កំពង់ចាមៈ វិស័យទឹកស្អាត និងវិស័យអគ្គិសនីនៅក្នុងខេត្តកំពង់ចាមមានវិសាលភាពគ្របដណ្តប់ទូទាំងខេត្តជិត ១០០ ភាគរយហើយគិតត្រឹមដើមឆ្នាំ ២០២២ នេះដោយខេត្តនឹងខិតខំជំរុញឱ្យបាន ១០០ ភាគរយនៅត្រឹមឆ្នាំ ២០២៥។
នៅសន្និសីទសារព័ត៌មានស្ដីពី “វឌ្ឍនភាពមូលដ្ឋានឃុំ- សង្កាត់ និងទិសដៅការងារបន្ដរបស់រដ្ឋបាលខេត្តកំពង់ចាម” នៅព្រឹកថ្ងៃទី ១ ខែកុម្ភៈ ប្រធានក្រុមប្រឹក្សាខេត្តកំពង់ចាម លោក ខ្លូត ផន មានប្រសាសន៍ថាវិស័យទឹកស្អាតមានវិសាលភាពគ្របដណ្តប់ទូទាំងខេត្តបានចំនួន ១០៧ ឃុំ លើ ១០៩ ឃុំសង្កាត់ ស្មើនឹង ៩៨ , ១៦ ភាគរយ និងភូមិចំនួន ៨៧០ ភូមិ លើ ៩១៦ ភូមិ ស្មើនឹង ៩៤, ៣២ ភាគរយ។ រីឯ វិស័យអគ្គិសនីបានភ្ជាប់បណ្តាញប្រើប្រាស់ចំនួន ៩១៤ ភូមិ លើ ៩១៦ ភូមិ ស្មើនឹង ៩៩, ៧៨ ភាគរយដែលមានប្រជាពលរដ្ឋប្រើប្រាស់ចំនួនជាង ២១ ម៉ឺនខ្នងផ្ទះ។
លោកបញ្ជាក់ថា៖ «អ៊ីចឹងរឿងអគ្គិសនី និងទឹកស្អាតក៏ជារឿងអច្ឆរិយដែរ ព្រោះកម្ពុជាយើងអត់ដែលជួប ទើបតែសម័យនេះទេ សម័យតេជោនិយាយដល់ខេត្តកំពង់ចាមនៅសល់តែ ២ ភូមិទៀតទេរឿងអគ្គិសនី»។
លោកបន្តថា ប្រជាជនខេត្តកំពង់ចាមមានអគ្គិសនីប្រើប្រាស់ និងទឹកស្អាតស្ទើរទាំងអស់ ទោះនៅចុងកាត់មាត់ញកណាក៏មាន។ លោកបានរៀបរាប់បទពិសោធខ្វះទឹកកាលពី ៧ ឆ្នាំមុនថា៖ «កាលពីឆ្នាំ ២០១៦ ជួបហានិភ័យគ្រោះអត់ទឹកប្រើ រដ្ឋបាលខេត្តយកឡានទឹកដឹកជូនប្រជាពលរដ្ឋ ពិសេសនៅស្រុកបាធាយ និងស្រុកកងមាស។ ប៉ុន្តែមកដល់ឥឡូវបានដល់ស្ទើរគ្រប់កន្លែង ប្រជាជនយើងមិនមានការខ្វះខាតទឹកសម្រាប់ប្រើប្រាស់ប្រចាំថ្ងៃ»។
ប្រធានមន្ទីរធនធានទឹក និងឧតុនិយម លោក អ៊ុម វិបុល មានប្រសាសន៍ថា វិស័យទឹកស្អាតនៅខ្វះ ២ ឃុំទៀតដែលពុំទាន់មានអ្នកវិនិយោគស្ថិតនៅស្រុកស្ទឹងត្រង់។ លោកថា៖ «ឃុំទាំង ២ នេះ ដោយសារជាតំបន់ឃុំដាច់ស្រយាលនៅឆ្ងាយពីប្រភពទឹកហើយសក្តានុពលនៃការវិនិយោគ មិនមានភាពអំណោយផល គឺប្រជាពលរដ្ឋ មិនមានលក្ខណៈរស់នៅផ្តុំគ្នា ហើយរស់នៅរាយប៉ាយ អ៊ីចឹងធ្វើឱ្យកត្តាវិភាគសេដ្ឋកិច្ចក្នុងការវិនិយោគលើវិស័យទឹកស្អាត គេមិនមានចំណាប់អារម្មណ៍»។
យ៉ាងណាមិញលោកបានគូសបញ្ជាក់ថា ពាក់ព័ន្ធគោលនយោបាយរបស់រាជរដ្ឋាភិបាលលើវិស័យទឹកស្អាតនៅឆ្នាំ ២០២៣ គឺ ៩០ ភាគរយនឹងទទួលបានសេវាកម្មទឹកស្អាតប្រើប្រាស់ ហើយនៅឆ្នាំ ២០២៥ គឺ ១០០ ភាគរយទទួលបានសេវាកម្មទឹកស្អាតប្រើប្រាស់។
