ភ្នំពេញៈ អ្នកនាំពាក្យអង្គភាពប្រឆាំងអំពើពុករលួយ (អ.ប.ព.) ប្រកាសបញ្ជូនខ្លួនជនសង្ស័យឈ្មោះ ទូច ទិត្យវឌ្ឍនា មន្ត្រីនាយកដ្ឋានកិច្ចការគតិយុត្ត ពាក្យប្តឹង និងអន្តរជាតិនៃអង្គភាពប្រឆាំងអំពើពុករលួយទៅសាលាដំបូងរាជធានីភ្នំពេញ ពាក់ព័ន្ធអំពើពុករលួយ ខណៈជូនដំណឹងទៅមន្ត្រីជាន់ខ្ពស់ម្នាក់នៅសាកលវិទ្យាល័យការពារជាតិឱ្យចូលបំភ្លឺពីភាពមិនប្រក្រតីមួយចំនួននៃការបំពេញតួនាទី។
យោងតាមលិខិតប្រកាសព័ត៌មានរបស់ អ.ប.ព. ដែលភ្នំពេញប៉ុស្តិ៍ទទួលបាននៅថ្ងៃទី ២៩ ខែមករា ថ្លែងថា ក្រុមស៊ើបអង្កេតផ្ទៃក្នុងនៃអង្គភាពប្រឆាំងអំពើពុករលួយបានធ្វើការប្រមូលព័ត៌មាន ភ័ស្តុតាងជាបន្តបន្ទាប់ព្រមទាំងស្តាប់ចម្លើយរបស់ ឈ្មោះ ទូច ទិត្យវឌ្ឍនា ភេទប្រុស អាយុ ២៧ ឆ្នាំមន្ត្រីនាយកដ្ឋានកិច្ចការគតិយុត្ត ពាក្យប្តឹង និងអន្តរជាតិ រួចមក។ អ.ប.ព. បានរកឃើញថា ជនរូបនេះជាប់សង្ស័យបានប្រព្រឹត្តល្មើសបញ្ញតិ្តក្នុងមាត្រា ៥៩២ (បទវីតិក្រម) នៃក្រមព្រហ្មទណ្ឌ និងមាត្រា ៣២ នៃច្បាប់ស្តីពីការប្រឆាំងអំពើពុករលួយ។ ជនសង្ស័យឈ្មោះ ទូច ទិត្យវឌ្ឍនា បានប្រើប្រាស់វិធីនានាក្នុងពេលដែលខ្លួនកំពុងទទួលខុសត្រូវទទួលពិនិត្យពាក្យប្តឹង ដើម្បីរកប្រយោជន៍ផ្ទាល់ខ្លួនខុសច្បាប់ ហើយពេលដែលខ្លួនត្រូវបញ្ឈរជើងផ្អាកការងារហើយក្តី ក៏ឈ្មោះនេះមិនបានបញ្ឈប់សកម្មភាពខុសច្បាប់របស់ខ្លួន ហើយទាញយកផលប្រយោជន៍ពីពាក្យប្តឹងដែលខ្លួនមិនទទួលបន្ទុកទៀតផង។
អ.ប.ព. សរសេរក្នុងលិខិតថា៖ «អង្គភាពប្រឆាំងអំពើពុករលួយបានសម្រេចបញ្ជូនខ្លួនជនសង្ស័យខាងលើនៅថ្ងៃទី ២៨ ខែមករា ឆ្នាំ ២០២២ ទៅសាលាដំបូងរាជធានីភ្នំពេញ ដើម្បីបន្តនីតិវិធីច្បាប់»។
