បានសម្តែងការសោកស្តាយចំពោះភ្ញៀវទេសចរមួយចំនួន និងបានសុំការយោគយល់លើរឿងនេះពីសំណាក់ភ្ញៀវទេសចរក្នុងស្រុកដែលមកលេង ឬឆ្លងកាត់ស្រុកបន្ទាយស្រី។ លោកថា គួរអាណិតដល់គ្នាអ្នករើស និងផ្តល់ការគោរពទៅដល់ទម្លាប់ស្អាតរបស់អ្នកបន្ទាយស្រីផង ជាពិសេសពេលមកលេងបន្ទាយស្រីក្នុងឱកាសបុណ្យចូលឆ្នាំចិនខាងមុខនេះ។
អ្នកស្រី ជ្រីន ស្រីរ័ត្ន អ្នកផ្គត់ផ្គង់ផលិតផលសម្អាតបរិស្ថានថ្លែងនៅថ្ងៃទី ៣០ ខែមករាថា បច្ចុប្បន្នអ្នកស្រីក៏បាននិងកំពុងរក្សាអនាម័យបរិស្ថានក្នុងការទុកដាក់សំរាមដោយសហការជាមួយយុវជនសំរាមដើម្បីរៃថវិកាទិញធុងសំរាមដាក់នៅទីកន្លែងសាធារណៈមួយចំនួន ព្រមទាំងធ្វើសកម្មភាពរើសសំរាមជាគំរូឱ្យប្រជាពលរដ្ឋចូលរួមដើម្បីថែរក្សាភាពស្អាតនៅទីសាធារណៈផងដែរ។
អ្នកស្រីឱ្យដឹងដែរថា ដើម្បីឱ្យប្រជាពលរដ្ឋទុកដាក់សំរាមបានត្រឹមត្រូវដំបូងត្រូវធ្វើជាគំរូ និងអប់រំផ្សព្វផ្សាយឱ្យមានការយល់ដឹង និងចេះប្រើធុងសំរាមជាមុនសិន។ តាមការកត់សម្គាល់របស់អ្នកស្រីផ្ទាល់ឃើញថា បច្ចុប្បន្នមានពលរដ្ឋមួយចំនួនចេះប្រើធុងសំរាម និងទុកដាក់សំរាមបានត្រឹមត្រូវ តែមួយចំនួនទៀតនៅតែបន្តបោះសំរាមចោលពាសវាលពាសកាល។ ហេតុនេះដើម្បីដាស់ស្មារតីដល់អ្នកដែលមិនទាន់មានការភ្ញាក់រឭកឱ្យចូលរួមគឺមានតែចូលរួមផ្សព្វផ្សាយបន្តគ្នាទើបមានការយល់ដឹង។
អុ្នកស្រីថ្លែងថា៖ «យើងធ្វើនូវសកម្មភាពឱ្យគាត់ឃើញថា អ្វីដែលពួកគាត់បានបោះចោលហ្នឹងគឺធ្វើឱ្យមនុស្សមួយក្រុមគ្នាអត់មានពេលសម្រាក អត់បានប្រើពេលវេលាផ្ទាល់ខ្លួន ដើម្បីធ្វើការងារផ្សេងទេ។ អ៊ីចឹងពួកគាត់ត្រូវចំណាយពេលមករើសសំរាមដែលយើងបានចោល អ៊ីចឹងតើយើងគួរភ្ញាក់រឭក ឬអត់ទេថា គេកំពុងតែចំណាយពេលផ្ទាល់ខ្លួនមានតម្លៃរបស់គេមកធ្វើរឿងដើម្បីតែការមិនមានការទទួលខុសត្រូវរបស់យើង»។
អ្នកស្រី ជ្រីន ស្រីរ័ត្ន បានឱ្យដឹងទៀតថា បច្ចុប្បន្ននេះពិតជាមានមនុស្សមួយចំនួនបានភ្ញាក់រឭកក្នុងការបោះសំរាមចោលចំធុងបានត្រឹមត្រូវ ប៉ុន្តែកន្លែងខ្លះគ្មានធុងសំរាម ខណៈកន្លែងខ្លះមានធុងសំរាម ប៉ុន្តែបែរជាត្រូវបានបាត់ទៅវិញ៕
វីដេអូ៖