ភ្នំពេញៈ រាជរដ្ឋាភិបាលកំពុងអនុវត្ត «គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា» រយៈពេល ៦ ឆ្នាំ (២០២០-២០២៥) ដើម្បីធ្វើឱ្យប្រសើរឡើងនូវការគ្រប់គ្រងតំបន់ការពារ លើកតម្លៃឱកាសអេកូទេសចរណ៍ និងខ្សែចង្វាក់តម្លៃអនុផលព្រៃឈើក្នុងតំបន់ទេសភាពភ្នំក្រវាញ និងទន្លេសាប ទំហំជាង ៣,៨ លានហិកតា។
លោក ឃិន ម៉េងឃាង ប្រធានគ្រប់គ្រងគម្រោង និងជាប្រធាននាយកដ្ឋានទេសចរណ៍ធម្មជាតិនៃក្រសួងបរិស្ថានថ្លែងក្នុងពេលទៅបំពេញទស្សនកិច្ចស្វែងយល់អំពីផលិតផល និងសេវាកម្មទេសចរណ៍ធម្មជាតិពីថ្ងៃទី ២៥-២៨ មករាថា គម្រោងនេះគ្រប់គ្រងដោយក្រសួងបរិស្ថាន និងសហការអនុវត្តដោយក្រសួងបរិស្ថាន និងក្រសួងអភិវឌ្ឍន៍ជនបទ។ ការអនុវត្តគម្រោងនេះដើម្បីឱ្យកម្ពុជា សម្រេចគោលដៅអភិវឌ្ឍន៍ប្រកបដោយចីរភាពលើការគ្រប់គ្រងតំបន់ការពារ លើកតម្លៃឱកាសអេកូទេសចរណ៍ និងខ្សែចង្វាក់តម្លៃអនុផលព្រៃឈើនៅតំបន់ទេសភាពភ្នំក្រវាញ និងទន្លេសាប។
លោកថ្លែងថា ក្រសួងបរិស្ថានកំពុងខិតខំលើកកម្ពស់ការគ្រប់គ្រងធនធានធម្មជាតិប្រកបដោយចីរភាពក្នុងតំបន់ការពាររបស់ប្រទេសកម្ពុជា តាមរយៈប្រព័ន្ធគ្រប់គ្រងប្រកបដោយភាពច្នៃប្រឌិតការទទួលខុសត្រូវ និងគណនេយ្យភាពក្នុងក្របខ័ណ្ឌកែលម្អស្ថាប័ន និងកិច្ចសហការសម្របសម្រួលរវាងភាគីពាក់ព័ន្ធផ្សេងៗ។ គម្រោងនេះនឹងត្រូវការពេលអនុវត្ត ៦ ឆ្នាំ (២០២០-២០២៥) ដោយមានការគាំទ្រពីរាជរដ្ឋាភិបាលកម្ពុជា និងក្រោមក្របខ័ណ្ឌនៃប្រាក់កម្ចីឥណទានពីធនាគារពិភពលោក។
លោកថា៖ «ក្រសួងបរិស្ថាន និងក្រសួងអភិវឌ្ឍន៍ជនបទបានទទួលកញ្ចប់ថវិកាចំនួន ៥៧,៥៨ លានដុល្លារក្នុងការអនុវត្តគម្រោង នេះរយៈពេល ៦ ឆ្នាំ ដើម្បីធ្វើឱ្យប្រសើរឡើងនូវការគ្រប់គ្រងតំបន់ការពារ លើកតម្លៃឱកាសអេកូទេសចរណ៍ និងខ្សែចង្វាក់តម្លៃអនុផលព្រៃឈើនៅក្នុងតំបន់ទេសភាពភ្នំក្រវាញ និងទន្លេសាប ទំហំជាង ៣,៨ លានហិកតា»។
បើតាមលោក ម៉េងឃាង កញ្ចប់ថវិកាសម្រាប់អនុវត្ដគម្រោងនេះ ក្រសួងបរិស្ថាន និងក្រសួងអភិវឌ្ឍន៍ជនបទទទួលបានពីភាគីពាក់ព័ន្ធមួយចំនួនមានថវិកាហិរញ្ញប្បទានឥណទានពីធនាគារពិភពលោក ៥០,៦០ លានដុល្លារអាមេរិក និងថវិកាពីមូលនិធិបរិស្ថានសកល ដែលជាថវិកាជំនួយមាន ៤,៤២ លានដុល្លារ និងថវិកាបដិភាគពីរាជរដ្ឋាភិបាលចំនួន ២,៥ លានដុល្លារ។
