.jpg)
ទីតាំងអង្គភាពប្រឆាំងអំពើពុករលួយនៅតាមបណ្ដោយមហាវិថីព្រះនរោត្តមកាលពីឆ្នាំមុន។ ហុង មិនា
ភ្នំពេញៈ ក្នុងរយៈពេល ១ ខែអង្គភាពប្រឆាំងអំពើពុករលួយ (អ.ប.ព.) ទទួលបានឯកសារប្រកាសទ្រព្យសម្បត្តិ និងបំណុលជាង ១ ម៉ឺនច្បាប់ដោយក្នុងនោះមានក្រសួងស្ថាប័នរាជធានីខេត្តជិត ៦០ ស្ថាប័នបានបញ្ចប់ការប្រកាសរបស់ខ្លួន ១០០ ភាគរយ ខណៈអ្នកនៅសេសសល់មានតែប្រមាណ ៣០ នាក់ប៉ុណ្ណោះ។
កាលពីខែតុលាឆ្នាំមុន អង្គភាពប្រឆាំងអំពើពុករលួយបានចេញសេចក្ដីជូនដំណឹង ស្ដីពីកាលបរិច្ឆេទទទួលឯកសារប្រកាសទ្រព្យសម្បត្តិ និងបំណុលតាមរបប ២ ឆ្នាំ សម្រាប់ឆ្នាំ ២០២២ ដែលមានរយៈពេល ១ ខែពេញគិតចាប់ពីថ្ងៃទី ១ មករា ដល់ថ្ងៃទី ៣១ ខែមករា ឆ្នាំ ២០២២។
អង្គភាពប្រឆាំងអំពើពុករលួយបានឱ្យដឹងក្នុងសេចក្តីជូនដំណឹងស្ដីពីលទ្ធផលនៃការទទួលឯកសារប្រកាសទ្រព្យសម្បត្តិ និងបំណុលតាមរបប ២ ឆ្នាំសម្រាប់ឆ្នាំ ២០២២ ថា ត្រឹមថ្ងៃទី ៣១ មករា នាយកដ្ឋានប្រកាសទ្រព្យសម្បត្តិ និងបំណុលបានទទួលឯកសារប្រកាសទ្រព្យសម្បត្តិ និងបំណុលសរុប ១៤ ៤៤៧ ច្បាប់ ខណៈក្នុងថ្ងៃចុងក្រោយ គឺទទួលបានចំនួន ១២ ច្បាប់។
អ.ប.ព. បានឱ្យដឹងបន្តថា ចំពោះក្រសួងស្ថាប័ន និងរាជធានី-ខេត្ត ដែលបានបញ្ចប់ការប្រកាស ១០០% គឺមានចំនួន ៥៨ ស្ថាប័នដោយក្នុងនោះក្រសួង-ស្ថាប័នថ្នាក់ជាតិមានចំនួន ៣៣ ស្ថាប័ន និងរាជធានី-ខេត្ត ដែលជាស្ថាប័នថ្នាក់ក្រោមជាតិមានចំនួន ២៥។
អង្គភាពប្រឆាំងអំពើពុករលួយបានបញ្ជាក់ថា «ក្រសួង-ស្ថាប័នចំនួន ៣៣ ដែលបានបញ្ចប់ការប្រកាសទ្រព្យសម្បត្តិ ១០០ ភាគរយ គឺមាន ១- គណៈកម្មាធិការជាតិរៀបចំការបោះឆ្នោត ២- ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ៣- ក្រសួងកិច្ចការនារី ៤- ស្ថាប័នប្រឆាំងអំពើពុករលួយ ៥- ក្រសួងសាធារណការ និងដឹកជញ្ជូន ៦- ក្រសួងព្រះបរមរាជវាំង ៧- អាជ្ញាធរសវនកម្មជាតិ ៨- ធនាគារជាតិនៃកម្ពុជា ៩- ក្រសួងបរិស្ថាន ១០- ក្រសួងយុត្តិធម៌ ១១- ក្រសួងសេដ្ឋកិច្ច និងហិរញ្ញវត្ថុ»។
