ភ្នំពេញៈ រដ្ឋមន្ដ្រីក្រសួងមហាផ្ទៃបញ្ជាក់ថា កាលពីឆ្នាំ ២០២១ កម្ពុជានៅតែបន្តទទួលរងឥទ្ធិពលអាក្រក់ពីស្ថានភាពប្រែប្រួលជាអវិជ្ជមានប្រកបដោយហានិភ័យខ្ពស់បណ្ដាលមកពីគ្រឿងញៀន ព្រោះពេញ ១ ឆ្នាំមុននេះ ទោះបីចំនួនករណីគ្រឿងញៀនសមត្ថកិច្ចបង្ក្រាបបាន មានការថយចុះក្តី ប៉ុន្តែបទល្មើសគ្រឿងញៀនធំៗបានកើនឡើង ដែលក្នុងនោះបង្ក្រាបបានគ្រឿងញៀន និងសារធាតុគីមីផ្សំជាង ៨០ តោន។
របាយការណ៍ស្ដីពីការបង្ក្រាបបទល្មើសគ្រឿងញៀនរយៈពេល ១ ឆ្នាំ ២០២១ ដែលឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង ផ្សព្វផ្សាយលើហ្វេសប៊ុកកាលពីថ្ងៃទី ៣១ ខែមករា ឱ្យដឹងថា ទោះបីចំនួនករណីគ្រឿងញៀនសមត្ថកិច្ចបង្ក្រាបបាន មានការថយចុះក្តី ប៉ុន្តែករណីបង្ក្រាបបទល្មើសគ្រឿងញៀនធំៗបានកើនឡើង។ ក្នុងនោះមានគ្រឿងញៀន និងសារធាតុគីមីផ្សំសរុបប្រមាណ ៨០ តោន រួមទាំងម៉ាស៊ីនផលិតកែច្នៃស្វ័យប្រវត្តិឈុតធំៗដ៏គ្រោះថ្នាក់ជាច្រើនទៀតនៅរាជធានីភ្នំពេញ និងបណ្ដាខេត្តមានភូមិសាស្ត្រជាប់រាជធានីជាប់ព្រំដែនឡាវ ថៃ និងវៀតណាម នៅតាមប្រៃសណីយ៍ និងនៅលើផ្ទៃសមុទ្រ។
លោកឱ្យដឹងថា ក្នុងរយៈពេលពេញ ១ ឆ្នាំ ២០២១ ពោលគឺចាប់ពីថ្ងៃទី ១ មករា ដល់ថ្ងៃទី ៣១ ធ្នូ ឆ្នាំ ២០២១ សមត្ថកិច្ចបានបើកប្រតិបត្តិការបង្ក្រាបបទល្មើសគ្រឿងញៀនបានចំនួន ៦ ៣០៨ ករណី ស្មើនឹង ៦០,៣០ ភាគរយ ប្រៀបធៀបនឹងឆ្នាំ ២០២០ ពោលគឺបានថយចុះ ៤ ១៥៣ ករណី ស្មើនឹង ៣៩,៧០ ភាគរយធៀបនឹងឆ្នាំ ២០២០។
ក្នុងចំណោមករណីបង្ក្រាបបាន ករណីជួញដូរ រក្សាទុកមានចំនួន ៤ ៤៧៣ ករណី។ ការប្រើប្រាស់មានចំនួន ១ ៧៨៩ ករណី ការដាំដុះមានចំនួន ៣៧ ករណី ការកែច្នៃមាន ៩ ករណី និងឃាត់ខ្លួនជនសង្ស័យសរុប ១៣ ៩៧៩ នាក់ ក្នុងនោះជនសង្ស័យករណីជួញដូរ រក្សាទុក ៨ ៦៧២ នាក់ ករណីប្រើប្រាស់គ្រឿងញៀនចំនួន ៥ ២៦៤ នាក់ ករណីដាំដុះ ៩ នាក់ និងកែច្នៃ ៣៤ នាក់។ ក្នុងចំណោមជនសង្ស័យទាំងនោះមានជនបរទេសចំនួន ៣៦៥ នាក់។
តាមរបាយការណ៍លោក ស ខេង នៅឆ្នាំ ២០២១ សមត្ថកិច្ចបានចាប់យកគ្រឿងញៀនសរុបជាង ៤ តោន ៦៨៩ គីឡូក្រាម និង ៦១១,៤៧ ក្រាម ក្នុងនោះមានមេតំហ្វេតាមីនក្រាមម្សៅ (ICE) ជាង ៩៤៧ គីឡូក្រាម មេតំហ្វេតាមីនគ្រាប់ (WY) ជាង ៦ គីឡូក្រាម អិចស្តាស៊ីជាង ៥៥៦ គីឡូក្រាម។ កេតាមីនជាង ២ ៧៨២ គីឡូក្រាម ហេរ៉ូអ៊ីនជាង ២៧៥ គីឡូក្រាម កាទីណូនជាង ១០៦ គីឡូក្រាម នីមេតាសេប៉ាមជាង ១១ គីឡូក្រាម និងកាកូអ៊ីនជាង ១ គីឡូក្រាម។ ជាមួយគ្នានេះ សមត្ថកិច្ចក៏បង្ក្រាបបានកញ្ឆាស្រស់ដោយបានកាប់បំផ្លាញចំនួន ៥៣ ១៨៧ ដើម កញ្ឆាក្រៀមជាង ១៣៥ គីឡូក្រាម ខណៈសារធាតុគីមីផ្សំបង្ក្រាបបានជាង ៨៤ តោន កើនជាង ១ ពាន់ភាគរយឯណោះ។