លោកបញ្ជាក់ថា៖ «គម្រោងនេះ មានវិសាលភាពអនុវត្តន៍លើខេត្តចំនួន ៧ នៅជុំវិញបឹងទន្លេសាបរួមនឹងខេត្តកំពង់ស្ពឺ និងខេត្តកោះកុង ដែលបានគ្របដណ្តប់លើតំបន់ការពារធនធានធម្មជាតិចំនួន ១៤ និងដែនទេសភាពចំនួន ២ គឺជុំវិញបឹងទន្លេសាប និងជួរភ្នំក្រវាញ ដែលមានទំហំជាង ៣,៨ លានហិកតា»។
ថវិកាទាំងនេះ ភាគច្រើន ប្រើប្រាស់ដើម្បីបង្កបរិយាកាសឱ្យមានការវិនិយោគពីវិស័យឯកជន ដូចជា ការធ្វើផ្លូវ ទឹកស្អាត អនាម័យ ជាពិសេសការពង្រឹងនៅតាមតំបន់គោលដៅអេកូទេសចរណ៍ធម្មជាតិ និងសហគមន៍ធម្មជាតិ។ នេះបើតាមលោក ឃិន ម៉េងឃាង។
លោក ទាង ឆាយហៀង អនុប្រធាននាយកដ្ឋានទំនាក់ទំនងសាធារណៈនៃក្រសួងអភិវឌ្ឍន៍ជនបទឱ្យដឹងថា ក្រសួងអភិវឌ្ឍន៍ជនបទជាក្រសួងសាមីមួយដែល ទទួលខុសត្រូវត្រួតពិនិត្យទៅលើទឹកស្អាត អនាម័យ ការកសាងប្រព័ន្ធហេដ្ឋារចនាសម្ព័ន្ធផ្លូវថ្នល់នៅតាមជនបទ។ សម្រាប់នៅតាមទីតាំងតំបន់ការពារធនធានធម្មជាតិ និងតំបន់អេកូទេសចរណ៍ធម្មជាតិ ប្រសិនបើតំបន់ណាមួយមានភាពចាំបាច់ នោះក្រសួងនឹងសិក្សាសាងសង់ផ្លូវចូលទៅឱ្យដល់ទីតាំងនោះ ដើម្បីផ្តល់ភាពងាយស្រួលក្នុងការធ្វើដំណើររបស់ទេសចរជាតិ-អន្តរជាតិពេលមកទស្សនាកម្សាន្ត។
លោកថ្លែងថា៖ «គោលបំណងនៃការអភិវឌ្ឍគម្រោង គឺដើម្បីធ្វើឱ្យប្រសើរឡើងនូវការគ្រប់គ្រងតំបន់ការពារលើកតម្លៃឱកាសអេកូទេសចរណ៍ និងខ្សែចង្វាក់តម្លៃអនុផលព្រៃឈើនៅក្នុងតំបន់ទេសភាពភ្នំក្រវាញ និងទន្លេសាប»។
លោកថា គម្រោងនេះ គឺជាកត្តាជំរុញដើម្បីភាពរីកចម្រើនសេដ្ឋកិច្ចរបស់សហគមន៍ជនបទ និងពង្រឹងការគ្រប់គ្រងភាពសម្បូរបែបនៃធម្មជាតិនៃជួរភ្នំក្រវាញ និងបឹងទន្លេសាប រួមទាំងជម្រកសត្វព្រៃ ឧទ្យានជាតិក្រវាញខាងត្បូង កណ្តាល ជម្រកសត្វព្រៃឱរ៉ាល់ ភ្នំសំកុស និងច្រករបៀង អភិរក្សជីវចម្រុះភ្នំក្រវាញផងដែរ។
លោកបញ្ជាក់ថា តាមរយៈគម្រោងនេះនឹងពង្រឹងខ្សែចង្វាក់តម្លៃនៃអនុផលព្រៃឈើ (NTFP) ដើម្បីបន្ថែមនូវប្រាក់ចំណូលនៅតាមទីជនបទ។ ការធ្វើឱ្យប្រសើរឡើងនូវសក្តានុពលអេកូទេសចរណ៍ និងអនុផលព្រៃឈើរបស់ប្រទេសកម្ពុជានៅតំបន់ភ្នំក្រវាញ និងទន្លេសាប គឺស្ថិតក្នុងការដោះស្រាយហេដ្ឋារចនាសម្ព័ន្ធដែលមានកម្រិត និងការតភ្ជាប់ក្នុងតំបន់។ ក្រៅពីនេះក៏មានការវិនិយោគជាក់លាក់ក្នុងការកែលម្អការតភ្ជាប់ និងការកសាងជំនាញសហគ្រិនអំពីអនុផលព្រៃឈើ និងអេកូទេសចរណ៍ នឹងត្រូវបានគេយកមកអនុវត្ត៕