.jpg)
ក្រុមជនសង្ស័យជាតិចិនក្រោយសមត្ថកិច្ចចាប់ខ្លួនកាលពីចុងខែមុន។ រូបថត ប៉ូលិស
ព្រះសីហនុៈ តុលាការខេត្តព្រះសីហនុកាលពីថ្ងៃទី ៣០ មករាបានសម្រេចឃុំខ្លួនបុរសជាតិចិន ៩ នាក់ក្នុងចំណោម ១១នាក់ ពាក់ព័ន្ធនឹងករណីឃាតកម្ម និងការបង្ខាំងមនុស្សខុសច្បាប់ ខណៈបក្ខពួក ២ នាក់ទៀតនឹងត្រូវបញ្ជូនទៅតុលាការតាមក្រោយ បន្ទាប់ពីមានការប្រទះឃើញសាកសពមនុស្ស ២ នាក់នៅទីតាំង ២ ផ្សេងគ្នាកាលពីថ្ងៃទី ២១ មករា ឆ្នាំនេះ ។
លោក លី ចាន់ដារ៉ា អ្នកនាំពាក្យតុលាការខេត្តព្រះសីហនុប្រាប់ភ្នំពេញ-ប៉ុស្តិ៍នៅថ្ងៃទី ១ កុម្ភៈថា ក្រុមបុរសសង្ស័យជាជនជាតិចិន ៩ នាក់ ដែលពាក់ព័ន្ធនឹងឃាតកម្មត្រូវបានចៅក្រមស៊ើបសួរសាលាដំបូងខេត្តព្រះសីហនុចេញដីកាឃុំខ្លួនបណ្តោះអាសន្នក្នុងពន្ធនាគារកាលពីថ្ងៃទី ៣០ មករា។
ប៉ុន្តែនៅសល់បុរសសង្ស័យជាតិចិន ២ នាក់ទៀតក៏នឹងត្រូវបញ្ជូនទៅសាលាដំបូងខេត្តព្រះសីហនុដែរ បន្ទាប់ពីសមត្ថកិច្ចជំនាញបញ្ចប់ការសាកសួរ និងរៀបចំសំណុំរឿងរួចរាល់។
លោកថ្លែងថា៖ «រឿងនេះចៅក្រមស៊ើបសួរបានបង្គាប់ឱ្យឃុំខ្លួនកាលពីថ្ងៃទី ៣០ ខែមករា ឆ្នាំ ២០២២ ពីបទឃាតកម្មគិតទុកជាមុនតាមមាត្រា ២០០ នៃក្រមព្រហ្មទណ្ឌ និងបទសន្និធិអាវុធដោយគ្មានការអនុញ្ញាត»។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុប្រាប់នៅថ្ងៃទី ១ កុម្ភៈថា ការស្រាវជ្រាវតាមចាប់ខ្លួនក្រុមឧក្រិដ្ឋជនទាំងនេះ គឺលោកបានសហការជាមួយនាយកដ្ឋានកណ្តាលសន្តិសុខក្រសួងមហាផ្ទៃ នាយកដ្ឋានព្រហ្មទណ្ឌនៃស្នងការដ្ឋាននគរបាលខេត្តកណ្តាល ស្នងការដ្ឋាននគរបាលខេត្តកំពត ខេត្តព្រៃវែង និងស្នងការដ្ឋាននគរបាលរាជធានីភ្នំពេញ។
លោកថ្លែងប្រាប់ថា៖ «ក្រុមជនត្រូវចោទទាំងនេះ ភាគច្រើនយើងបានចាប់នៅខេត្តព្រះសីហនុ ខេត្តកណ្តាល និងនៅរាជធានីភ្នំពេញ។ យើងតាមចាប់ពួកនេះជាដំណាក់កាលហើយយើងបញ្ជូនទៅតុលាការបន្តបន្ទាប់ដែរ»។
លោកឧត្តមសេនីយ៍ទោស្នងការបានឱ្យដឹងថា កាលពីនៅថ្ងៃទី ២១ ខែមករា ឆ្នាំ ២០២២ កម្លាំងជំនាញនៃស្នងការដ្ឋាននគរបាលខេត្តព្រះសីហនុបានទទួលព័ត៌មានថា មានករណីប្រទះឃើញសាកសពដែលគេកប់ក្នុងដី និងមានសភាពហើមស្អុយនៅ ២ ទីតាំងផ្សេងពីគ្នា។
ទីតាំងទី ១ នៅចំណុចខាងក្រោយតំបន់ឆាយណាថោនស្ថិតនៅក្រុមទី ៨ ភូមិ ៦ សង្កាត់ ៤ ក្រុង-ខេត្តព្រះសីហនុ។
ជនរងគ្រោះឈ្មោះ LI HONG ហៅ Da Da ភេទប្រុស អាយុ ៣០ ឆ្នាំ ជនជាតិចិន និងទីតាំងទី ២ នៅចំណុចភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ជនរងគ្រោះជាជនជាតិអាស៊ី ភេទស្រី អាយុប្រហែលពី ២០ ទៅ ២៥ ឆ្នាំមានកម្ពស់ ១,៥៥ ម៉ែត្រសម្បុរស សក់ពណ៌ទង់ដែងមិនទាន់កំណត់បានអត្តសញ្ញាណ។
លោកបន្តថា ចាប់ពីមានហេតុការណ៍ប្រទះឃើញសាកសពរហូតដល់ថ្ងៃទី ៣១ ខែមករា ឆ្នាំ ២០២២ មកគឺកម្លាំងសមត្ថកិច្ចរបស់លោកឃាត់ខ្លួនបានជនសង្ស័យ និងអ្នកពាក់ព័ន្ធហេតុការណ៍មកសួរបំភ្លឺសរុបចំនួន ១៣ នាក់។
ប៉ុន្តែក្នុងនោះមានតែបុរសជនជាតិចិនចំនួន ១១ នាក់ប៉ុណ្ណោះដែលជាប់ពាក់ព័ន្ធ រីឯស្ត្រីជនជាតិវៀតណាមម្នាក់ និងស្ត្រីជនជាតិចិនម្នាក់ទៀតត្រូវបានដោះលែងវិញដោយសាររកមិនឃើញមានជាប់ពាក់ព័ន្ធនឹងករណីនេះ។
លោកបន្ថែមថា ក្រុមឧក្រិដ្ឋជនទាំង ១១ នាក់ខាងលើមានមនុស្ស ៦ នាក់ជាប់ពាក់ព័ន្ធនឹងករណីឃាតកម្ម។ ចំណែកឯមនុស្ស ៥ នាក់ទៀតពាក់ព័ន្ធនឹងការបង្ខាំងមនុស្សខុសច្បាប់ ដែលក្រុមជនសង្ស័យបានបង្ខាំងបុរសជនជាតិចិនចំនួន ៣ នាក់។ ក្រុមនេះមានជនជាតិចិនចំនួន ៥ នាក់ត្រូវបានសមត្ថកិច្ចចាប់ខ្លួន៕
