.jpg)
កំណាត់ផ្លូវជាតិលេខ ៤ ក្នុងខណ្ឌកំបូលត្រូវបានជួសជុលពីឆ្នាំមុន។ រូប ក្រសួងសាធារណការ
ភ្នំពេញៈ មន្ត្រីក្រសួងសាធារណការ និងដឹកជញ្ជូនឱ្យដឹងថា គម្រោងចំនួន ៥ កញ្ចប់ សម្រាប់ស្តារ និងស្ថាបនាផ្លូវជាតិលេខ ៤ ឡើងវិញត្រូវបានដេញថ្លៃចប់សព្វគ្រប់ ដោយក្នុងនោះគម្រោងចំនួន ៣ កញ្ចប់ត្រូវបានចុះកិច្ចសន្យាដំណើរការសាងសង់ ហើយគម្រោង ២កញ្ចប់ទៀត គ្រោងចាប់ផ្តើមនៅខែមីនាខាងមុខ។
ផ្លូវជាតិលេខ ៤ គឺជាផ្លូវសេដ្ឋកិច្ចដ៏សំខាន់ពីរាជធានីភ្នំពេញទៅខេត្តព្រះសីហនុមានចម្ងាយប្រមាណ ២៣២ គីឡូម៉ែត្រ ហើយស្ថានភាពជាក់ស្តែងនៃផ្លូវជាតិនេះបច្ចុប្បន្ន គឺមានទំហំតូច និងមានចំណុចខ្លះត្រូវរងការខូចខាត ដោយការដឹកលើសចំណុះរបស់រថយន្តធុនធំ និងទឹកហូរកាត់ផ្លូវនារដូវវស្សា។
លោក ហេង រ័ត្នពិសិដ្ឋ អគ្គនាយកនៃអគ្គនាយកដ្ឋានសាធារណការនៃក្រសួងសាធារណការ និងដឹកជញ្ចូនបានប្រាប់ភ្នំពេញប៉ុស្តិ៍នៅថ្ងៃទី ៣១ មករាថា បច្ចុប្បន្នគម្រោងស្តារ និងស្ថាបនាផ្លូវជាតិលេខ ៤ នេះ គឺមាន ៥ កញ្ចប់ដោយទទួលបានថវិកាពីធនាគារពិភពលោក។ ក្រោយការដាក់ដេញថ្លៃចប់សព្វគ្រប់ គម្រោងចំនួន ៣ កញ្ចប់ត្រូវបានក្រសួង ក្រុមហ៊ុនឯកជន និងធនាគារពិភពលោកចុះកិច្ចព្រមព្រៀង ដើម្បីធ្វើការជួសជុល និងសាងសង់ ខណៈគម្រោងចំនួន ២ ទៀតក្រោយការដេញថ្លៃរួចរាល់ក៏កំពុងត្រៀមចុះកិច្ចព្រមព្រៀង សម្រាប់ធ្វើការជួសជុល និងសាងសង់ក្នុងពេលឆាប់ៗផងដែរ។
លោកបញ្ជាក់ថា៖ «៥ កញ្ចប់នេះ គឺបានដេញថ្លៃរួចហើយ ហើយបានចុះកិច្ចសន្យា ដើម្បីដំណើរការគម្រោងចំនួន ៣ រួចហើយ។ ចំពោះគម្រោង ២ កញ្ចប់ទៀត គឺប្រហែលជាចុះកិច្ចសន្យានៅអំឡុងខែ ៣ អីហ្នឹងដោយគម្រោងទាំងអស់នេះ យើងបានដាក់ជូនធនាគារពិភពលោករួចអស់ហើយ»។
យ៉ាងណាក្តី លោក ហេង រ័ត្នពិសិដ្ឋ មិនទាន់អាចបញ្ជាក់លម្អិត ជុំវិញគម្រោងទាំង ៥ កញ្ចប់បានទេថា តើនឹងត្រូវចំណាយថវិកាប៉ុន្មាន និងកញ្ចប់នីមួយៗត្រូវធ្វើការស្តារ និងស្ថាបនាត្រង់ចំណុចណាខ្លះនោះទេដោយគ្រាន់តែបញ្ជាក់ថា គម្រោងទាំង ៥ កញ្ចប់ គឺសម្រាប់ស្តារ និងស្ថាបនាដោយផ្តោតទៅលើកន្លែងដែលមានបញ្ហា និងប្រឈមនឹងការជន់លិច ឬខូចខាតធ្ងន់ធ្ងរ។
លោកបញ្ជាក់ថា៖ «ដោយសារតែស្ថានភាពផ្លូវជាតិលេខ ៤ នេះមានស្ថានភាពខុសៗគ្នា ហើយគម្រោងនីមួយៗត្រូវការកញ្ចប់ថវិកាដោយឡែក សម្រាប់ធ្វើការស្តារ និងស្ថាបនាផ្លូវទើបបានជាក្រសួងសាធារណការ និងធនាគារពិភពលោក ដែលជាការផ្តល់ទុនវិនិយោគត្រូវធ្វើការបែងចែកការស្ថាបនាផ្លូវទាំងនេះជាកញ្ចប់ៗ»។