លោក ស ខេង បានថ្លែងថា៖ «នៅឆ្នាំ ២០២១ កន្លងទៅ កម្ពុជាយើងនៅតែបន្តទទួលរងឥទ្ធិពលអាក្រក់ពីស្ថានភាពប្រែប្រួលជាអវិជ្ជមានប្រកបដោយហានិភ័យខ្ពស់បណ្ដាលមកពីគ្រឿងញៀន។ បញ្ហានេះ គឺដោយសារតែការកើនឡើងឥតឈប់ឈរនៃការផលិត ការចរាចរ និងការជួញដូរគ្រឿងញៀននៅលើពិភពលោក និងក្នុងតំបន់»។
យោងតាមរបាយការណ៍ពីគណៈកម្មាធិការជាតិប្រយុទ្ធប្រឆាំងគ្រឿងញៀនឆ្នាំ ២០២១ សមត្ថកិច្ចក៏ប្រមូលបាន និងបញ្ជូនទៅសាលាដំបូងរាជធានី-ខេត្តរួចរាល់នូវសម្ភារចាប់យកមួយចំនួន ដូចជារថយន្ត ១៣៨ គ្រឿង ម៉ូតូ ១ ៩៨៨ គ្រឿង ទូរស័ព្ទ ៦ ៥៥៤ គ្រឿង។ ជញ្ជីង ៣៨៥ គ្រឿង អាវុធវែង ៥០ ដើមអាវុធខ្លី ២៩ ដើម ប្រាក់រៀលជាង ៧៨ លានរៀល ប្រាក់អាមេរិកជាង ៣ ម៉ឺនដុល្លារ ប្រាក់ថៃជាង ១ សែនបាត និងប្រាក់វៀតណាមជាង ៨ ម៉ឺនដុង ព្រមទាំងបានឃាត់ទុកទ្រព្យសម្បត្តិជាអចលនទ្រព្យចំនួន ២០ កន្លែង។
លោក ស ខេង បញ្ជាក់ថា៖ «បងប្អូនជនរួមជាតិជាទីគោរព! ខ្ញុំធ្លាប់បញ្ជាក់ជូនហើយថា បញ្ហាកូវីដ ១៩ នេះ ថ្វីដ្បិតថា នៅមិនទាន់មានការថមថយ ប៉ុន្តែវាទំនងជាអាចដើរដល់ទីបញ្ចប់នៅថ្ងៃណាមួយមិនខានឡើយ។ ប៉ុន្តែបញ្ហាគ្រឿងញៀននេះ វានឹងមិនងាយរកទីបញ្ចប់ឃើញនោះទេ ដោយសារក្រុមឧក្រិដ្ឋជននៅតែបន្តរិះរកវិធីសាស្ត្រថ្មីៗដើម្បីផលិត និងចែកចាយ»។
លោកបន្តថា កាលពីដើមឆ្នាំ ២០២១ រាជរដ្ឋាភិបាលកម្ពុជាដែលមានលោក ហ៊ុន សែន នាយករដ្ឋមន្ត្រីបានបន្តយកចិត្តទុកដាក់ចង្អុលបង្ហាញលើការងារប្រយុទ្ធប្រឆាំងគ្រឿងញៀននេះណាស់។ ពិសេសលោកនាយករដ្ឋមន្ដ្រីបានឯកភាពកែសម្រួលលក្ខណសម្បត្តិនៃគោលនយោបាយ «ភូមិ ឃុំសង្កាត់ មានសុវត្ថិភាព» ដោយលើកជាកម្រិតគោលនយោបាយ និងបានបន្តដាក់បញ្ចូលបញ្ហាគ្រឿងញៀនជាកិច្ចការអាទិភាព។
លោក ស ខេង បានអំពាវនាវជាថ្មីដល់កងកម្លាំងអនុវត្តច្បាប់ និងប្រជាពលរដ្ឋទាំងអស់ចូលរួមអនុវត្តតាមទិសស្លោកប្រយុទ្ធប្រឆាំងគ្រឿងញៀន ៣ កុំ ១ រាយការណ៍។
លោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបញ្ជាក់នៅថ្ងៃទី ៣១ មករា ថា៖ «សមត្ថកិច្ចបង្ក្រាបបានមានការថយចុះ។ ប៉ុន្តែករណីបង្ក្រាបបទល្មើសគ្រឿងញៀនធំៗបានកើនឡើង ដោយក្នុងនោះ ៨៤ តោន ជាសារធាតុគីមីផ្សំ។ ចំណែកសារធាតុញៀនមានជាង ៤ តោន សម្រាប់ឆ្នាំ ២០២១ ជាពិសេសនៅចុងឆ្នាំ។ ដោយឡែកនៅដើមឆ្នាំ ២០២២ នេះ យើងរកឃើញបន្ថែមទៀត»៕
វីដេអូ៖