ភ្នំពេញៈ ក្នុងរយៈពេលត្រឹម ១ ខែមករា ដើមឆ្នាំ ២០២២ នេះ មន្ត្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) បានរកឃើញ និងដកហូតទំនិញខូចគុណភាពមានសារធាតុគីមី និងផលិតផលមិនអនុលោមតាមច្បាប់ជាង ១៤ តោន ហើយក៏បានរកឃើញស្ថានីយ/ដេប៉ូប្រេងឥន្ធនៈចំនួន ១១០ ទីតាំង ដែលប្រកបអាជីវកម្មមិនសុចរិត។
របាយការណ៍ប្រចាំខែមករារបស់ អគ្គនាយកដ្ឋាន ក.ប.ប. ដែលកាសែតភ្នំពេញប៉ុស្តិ៍ទទួលបាននៅថ្ងៃទី ៣១ ខែមករា បានឱ្យដឹងថា ក្នុងខែមករា ឆ្នាំ ២០២២ អគ្គនាយកដ្ឋាន ក.ប.ប. បានចុះត្រួតពិនិត្យទីផ្សារ និងទីតាំងឃ្លាំងស្កុកទំនិញ ដោយរកឃើញទំនិញខូចគុណភាព ហួសរយៈពេលប្រើប្រាស់ មានសារធាតុគីមីចំនួន ២ តោន ៥៣៨ គីឡូក្រាម។
ក្រៅពីនេះ អគ្គនាយកដ្ឋាន ក.ប.ប. បានស្ទាក់ចាប់បង្គានាំចូលដែលមានចាក់បញ្ចូលសារធាតុ CMC (ចាហួយ) ចំនួន ៧ តោន ៧៩២ គីឡូក្រាម និងអនុវត្តបណ្តឹងរំលោភសិទ្ធិផ្តាច់មុខផលិតផលរបស់ក្រុមហ៊ុនដោយចុះពិនិត្យទីតាំងចំនួន ៨ និងឃាត់ទុកផលិតផល រំលោភសិទ្ធិផ្តាច់មុខមានចំនួន ៣ តោន ៨៧៩ គីឡូក្រាម ដើម្បីអនុវត្តនីតិវិធីបន្ត។
ចំពោះការបង្ក្រាបអាល់កុលក្លែងក្លាយ (មេតាណុល) វិញក្នុងរយៈពេល ១ ខែមករានេះ អគ្គនាយកដ្ឋាន ក.ប.ប. បានដកហូតអាល់កុលក្លែងក្លាយលើទីផ្សារបានចំនួន ១៧៥ លីត្រ។ ជាមួយគ្នានេះអគ្គនាយកដ្ឋានក៏បានចុះត្រួតពិនិត្យស្ថានីយ/ដេប៉ូប្រេងឥន្ធនៈទូទាំងប្រទេសចំនួន ២៧២ ទីតាំង ដោយរកឃើញដេប៉ូចំនួន ១១០ ទីតាំងប្រកបអាជីវកម្មមិនសុចរិត។
លោក ផាន អូន ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋាន ក.ប.ប. ប្រាប់ភ្នំពេញប៉ុស្តិ៍នៅថ្ងៃទី ៣១ មករាថា តាមស្ថានភាពជារួម ការត្រួតពិនិត្យតាមបណ្តាស្ថានីយ/ដេប៉ូប្រេងឥន្ធនៈក្នុងខែមករានេះឃើញថា មានការថយចុះ បើប្រៀបធៀបនឹងខែ ១២។ រីឯ បទល្មើសពាក់ព័ន្ធនឹងការប្រើប្រាស់សារធាតុគីមីទៅលើម្ហូបអាហារហាក់មានការកើនឡើង។ ការកើនឡើងនេះ គឺដោយសារតែថ្មីៗនេះ ក្រុមការងារបានរកឃើញគ្រឿងសមុទ្រ ឬបង្គាមានចាក់សារធាតុ CMC (ចាហួយ)។
លោកអគ្គនាយកបានបញ្ជាក់ថា៖ «ដោយសារតែតម្រូវការលើទីផ្សារក្នុងរយៈពេលថ្មីៗនេះមានការកើនឡើង ដូច្នេះដើម្បីការផ្គត់ផ្គង់បង្គា និងការនាំចូលបង្គាពីប្រទេសជិតខាងនេះ គឺមានការកើនឡើងនូវបាតុភាពនៃការចាក់ចាហួយ CMC នេះក្នុងក្បាលបង្គាយ៉ាងច្រើនជាដើម»។