បន្ថែមពីនេះលោកបានជំរុញដល់សេវាករដែលមានអាជ្ញាប័ណ្ណស្រាប់ គួរពង្រីកបណ្តាញចែកចាយទឹកដើម្បីឱ្យដល់គោលដៅមូលដ្ឋានប្រជាជន។
ពាក់ព័ន្ធវិស័យអគ្គិសនីដែលនៅសល់ ២ ភូមិទៀតខ្វះអគ្គិសនីប្រើប្រាស់ ក្នុងចំណោម ៩១៦ ភូមិប្រធានមន្ទីររ៉ែ និងថាមពល លោក លី ចាន់ធី បានថ្លែងថា៖ «២ ភូមិដែលមិនទាន់មានអគ្គិសនីប្រើប្រាស់នោះជាភូមិនៅតំបន់ដាច់ស្រយាល ទី ១ ភូមិតំបន់កោះតូចនៅស្រុកកងមាស ដោយសារទីតាំងនោះជាតំបន់កោះ នៅកណ្តាលទន្លេ ធ្វើឱ្យមានការពិបាកក្នុងការតបណ្តាញអគ្គិសនីចូល»។
លោកបញ្ជាក់ថា៖ «ភូមិមួយទៀតនៅស្រុកស្ទឹងត្រង់ ដោយសារទីតាំងនេះនៅតំបន់ចម្ការកៅស៊ូ ហើយវាជាចម្ការកៅស៊ូរបស់ឯកជន ដូច្នេះពាក់ព័ន្ធការវិនិយោគនេះ អគ្គិសនីកម្ពុជា និងអគ្គិសនីខេត្តក៏បានខិតខំពង្រីកទៅទីនោះដែរ ប៉ុន្តែបច្ចុប្បន្ននៅមានការដោះស្រាយពីបញ្ហានេះសិន»។
ពាក់ព័ន្ធការអភិវឌ្ឍខេត្តលោក ខ្លូត ផន បានលើកឡើងថា គោលនយោបាយវិមជ្ឈការ និងវិសហមជ្ឈការដែលបានផ្តល់សិទ្ធិអំណាច និងផ្តល់មូលនិធិដល់ឃុំ សង្កាត់បានដើរតួនាទីយ៉ាងសំខាន់ក្នុងការអភិវឌ្ឍនៅតាមមូលដ្ឋាន និងសម្រេចបានសមិទ្ធផលជាច្រើន។
លោកបានបន្តថា ការអនុវត្តគម្រោងក្នុងខេត្តក្នុងឆ្នាំ ២០២១ រដ្ឋបាលខេត្តបានអភិវឌ្ឍចំនួន ១៧ គម្រោង រីឯឃុំសង្កាត់ ១៣៩ គម្រោង និងនៅស្រុកមាន ៣៤ គម្រោង។
លោកបន្តទៀតថាក្រោយពីរាជរដ្ឋាភិបាលដាក់ចេញនូវគោលនយោបាយវិមជ្ឈការ និងវិសហមជ្ឈការ គឺជារឿងថ្មីមួយសម្រាប់កម្ពុជា ដើម្បីសម្រួលកិច្ចការផ្សេងទៀតឱ្យទៅកៀកនឹងប្រជាពលរដ្ឋ។ លោកថា៖ «ខ្ញុំលើកឧទាហរណ៍ថា ការអភិវឌ្ឍឃុំមួយកន្លងមកយើងមិនទាន់ទម្លាក់មូលនិធិឱ្យឃុំ សង្កាត់យើងមិនទាន់មានការបោះឆ្នោតជ្រើសរើសក្រុមប្រឹក្សា ឃុំ-សង្កាត់នៅឆ្នាំ ២០០២»។
លោកបានបន្តថា៖ «អ៊ីចឹងឃុំ សង្កាត់អត់មានថវិកាទេ អ្វីៗគឺក្រសួងស្ថាប័ន និងរាជរដ្ឋាភិបាលជាអ្នកអនុវត្ត ហើយឃុំខ្លះបាន ឃុំខ្លះអត់បានទេ ប៉ុន្តែដល់យើងធ្វើគោលនយោបាយវិមជ្ឈការ និងវិសហមជ្ឈការ ក្រោយការបោះឆ្នោត ២០០២ មក ឃុំ-សង្កាត់មានមូលនិធិផ្ទាល់ខ្លួនហើយមកដល់ឥឡូវមូលនិធិនេះពី ១ ឆ្នាំទៅ ១ ឆ្នាំកាន់តែកើនដែលយើងអាចសម្រេច និងអភិវឌ្ឍន៍នៅក្នុងមូលដ្ឋានឃុំ-សង្កាត់ បានច្រើន»៕