.jpg)
សិក្ខាសាលារបស់មន្ត្រីជំនាញស៊ីម៉ាក់ នៅថ្ងៃទី ៣១ ខែមករា។ រូបថត អគ្គភាពស៊ីម៉ាក់
ភ្នំពេញៈ មជ្ឈមណ្ឌលសកម្មភាពកំចាត់មីនកម្ពុជា (CMAC) បើកសិក្ខាសាលារយៈពេល ៥ ថ្ងៃ ដើម្បីប្រមូលធាតុចូលលើការរៀបចំផែនការយុទ្ធសាស្ត្រក្នុងការពង្រឹងសមត្ថភាពអង្គភាពស៊ីម៉ាក់ សម្រាប់ទ្រទ្រង់សភាពការណ៍សំណល់យុទ្ធភណ្ឌសង្គ្រាមនៅកម្ពុជា ក្រោយឆ្នាំ ២០២៥។
សិក្ខាសាលានេះត្រូវបានធ្វើឡើងចាប់ពីថ្ងៃទី ៣១ ខែមករា ដល់ថ្ងៃទី ៤ ខែកុម្ភៈ ឆ្នាំ ២០២២ នៅសណ្ឋាគារ Hyatt Regency Phnom Penh ដែលមានសិក្ខាកាមមុខជំនាញសំខាន់ៗសរុបជិត ១០០ នាក់ចូលរួម។
អគ្គនាយកមជ្ឈមណ្ឌលសកម្មភាពកំចាត់មីនកម្ពុជាលោក ហេង រតនា ប្រាប់ភ្នំពេញប៉ុស្តិ៍ថា សិក្ខាសាលានេះមានចរិតធំទូលាយ និងជាលើកទី ៣ ដោយបានធ្វើបន្តពីវគ្គមុនៗចាប់តាំងពីឆ្នាំ ២០១៧ និងឆ្នាំ ២០២០ ដោយធ្វើតាមអនឡាញ។ លោកថា៖ «សិក្ខាសាលានេះ ដើម្បីរៀបចំផែនការយុទ្ធសាស្ត្រ ពង្រឹងសមត្ថភាពអង្គភាពស៊ីម៉ាក់ ក្រោយឆ្នាំ ២០២៥ ថាតើក្រោយឆ្នាំ ២០២៥ យើងត្រូវធ្វើអីខ្លះ ហើយសមត្ថភាពនេះ យើងត្រូវចាប់ផ្តើមបណ្តុះពីឆ្នាំ ២០២២ ដល់ឆ្នាំ ២០២៥ ដោយសារតែសភាពការណ៍សំណល់ផ្ទុះពីសង្គ្រាម ក្រោយឆ្នាំ ២០២៥ នឹងមានការប្រែប្រួល»។
លោកបានគូសបញ្ជាក់ថា ថ្វីដ្បិតកម្ពុជាអាចបញ្ចប់ភារកិច្ចបោសសម្អាតគ្រាប់មីនប្រឆាំងមនុស្សស្របតាមអាណតិ្តរបស់អនុសញ្ញាអន្តរជាតិអូតាវ៉ានៃការហាមប្រាមការប្រើប្រាស់គ្រាប់មីនប្រឆាំងមនុស្សត្រឹមចុងឆ្នាំ ២០២៥ ប៉ុន្តែមានបញ្ហាសំណល់យុទ្ធភណ្ឌសង្គ្រាមមួយផ្នែកធំទៀត ដូចជាគ្រាប់បែកចង្កោម គ្រាប់បែកទម្លាក់ពីយន្តហោះ និងសំណល់គ្រាប់មិនទាន់ផ្ទុះផ្សេងៗទៀត ដែលទាមទារពេលវេលា ហើយអង្គភាពស៊ីម៉ាក់បន្តភារកិច្ចបោសសម្អាតកាកសំណល់ទាំងនោះបន្តទៀត។ លោកថា៖ «យុទ្ធភណ្ឌមិនទាន់ផ្ទុះគ្រប់ប្រភេទ ដែលមិនស្ថិតនៅក្រោមអនុសញ្ញាអូតាវ៉ា និងគ្រាប់បែកទម្លាក់ពីយន្តហោះជាដើម មិនទាន់ស្រាកស្រាន្តនៅឡើយទេ នៅតែមានការគំរាមកំហែងកម្រិតខ្ពស់នៅឡើយ»។