លោក ស៊ូ ស៊ុន្ធរ៉ា ប្រធានមន្ទីរសាធារណការ និងដឹកជញ្ចូនខេត្តកំពង់ស្ពឺបានប្រាប់ភ្នំពេញប៉ុស្តិ៍នៅថ្ងៃទី ៣១ មករាថា តាមរយៈការអនុវត្តគម្រោងពង្រីកផ្លូវជាតិលេខ ៤ នេះ មន្ត្រីជំនាញបានចុះមកវាស់វែង និងជួសជុលកន្លែងមានសំបុកមាន់ជាបន្តបន្ទាប់តាមបណ្តាយផ្លូវដែលកាត់តាមខេត្តកំពង់ស្ពឺនេះ។
លោកមើលឃើញថា ក្រោយគម្រោងនេះត្រូវបានអនុម័ត និងប្រគល់ឱ្យក្រុមហ៊ុនវិនិយោគធ្វើការស្តារ និងស្ថាបនានោះបញ្ហាដែលប្រជាពលរដ្ឋតែងតែជួបប្រទះក្នុងពេលធ្វើដំណើរនឹងត្រូវបានកាត់បន្ថយ ហើយវានឹងចូលរួមផ្តល់អត្ថប្រយោជន៍ដល់ការធ្វើដំណើររបស់ពលរដ្ឋ។ លោកបញ្ជាក់ថា៖ «ខាងក្រុមហ៊ុនគេបានចុះមកវាស់វែង និងបិទសំបុកមាន់បន្តពីមន្ទីរសាធារណការខេត្តហើយ។ គេបានដើរជួសជុលផ្លូវសម្បុកមាន់ (ផ្លូវខូច) ពីមន្ទីរយើង។ ចំពោះខេត្តយើងបានរាយការណ៍ជូនក្រសួងរួចហើយនូវចំណុចដែលប៉ះពាល់ខ្លាំង ដែលយើងឃើញថា ត្រង់បង្គោលគីឡូម៉ែត្រ ៤៣ ចន្លោះគីឡូម៉ែត្រ ៦៦ ទៅ ៦៧ ជាដើម ព្រោះកន្លែងហ្នឹង គឺតែងតែដក់ទឹក និងលិចទឹកជាប្រចាំ»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជាបានលើកឡើងថា ការស្តារ និងស្ថាបនាផ្លូវនេះ គឺរឿងមួយចាំបាច់បំផុត ព្រោះផ្លូវ ១ ខ្សែនេះគឺជាផ្លូវតភ្ជាប់ទៅតំបន់ទេសចរណ៍ និងជាផ្នែកដ៏សំខាន់មួយសម្រាប់សេដ្ឋកិច្ចរបស់កម្ពុជា។ ការស្តារ និងស្ថាបនាផ្លូវនេះក៏មានលក្ខណៈសំខាន់ផងដែរដល់សុវត្ថិភាពចរាចរណ៍ ដែលលោករំពឹងថា គម្រោងស្តារ និងស្ថាបនាផ្លូវនេះនឹងអាចធ្វើឱ្យបាន ២ គន្លងទៅ ២ គន្លងមក ដើម្បីផ្តល់ភាពងាយស្រួល និងកាត់បន្ថយការកកស្ទះជាពិសេសគ្រោះថ្នាក់ចរាចរណ៍។
លោកបញ្ជាក់ថា៖ «រដ្ឋាភិបាលគឺគាត់មានការយកចិត្តទុកដាក់ហើយ តែខ្ញុំសុំបន្ថែមឱ្យមានការយកចិត្តទុកដាក់ខាងសុវត្ថិភាពចរាចរណ៍ ដោយបន្ថែមឱ្យមាននូវស្លាកសញ្ញាសុវត្ថិភាពត្រឹមត្រូវ។ បើអាចធ្វើបានដូចផ្លូវជាតិលេខ ៣ មានបំពាក់កាមេរ៉ាមានស្ពានអាកាសឆ្លងសម្រួលដល់ការធ្វើដំណើរ គឺជារឿងប្រសើរ។ តែទាំងនេះ ក៏អាស្រ័យទៅលើធនធានរបស់រដ្ឋាភិបាលដែរ»។
យ៉ាងណាក្តីសម្រាប់លោក គឹម បញ្ញា យល់ថា ការស្តារ និងស្ថាបនាផ្លូវជាតិលេខ ៤ នេះក៏គួរតែធ្វើការសាងសង់ ឬស្ថាបនាបន្ទាប់ពីផ្លូវល្បឿនលឿនបានសាងសង់ចប់រួចរាល់ ព្រោះថានៅពេលមានការសាងសង់ផ្លូវ ១ ខ្សែនេះ គឺច្បាស់ជាមានការបិទផ្លូវដែលធ្វើឱ្យមានការកកស្ទះដល់ការធ្វើដំណើរ បង្កការរំខាន និងខាតបង់ពេលវេលាជាដើម។
សូមជម្រាបថា កន្លងមករដ្ឋាភិបាលធ្លាប់ប្រកាសថា ផ្លូវជាតិលេខ ៤ នេះ គឺគ្រោងនឹងពង្រីកទំហំពី ៧ ទៅ ១០ ម៉ែត្របន្ថែមទៀតពីលើផ្លូវដែលមានស្រាប់ លើកលែងតែកន្លែងខ្លះដែលបានពង្រីករួចហើយ ដូចជានៅម្តុំទីរួមខេត្តកំពង់ស្ពឺ និងខណ្ឌចោមចៅ រាជធានីភ្នំពេញ៕
