.jpg)
ពលករខ្មែរនិងខ្លះមានកូនផង បានវិលត្រឡប់មកពីប្រទេសថៃ កាលពីថ្ងៃទី ៣០ មករា តាមច្រកក្នុងភូមិសាស្ត្រស្រុកកំរៀង ខេត្តបាត់ដំបង។ រូបថត ប៉ូលិស
បាត់ដំបងៈ គិតពីថ្ងៃទី ២៩-៣០ មករា ឆ្នាំ ២០២២ មានពលករប្រុស-ស្រី និងក្មេងៗជាកូនពលករ ចំនួន៥១៦នាក់បានឆ្លងដែនត្រឡប់ពីប្រទេសថៃវិញតាមច្រកអូរអន្លក់ឃុំតាសែន ស្រុកកំរៀង ខេត្តបាត់ដំបង។ ឯប្រហែល១០ថ្ងៃមុនរដូវចូលឆ្នាំចិន-វៀតណាម មានពលករប្រុស-ស្រីប្រមាណជិត១០០នាក់បានត្រឡប់មកពីប្រទេសថៃតាមប៉ុស្តិ៍គីឡូ១៣ ក្នុងភូមិអូរ ឃុំសន្តិភាពស្រុកសំពៅលូន។
លោកម៉ង់ ស៊ី មេបញ្ជាការវរសេនាតូច៨១៩ ឈរជើងប្រចាំច្រកអូរអន្លក់ ឃុំតាសែន ស្រុកកំរៀង ខេត្តបាត់ដំបង ឱ្យដឹងនៅថ្ងៃទី៣១ មករា ថា គិតពីថ្ងៃទី២៩ ដល់ថ្ងៃទី៣០ មករា ឆ្នាំ២០២២ មានពលករស្រី-ប្រុស រួមទាំងកូនៗរបស់ពួកគេចំនួន៥១៦នាក់បានឆ្លងដែនវិលត្រឡប់មកពីប្រទេសថៃវិញ។ ក្នុងចំនួនពលករទាំងនេះ មានអ្នកខ្លះទើបតែចាក់វ៉ាក់សាំងការពារជំងឺកូនវីដបាន១ដូស និងពលករខ្លះចាក់វ៉ាសាំងបាន២ដូសពីប្រទេសថៃរួចទៅហើយ។
លោកថ្លែងថា៖«ពលករយើងដែលគាត់ត្រឡប់មកពីប្រទេសថៃវិញ គឺសុទ្ធតែបានចាក់ថ្នាំវ៉ាក់សាំងគ្រប់ៗគ្នាហ្នឹង គ្រាន់តែអ្នកខ្លះទើបតែចាក់បាន១ដូសទេ។ បើអ្នកខ្លះចាក់បាន១ដូស គឺគ្រូពេទ្យតម្រូវឱ្យពួកគាត់ទៅធ្វើចត្តាឡីស័ក ដើម្បីចាក់វ៉ាក់សាំងបន្ថែមទៀត»។
លោកបន្តថា ពលករចំនួន៩៤នាក់(ក្មេង៧នាក់)ក្នុងចំណោម៥១៦នាក់ ត្រូវបានគ្រូពេទ្យបញ្ជូនទៅធ្វើចត្តាឡីស័ក នៅមណ្ឌលធ្វើចត្តាឡីស័កគីឡូ៩ ក្នុងស្រុកសំពៅលូន ខេត្តបាត់ដំបង។
ដោយឡែកលោកប្រាក់ សាយ មេបញ្ជាការវរសេនាតូច៨១៧ ប្រចាំការនៅប៉ុស្តិ៍គីឡូ១៣ ក្នុងភូមិអូរ ឃុំសន្តិភាព ស្រុក សំពៅលូន ឱ្យដឹងនៅថ្ងៃទី៣១ មករា ថា ក្នុងរយៈពេលជិត១០ថ្ងៃ មុនរដូវចូលឆ្នាំប្រពៃណីចិន-វៀតណាម នៅប៉ុស្តិ៍គីឡូ១៣ ក្នុងភូមិអូរ ស្រុកសំពៅលូន មានពលករឆ្លងដែនចូលមកពីប្រទេសថៃប្រមាណជិត១០០នាក់ប៉ុណ្ណោះ។
មូលហេតុនៃការវិលត្រឡប់នេះ ត្រូវបានពលករទាំងនោះប្រាប់ថា ដោយសារពួកគាត់ទៅយូរហើយ និងម្យ៉ាងអស់ការងារធ្វើ។ លោកថា ចំពោះពលករដែលឆ្លងដែនចូលមកតាមប៉ុស្តិ៍គីឡូ១៣ ក្នុងភូមិអូរ ឃុំសន្តិភាព ស្រុកសំពៅលូន គឺគ្រូពេទ្យ និងសមត្ថកិច្ចរបស់លោកតែងតែធ្វើការណែនាំ និងអប់រំ អំពីការឆ្លងជំងឺកូវីដរួចជាស្រេច មុននឹងអនុញ្ញាតឱ្យពួកគាត់ត្រឡប់ទៅលំនៅឋានវិញ។
លោកបញ្ជាក់ថា ពាក់ព័ន្ធនឹងមេខ្យល់លួចនាំពលករឆ្លងដែនក្នុងរយៈពេលកំពុងផ្ទុះជំងឺកូវីដ គឺកម្លាំងសមត្ថកិច្ចរបស់លោកឃាត់បានមេខ្យល់ប្រមាណ២០នាក់ហើយ។ ប៉ុន្តែក្នុងរយៈពេលចុងឆ្នាំ២០២១ និងដើមឆ្នាំ២០២២នេះ មិនឃើញមានមេខ្យល់លួចនាំពលករឆ្លងដែនទៅប្រទេសថៃទេ។
លោកប្រាក់ សាយ ថ្លែងថា៖«យើងចាប់បានមេខ្យល់ខ្លះទៅ ឥឡូវឃើញមានធូរស្រាលច្រើន មិនសូវមានបទល្មើសលួចឆ្លងដែនទេ។ ការងារនេះ យើងឃ្លាំចាំមើលពួកគាត់រហូត នៅតាមតំបន់ឈរជើង ទាំងពួកគាត់ត្រឡប់មកវិញ ទាំងពលករដែលត្រូវបានមេខ្យល់លួចនាំឆ្លងដែន»៕