លោក ហេង រតនា បានបន្តទៀតថា សិក្ខាសាលា ២ ដងកន្លងមកនេះ អង្គភាពស៊ីម៉ាក់បានធ្វើការវាយតម្លៃនូវតម្រូវការចាំបាច់បឋមដែលត្រូវការ និងចាប់ផ្តើមពង្រឹងសមត្ថភាពបន្តទៀតដូចជា ការរៀបចំគ្រូសម្រាប់ពង្រឹងវិទ្យាស្ថានបច្ចេកទេសសកម្មភាពកម្ចាត់មីន គ្រូបន្តវេន និងអ្នកជំនាញបន្តវេនជាដើម។
ពាក់ព័ន្ធការសម្អាតមីននេះ លោកក៏បានលើកឡើងនូវបញ្ហាប្រឈមជាច្រើន នៅក្នុងការរៀបចំផែនការយុទ្ធសាស្ត្រ និងផែនការឆ្លើយតបទៅនឹងសភាពការណ៍ជាក់ស្តែង ដែលបានជួបប្រទះនាពេលកន្លងមក។ លោកបញ្ជក់ថា៖ «បានន័យថា ប្រជាពលរដ្ឋត្រូវការប្រើប្រាស់ដីធ្លីគាត់ជាចាំបាច់ ប៉ុន្តែសមត្ថភាពយើងមានកម្រិតក្នុងការឆ្លើយតប។ អ៊ីចឹងហើយយើងឃើញថា ការប្រើប្រាស់ដីធ្លីមួយចំនួនពលរដ្ឋគាត់ប្រឹងប្រែងរុករានប្រថុយប្រថានដោយខ្លួនគាត់ ទើបមានគ្រោះថ្នាក់ខ្លះនៅលើដីស្រែចំការពួកគាត់ ដោយសារគាត់មិនអាចរង់ចាំយើងយូរពេក ហើយចំនួននេះមានច្រើនពីមុនមក ប៉ុន្តែឥឡូវថយចុះហើយ»។
បើតាមលោក ហេង រតនា ក្នុងគម្រោងនេះ រដ្ឋាភិបាលជប៉ុនតាមរយ:ទីភ្នាក់ងារសហប្រតិបត្តិការអន្តរជាតិជប៉ុន (JICA) បានគាំទ្រអង្គភាពស៊ីម៉ាក់នូវការផ្តួចផ្តើមឱ្យមានការគិតគូរផែនការយុទ្ធសាស្ត្រនៃការពង្រឹងសមត្ថភាព និងតួនាទីអង្គភាពស៊ីម៉ាក់ក្រោយឆ្នាំ ២០២៥ នេះ។
ផែនការយុទ្ធសាស្ត្រនេះ មួយផ្នែកដើម្បីពង្រឹងធាតុទន់ដូចជាបណ្តុះបណ្តាលធនធានមនុស្ស ពង្រីកទំនាក់ទំនងសហប្រតិបតិ្តការត្បូង-ត្បូង និងមួយផ្នែកទៀតដើម្បីពង្រឹងធាតុរឹង ដូចជាការបំពាក់សម្ភារបច្ចេកទេស ការកសាងសំណង់អគារសិក្សា និងសារមន្ទីរ។
លោក រតនា គូសបញ្ជាក់ថា អង្គភាពស៊ីម៉ាក់នឹងខិតខំធ្វើកំណែទម្រង់ប្រតិបត្តិការក្នុងការបង្កើនប្រសិទ្ធភាពដើម្បីសម្រេចឱ្យបាននូវផែនការយុទ្ធសាស្ត្រដែលនឹងធ្វើឱ្យកម្ពុជាគ្មានការគំរាមកំហែងដោយសារមីននៅត្រឹមចុងឆ្នាំ ២០២៥ និងមានផែនការក្នុងការរំដោះផ្ទៃដីចម្ការមីនដែលមានពហុកោណ នៅក្នុងទិន្នន័យជាតិប្រមាណ ៧០០ គីឡូម៉ែត្រក្រឡា ស្មើនឹងប្រមាណ ៩០ ភាគរយនៃផ្ទៃដីចម្ការមីននៅសល់បច្ចុប្បន្ន៕
