សៀមរាបៈ អាជ្ញាធរជាតិអប្សរាគ្រោងស្នើសុំរាជរដ្ឋាភិបាលធ្វើការជួសជុលពង្រឹងរចនាសម្ព័ន្ធកាំជណ្តើរច្រាំងកសិន្ធុប្រាសាទអង្គរវត្តផ្នែកខាងត្បូងប្រវែង ៦០ ម៉ែត្របន្ថែមទៀត ក្រោយពីអាជ្ញាធរនេះបានប្រកាសនៅថ្ងៃទី ២៨ ខែមករាថា បានបញ្ចប់ការជួសជុលដោយជោគជ័យក្នុងដំណាក់កាលទី ១ ប្រវែង ៨០ ម៉ែត្រ។
លោក គឹម សុធិន អគ្គនាយករងអាជ្ញាធរជាតិអប្សរាបានថ្លែងនៅថ្ងៃទី ៣០ ខែមករាថា បន្ទាប់ពីបានបញ្ចប់ការសាងសង់ជំហានទី ១ អាជ្ញាធរជាតិអប្សរាកំពុងត្រៀមស្នើសុំធ្វើបន្ត ៦០ ម៉ែត្របន្ថែមទៀតមកខាងត្បូងផ្នែកពោងបណ្តែតទឹក។ លោកថា គម្រោងក្រោយនេះអាចនឹងត្រូវរុះរើថ្មដោយផ្នែក និងត្រូវពង្រឹងឡើងវិញតាមបែបបុរាណ។
លោកថ្លែងថា៖ «ជារួមផ្នែកខាងហ្នឹងដោយសារវាស្រុតថ្មខ្លាំង ១ ដុបៗ ប្រហែលជាត្រូវរើ ហើយយើងជួសជុលបែបបុរាណយើងវិញ»។
លោកបានឱ្យដឹងទៀតថា ចំពោះការជួសជុលជំហានទី ១ ដំបូង អ្នកជំនាញបានសាកល្បងរុះរើមួយចំនួនផងដែរ ប៉ុន្តែដោយសារ ថ្មមានការជាប់ដែកតៀមបារាំងដែលបានចាក់លាយស៊ីម៉ងត៍ធ្វើឱ្យជាប់ពិបាកក្នុងការរើ ហេតុនេះអាជ្ញាធរជាតិអប្សរាមិនបានធ្វើការរុះរើឡើយ។ ទីតាំងនោះត្រូវរង់ចាំសួរអ្នកជំនាញការអន្តរជាតិធ្វើការប្រជុំសម្រេចទើបដំណើរការបន្តជួសជុលទៀត។ ប៉ុន្តែយ៉ាងណាក៏ដោយ ក្រោយពេលជួសជុលដំណាក់កាលទី ១ នោះគឺជណ្តើរមានភាពរឹងមាំឡើងវិញលែងរលុះ និងអាចតាំងនៅបានរហូតដល់ខ្ទង់រយឆ្នាំ។
លោកបញ្ជាក់ថា៖ «អ្នកជំនាញការអន្តរជាតិគេប្រជុំ ICC-Angkor ទៅ គេឱ្យយើងធ្វើម៉េចបានយើងធ្វើទៀត ប៉ុន្តែយើងបានពង្រឹង វាហើយវាលែងមានហានិភ័យលែងរលុះហើយ។ អានេះ គ្រឹះវាបានចូលជ្រៅ ហើយយើងបានរើទំនប់ដីឥដ្ឋ ការពារអ្វីដែលយើងចាក់បេតុងទ្រទៀត យើងយកដីឥដ្ឋមកទប់បេតុងហ្នឹង អ៊ីចឹងទឹកវ៉ៃក៏វ៉ៃអត់បែកដែរ»។
លោក ម៉ៅ សុខនី មន្ត្រីបច្ចេកទេសនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការបានឱ្យដឹងថា គម្រោងលើកតម្លៃសំណង់បុរាណ និងលើកកម្ពស់សោភណភាពច្រាំងកសិន្ធុប្រាសាទអង្គរវត្តផ្នែកខាងត្បូងនៃស្ពានហាលត្រូវបានបញ្ចប់ការងារជួសជុលជាស្ថាពរ បន្ទាប់ពីចាប់ផ្តើមតាំងពីអំឡុងខែកញ្ញា ឆ្នាំ ២០២១ មក។
លោកបានបញ្ជាក់ថា៖ «ក្រោយពេលបញ្ចប់ការងារជួសជុលពង្រឹងរចនាសម្ព័ន្ធក្នុងដំណាក់កាលទី ១ នេះ ក្រុមការងាររំពឹងថានឹងធ្វើឱ្យកាំជណ្តើរច្រាំងកសិន្ធុមានភាពរឹងមាំយូរអង្វែងបន្តទៅមុខទៀត ព្រោះថាប្រសិនបើមិនមានការជួសជុលពង្រឹងទេ នាពេលខាងមុខ កាំជណ្តើរនៅតាមផ្នែកខ្លះនឹងរលុះធ្លាក់ជាផ្ទាំងធំៗមិនងាយស្រួលនឹងធ្វើការជួសជុលឡើយ»។
បើតាមអាជ្ញាធរជាតិអប្សរាគម្រោងជួសជុលពង្រឹងរចនាសម្ព័ន្ធកាំជណ្តើរច្រាំងកសិន្ធុផ្នែកខាងត្បូងនៃស្ពានហាលបានចែកចេញជា ៣ ដំណាក់កាលធំៗក្នុងប្រវែងសរុប ២០០ ម៉ែត្រ ដោយប្រើពេលជួសជុលអស់ ៣ ឆ្នាំទើបរួចរាល់ ដោយក្នុងដំណាក់កាលទី ១ ធ្វើការជួសជុលប្រវែង ៨០ ម៉ែត្រ៕