ស្ថាប័ននេះបញ្ជាក់បន្តថា៖ «១២- ក្រសួងអប់រំ យុវជន និងកីឡា ១៣- ក្រសួងការងារ និងបណ្ដុះបណ្ដាលវិជ្ជាជីវៈ ១៤- ក្រសួងផែនការ ១៥- ក្រសួងកសិកម្ម រុក្ខាប្រមាញ់ និងនេសាទ ១៦- ក្រសួងធនធានទឹក និងឧតុនិយម ១៧- ក្រុមប្រឹក្សាធម្មនុញ្ញ ១៨ -ក្រសួងទេសចរណ៍ ១៩- ក្រសួងប្រៃសណីយ៍ និងទូរគមនាគមន៍ ២០- ឧត្តមក្រុមប្រឹក្សាសេដ្ឋកិច្ចជាតិ ២១- ក្រសួងធម្មការ និងសាសនា ២២- ក្រសួងសុខាភិបាល ២៣- ក្រុមប្រឹក្សាអភិវឌ្ឍន៍កម្ពុជា ២៤- ក្រសួងវប្បធម៌ និងវិចិត្រសិល្បៈ ២៥- ក្រសួងអភិវឌ្ឍន៍ជនបទ ២៦- ក្រសួងរ៉ែ និងថាមពល ២៧- ព្រឹទ្ធសភា ២៨- ក្រសួងសង្គមកិច្ច អតីតយុទ្ធជន និងយុវនីតិសម្បទា ២៩- ក្រសួងមហាផ្ទៃ ផ្នែករដ្ឋបាលស៊ីវិល ៣០- ក្រសួងការបរទេស និងសហប្រតិបត្តិការអន្តរជាតិ ៣១- រដ្ឋលេខាធិការដ្ឋានអាកាសចរណ៍ស៊ីវិល ៣២- ទីស្តីការគណៈរដ្ឋមន្ត្រី និង ៣៣- ទីស្តីការក្រសួងការពារជាតិ»។
ចំពោះរាជធានី-ខេត្ត ២៥ វិញអង្គភាពប្រឆាំងអំពើពុករលួយបានឱ្យដឹងដែរថា គឺមាន ១- ខេត្តមណ្ឌលគិរី ២- ខេត្តពោធិ៍សាត់ ៣- ខេត្តកំពង់ចាម ៤- ខេត្តត្បូងឃ្មុំ ៥-ខេត្តរតនគិរី ៦- ខេត្តស្វាយរៀង ៧- ខេត្តក្រចេះ ៨- ខេត្តបន្ទាយមានជ័យ ៩- ខេត្តតាកែវ ១០- ខេត្តកែប ១១- ខេត្តកណ្តាល ១២- ខេត្តកោះកុង ១៣- រាជធានីភ្នំពេញ ១៤- ខេត្តព្រះសីហនុ ១៥- ខេត្តកំពង់ធំ ១៦- ខេត្តសៀមរាប ១៧- ខេត្តកំពត ១៨- ខេត្តប៉ៃលិន ១៩- ខេត្តឧត្តរមានជ័យ ២០- ខេត្តកំពង់ស្ពឺ ២១- ខេត្តព្រៃវែង ២២- ខេត្តព្រះវិហារ ២៣- ខេត្តស្ទឹងត្រែង ២៤- ខេត្តកំពង់ឆ្នាំង និង ២៥- ខេត្តបាត់ដំបង។
ក្រៅពីការទទួលឯកសារប្រកាសតាមរបប ២ ឆ្នាំ អង្គភាពប្រឆាំងអំពើពុករលួយក៏បានទទួលឯកសារប្រកាសទ្រព្យសម្បត្តិ និងបំណុលពីមន្ត្រីចំនួន ៤១៥ រូបតាមមូលហេតុផ្សេងទៀត ដូចជា ការតែងតាំងថ្មីចំនួន ២៩៦ រូប ការលាឈប់ពីការងារចំនួន ១៣ រូប និងការបញ្ឈប់ពីការងារ ២ រូបរួមទាំងការចូលនិវត្តន៍ចំនួន ១០៤ រូប។
លោក ខូយ លឹមហុង ឧបការីនៃអង្គភាពប្រឆាំងអំពើពុករលួយបានប្រាប់ភ្នំពេញប៉ុស្តិ៍នៅថ្ងៃទី ១ កុម្ភៈថា រហូតមកទល់ពេលនេះ មន្ត្រីដែលត្រូវជាប់កាតព្វកិច្ចប្រកាសទ្រព្យសម្បត្តិ និងបំណុលក្នុងឆ្នាំ ២០២២ នេះ ហើយមិនទាន់មកបានមកប្រកាសគឺមានចំនួនតិចតួចបំផុត។
លោកបានបញ្ជាក់ថា៖ «ក្នុងការប្រកាសក្នុងពេលនេះ គឺមានស្ថាប័នចំនួនប៉ុន្មានដែរ ដែលមន្ត្រីគាត់មិនទាន់មកប្រកាសគ្រប់។ គ្រាន់តែថា ចំនួននេះ គឺតិចតួចបំផុត ក្រោយការពិនិត្យមើលទៅ គឺចំនួននេះមិនដល់ ៣០ នាក់ទេ ហើយក្រសួងនីមួយៗហ្នឹង ដោយសារមិនទាន់បានបញ្ចប់ ១០០ ភាគរយ ដូចក្រសួងពាណិជ្ជកម្មអី ដោយសារតែនៅសល់មន្ត្រីម្នាក់អីអ៊ីចឹងទៅ។ ក្នុងចំណោម ៣០ នាក់នេះ គឺមួយចំនួនយើងទាក់ទងអត់បាន ចំណែកមួយចំនួនទៀតគាត់ទៅរស់នៅក្រៅប្រទេស»។