លោក ផាន អូន ក៏បានអះអាងដែរថា ចំពោះការបង្ក្រាបទំនិញរំលោភកម្មសិទ្ធិបញ្ញាវិញក្នុង ១ ខែមករានេះក៏ត្រូវបានរកឃើញគួរឱ្យកត់សម្គាល់ផងដែរ ខណៈបទល្មើសផ្សេងៗទៀតពាក់ព័ន្ធនឹងសុវត្ថិភាពម្ហូបអាហារនៅលើទីផ្សារ គឺហាក់មានការល្អប្រសើរ (ថយចុះ) ដោយសារតែប្រជាពលរដ្ឋមានការយល់ដឹង ដែលចូលរួមមិនប្រើប្រាស់សារធាតុគីមីទៅលើមុខទំនិញរបស់ខ្លួននោះទេ។
កាលពីឆ្នាំ ២០២១ អគ្គនាយកដ្ឋាន ក.ប.ប. បានចុះពិនិត្យទីផ្សារនៅទូទាំងប្រទេសបានចំនួន ៥៦៩ លើក ដោយដកហូតមុខទំនិញដែលមិនមានភាពអនុលោមចំនួន ៣៦ តោន ៤០០ គីឡូក្រាមយកមកកម្ទេចចោល។ ក.ប.ប. ក៏បានរកឃើញ និងដកហូតមកបំផ្លាញចោលសារធាតុបាញ់លើរុក្ខជាតិធ្វើឱ្យស្រស់ និងឆាប់លូតលាស់ គ្មានស្លាកសញ្ញាត្រឹមត្រូវបានចំនួន ៧៨ ប៊ីដុង ស្មើនឹង ២ ៣៤០ លីត្រផងដែរ។
ក្រៅពីបទល្មើសទាំងនេះក្នុងរយៈពេល ១ ឆ្នាំ ២០២១ កន្លងមកនេះ មន្ត្រីនាយកដ្ឋាន ក.ប.ប. ក៏បានស្ទាក់ចាប់រថយន្តដឹកបង្គាស្រស់មានចាក់បញ្ចូលសារធាតុ CMC (ចាហួយ) ចំនួន ៧ តោន និង ១០០ គីឡូក្រាម និងគ្រឿងក្នុងជ្រូកចំនួន ៣២០ គីឡូក្រាម យកមកកម្ទេចចោល។ ជាងនេះទៀត មន្ត្រីក៏បានត្រួតពិនិត្យ និងវិភាគគុណភាពទំនិញចាំបាច់ដែលត្រូវយកមកដាក់លក់ និងចែកជូនប្រជាពលរដ្ឋដែលរស់នៅក្នុងតំបន់បិទខ្ទប់នៅតាមបណ្ដាឃ្លាំងស្តុក និងសិប្បកម្មនានាចំនួន ៤១ លើក។
ចំពោះការចុះត្រួតពិនិត្យគុណភាព និងបរិមាណរង្វាស់រង្វាល់ប្រេងសាំងនៅតាមបណ្តាស្ថានីយ/ដេប៉ូលក់ប្រេងឥន្ធនៈនៅទូទាំងប្រទេសពេញ ១ ឆ្នាំ ២០២១ មន្ត្រីនាយកដ្ឋាន ក.ប.ប. នៅទូទាំងប្រទេសបានរកឃើញស្ថានីយ/ដេប៉ូចំនួន ៦៩៣ ទីតាំង មិនមានភាពអនុលោមផ្នែកគុណភាព (សន្ទស្សន៍អុបតាន) និងបរិមាណក្នុងចំណោមស្ថានីយ/ដេប៉ូសរុប ១ ៦៦១ ទីតាំង។
បន្ថែមពីនេះ ក្នុងរយៈពេល ១ ឆ្នាំ ២០២១ នោះ មន្ត្រីនៅក្របខ័ណ្ឌទូទាំងប្រទេសក៏បានត្រួតពិនិត្យគុណភាពអាល់កុល និងជែលលាងដៃគ្រប់ប្រភេទមានផ្ទុកសារធាតុមេតាណុលនៅតាមបណ្តាឃ្លាំងស្តុកនៅតាមទីផ្សារ និងឱសថស្ថាន ហើយបានរកឃើញ និងរឹបអូសមកកម្ទេចចោលសារធាតុមេតាណុលជិត ២ សែនលីត្រ៕
វីដេអូ៖