អ.ប.ព. ប្រកាសលើកទឹកចិត្តដល់សាធារណជនចូលរួមផ្តល់ព័ត៌មានមកអង្គភាពប្រឆាំងអំពើពុករលួយជាបន្ទាន់ក្នុងករណីដែលមានជនខិលខូចណាម្នាក់អះអាងថា ខ្លួនអាចប្រើប្រាស់តួនាទីរបស់ខ្លួនជាមន្ត្រី អ.ប.ព. ដើម្បីជួយសម្រួលដល់កិច្ចការល្មើសច្បាប់ណាមួយ។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញ ថ្លែងប្រាប់ភ្នំពេញប៉ុស្តិ៍នៅថ្ងៃទី ៣០ ខែមករាថា រឿងខាងលើនេះ តំណាងអយ្យការបានបើកការស៊ើបសួរ និងបញ្ជូនទៅចៅក្រមស៊ើបសួររួចរាល់ហើយពីបទវិតិក្រមតាមមាត្រា ៥៩២ និង មាត្រា ៥៩៣ នៃក្រមព្រហ្មទណ្ឌ។ ប៉ុន្តែយ៉ាងណាភ្នំពេញ-ប៉ុស្តិ៍មិនអាចសុំការបំភ្លឺពីលោក អ៊ី រិន អ្នកនាំពាក្យសាលាដំបូងរាជធានីភ្នំពេញបានទេនៅថ្ងៃទី ៣០ ខែមករា។
ចំពោះករណីលោក ច័ន្ទ ពន្លឹក សាកលវិទ្យាធិការរង សាកលវិទ្យាល័យការពារជាតិត្រូវបានចោទប្រកាន់ពាក់ព័ន្ធភាពមិនប្រក្រតីជាច្រើនក្នុងសកម្មភាពបំពេញតួនាទីភារកិច្ច ដែល អ.ប.ព. ស្នើឱ្យចូលបំភ្លឺ ដូចជាតម្រូវឱ្យបុគ្គលិកតាមការិយាល័យ និងមហាវិទ្យាល័យ បង់ប្រាក់ប្រចាំសប្តាហ៍ និងប្រចាំខែ នាយទាហានដែលបញ្ចប់ការសិក្សាចង់បម្រើការងារនៅសាកលវិទ្យាល័យការពារជាតិត្រូវបង់ប្រាក់ប្រចាំខែបានបង្ខំឱ្យនិស្សិតបង់ប្រាក់តាមវគ្គសិក្សា បង់ប្រាក់ព្យួរឈ្មោះបង់ប្រាក់សុំចូលរៀន បង់ប្រាក់យកតំណែង បង់ប្រាក់ឡើងស័ក្ដិ កឹបកេងប្រាក់ មិនបើកអង្ករ លក់រថយន្ត ៤ គ្រឿង និងសម្ភារក្នុងឃ្លាំង ដែលសរុបជាសាច់ប្រាក់ប្រមាណជាង ៥០ លានដុល្លារ។ យោងតាមលិខិតរបស់ អ.ប.ព. ដែលភ្នំពេញប៉ុស្តិ៍ទទួលបាននៅថ្ងៃទី ៣០ ខែមករា ដែលមានរបាយការណ៍សាច់ប្រាក់លម្អិតនៅក្នុងករណីនីមួយៗ។
អង្គភាពប្រឆាំងអំពើពុករលួយបញ្ជាក់ថា៖ «អាស្រ័យហេតុនេះ សូម ឯកឧត្តម បំភ្លឺករណីនេះ និងផ្តល់ឯកសារពាក់ព័ន្ធខាងលើ មក អ.ប.ព. ឱ្យបានទាន់ពេល ហើយការបំភ្លឺរបស់ឯកឧត្តម គឺជាមូលដ្ឋានសម្រាប់ អ.ប.ព. ពិចារណាថាត្រូវសម្រេចបញ្ចប់នីតិវិធី ឬត្រូវបន្តលើពាក្យប្តឹងនេះ»។
អង្គភាពប្រឆាំងអំពើពុករលួយមិនបានបញ្ជាក់ថា ឱ្យលោក ច័ន្ទ ពន្លឹក ចូលបំភ្លឺនៅថ្ងៃណាប្រាកដនោះទេ។ ភ្នំពេញប៉ុស្តិ៍មិនអាចស្វែងរកទំនាក់ទំនងសុំការបំភ្លឺពី លោក ច័ន្ទ ពន្លឹក សាកលវិទ្យាធិការរងនៃសាកលវិទ្យាល័យការពារជាតិបានទេនៅថ្ងៃទី ៣១ ខែមករា៕