យ៉ាងណា លោក ខូយ លឹមហុង បានអះអាងថា អង្គភាពប្រឆាំងអំពើពុករលួយនៅតែទុកឱកាសដល់មន្ត្រី ឬអ្នកដែលជាប់កាតព្វកិច្ចនេះឱ្យមកប្រកាសទ្រព្យសម្បត្តិ និងបំណុលរបស់ខ្លួនដោយលើកមូលហេតុសមស្រប ក៏ប៉ុន្តែចំពោះអ្នកមានចេតនាគេចវេះនឹងត្រូវប្រឈមមុខនឹងច្បាប់ជាធរមាន។
បើតាមលោក ខូយ លឹមហុង មន្ត្រីទូទាំងប្រទេសដែលជាប់កាតព្វកិច្ចត្រូវប្រកាសទ្រព្យសម្បត្តិ និងបំណុលសរុប គឺមានប្រមាណ ៥ ម៉ឺននាក់ក្នុងនោះអ្នកត្រូវការប្រកាសក្នុងឆ្នាំសេសមានប្រមាណ ៣ ៥០០០ នាក់ ខណៈអ្នកត្រូវប្រកាសក្នុងឆ្នាំគូមានប្រមាណ ១៥ ០០០ នាក់។
លោកបានពន្យល់ថា៖ «យើងប្រកាសនេះគឺរបប ២ ឆ្នាំមានន័យថា អ្នកដែលប្រកាសក្នុងឆ្នាំគូត្រូវនឹងឆ្នាំ ២០១៨ ឬ ២០២០ និង ២០២២ នេះឯង ដោយអ្នកណាដែលបានប្រកាសទ្រព្យសម្បត្តិនៅក្នុងឆ្នាំគូតាំងពីដំបូង គឺគាត់នឹងបន្តកាតព្វកិច្ចនេះរហូតមកអ៊ីចឹងឯង។ ចំណែក ១ ផ្នែកទៀត គឺគាត់ប្រកាសឆ្នាំសេស ដូចជា អ្នកនឹងត្រូវប្រកាសឆ្នាំ ២០២៣ គឺអ្នកដែលធ្លាប់ប្រកាសកាលពីឆ្នាំ ២០១៩ ឬ ២០២១»។
កាលពីឆ្នាំ ២០១១ រាជរដ្ឋាភិបាលកម្ពុជាបានប្រកាសឱ្យមន្ត្រីរាជការគ្រប់បណ្តាស្ថាប័នទាំងអស់ត្រូវប្រកាសទ្រព្យសម្បត្តិជាលើកដំបូង ហើយអ្នកដែលជាប់កាតព្វកិច្ចនេះ គឺមានដូចជា សមាជិកព្រឹទ្ធសភា សមាជិករដ្ឋសភា និងសមាជិករាជរដ្ឋាភិបាល មន្ត្រីសាធារណៈដែលមានអាណត្តិជ្រើសតាំង និងចៅក្រមអាសនៈ ចៅក្រមអយ្យការ សារការី ក្រឡាបញ្ជី និងអាជ្ញាសាលា។
ចំពោះសមាជិកក្រុមប្រឹក្សាជាតិប្រឆាំងអំពើពុករលួយ ប្រធាន អនុប្រធាន និងមន្ត្រីទាំងអស់នៃអង្គភាពប្រឆាំងអំពើពុករលួយ មន្ត្រីរាជការស៊ីវិលយោធា នគរបាលជាតិ និងអ្នករាជការសាធារណៈផ្សេងទៀតដែលត្រូវបានតែងតាំងដោយព្រះរាជក្រឹត្យ ឬអនុក្រឹត្យ មន្ត្រីផ្សេងទៀតដែលតែងតាំងដោយប្រកាស ហើយត្រូវបានកំណត់ឱ្យប្រកាសទ្រព្យសម្បត្តិ និងបំណុលតាមបញ្ជីដែលរៀបចំឡើងដោយអង្គភាពប្រឆាំងអំពើពុករលួយ បន្ទាប់ពីបានពិគ្រោះយោបល់ជាមួយក្រុមប្រឹក្សាជាតិប្រឆាំងអំពើពុករលួយ រួមទាំងថ្នាក់ដឹកនាំនៃសង្គមស៊ីវិលក៏ត្រូវជាប់កាតព្វកិច្ចប្រកាសទ្រព្យសម្បត្តិ និងបំណុលក្នុងរយៈពេល ២ ឆ្នាំម្តងផងដែរ៕
