ភ្នំពេញៈ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុបានប្រកាសពីការចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ ២០២១ នៅតាមគោលដៅមួយចំនួនលើកំណាត់ផ្លូវសំខាន់ៗនៃរាជធានី-ខេត្ត ដោយចាប់ផ្ដើមពីថ្ងៃទី ១ ខែកុម្ភៈឆ្នាំ ២០២២ តទៅ។
យោងតាមលិខិតជូនដំណឹងរបស់អគ្គនាយកដ្ឋានពន្ធដារស្តីពីការចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ ២០២១ ដែលភ្នំពេញ ប៉ុស្តិ៍ទទួលបាននៅថ្ងៃទី ១ ខែកុម្ភៈ បានឱ្យដឹងថា មន្ត្រីពន្ធដារនឹងដឹកនាំ ក្រុមការងារចម្រុះ រាជធានី ខេត្ត ចុះពិនិត្យយានយន្តដែលមិនទាន់បង់ពន្ធលើមធ្យោបាយដឹកជញ្ជូននៅតាមគោលដៅមួយចំនួន ។
ក្នុងលិខិតសរសេរថា «ក្រុមការងារចម្រុះ រាជធានី-ខេត្ត ដឹកនាំដោយមន្ត្រីពន្ធដារ រួមសហការជាមួយអាជ្ញាធរមានសមត្ថកិច្ចថ្នាក់ក្រោមជាតិនឹងចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ ២០២១ នៅតាមគោលដៅមួយចំនួនលើកំណាត់ផ្លូវសំខាន់ៗនៃរាជធានី-ខេត្ត ចាប់ពីថ្ងៃទី ១ ខែកុម្ភៈឆ្នាំ ២០២២ តទៅ»។
អគ្គនាយកដ្ឋានពន្ធដារបានឱ្យដឹងទៀតថា ការចុះប្រតិបត្តិការនេះធ្វើឡើងដោយអនុលោមតាមប្រកាស លេខ ៥៣១ សហវ.ប្រក ចុះថ្ងៃទី ៣០ ខែឧសភា ឆ្នាំ ២០១៨ របស់ក្រសួងសេដ្ឋកិច្ច និងហិរញ្ញវត្ថុ និងចំណារឯកភាពរបស់លោកនាយករដ្ឋមន្ត្រី ហ៊ុន សែន ចុះថ្ងៃទី ៣០ ខែធ្នូ ឆ្នាំ ២០២០ លើលិខិតលេខ ១០៧៦៥ សហវ, អពដចុះថ្ងៃទី ២៥ ខែធ្នូ ឆ្នាំ ២០២០ របស់ក្រសួងសេដ្ឋកិច្ច និងហិរញ្ញវត្ថុ។
លិខិតដដែលបានបញ្ជាក់ថា ករណីម្ចាស់យានយន្តខកខានមិនបានប្រកាសបង់ពន្ធលើមធ្យោបាយដឹកជញ្ជូន និងយានជំនិះប្រចាំឆ្នាំ ២០២១ កន្លងទៅសូមរួសរាន់ទៅប្រកាសបង់ពន្ធ និងបង់ប្រាក់ពិន័យតាមច្បាប់ជាធរមាននៅអគ្គនាយកដ្ឋានពន្ធដារ ឬនៅតាមសាខាពន្ធដារខេត្ត-ខណ្ឌ ឬនៅធនាគារកាណាឌីយ៉ា ក.អ ឬនៅធនាគារអេស៊ីលីដា ភីអិលស៊ី ឬនៅធនាគារវឌ្ឍនៈ ឬនៅធនាគារកម្ពុជាសាធារណៈឬនៅធនាគារ ជេ ត្រាស់ រ៉ូយ៉ាល់ ឬនៅធនាគារស្ថាបនាភីអិលស៊ី ឬនៅធនាគារប្រៃសណីយ៍កម្ពុជា ក.អ ឬនៅធនាគារវឌ្ឍនៈអាស៊ីចំកាត់ (ABA) ឬអាចបង់តាមរយៈកម្មវិធី “GDT Taxpayer App” ដែលអាចទាញយកចេញពី App Store ចំពោះ iOS ឬ Play Store ចំពោះ Android សម្រាប់យានយន្តដែលធ្លាប់បានប្រកាសបង់ពន្ធកន្លងមក ។
ក្នុងលិខិតនោះ អគ្គនាយកដ្ឋានពន្ធដារបានបង្ហាញក្តីសង្ឃឹមថា ម្ចាស់យានយន្តទាំងអស់នឹងគោរពកាតព្វកិច្ចសារពើពន្ធ និងរួសរាន់ទៅប្រកាសបង់ពន្ធឱ្យបានគ្រប់ៗគ្នា និងបានទាន់ពេលវេលាស្របតាមបទប្បញ្ញត្តិនៃច្បាប់ដើម្បីចៀសវាងនូវក្រុមការងារចម្រុះឃាត់យានយន្តតាមផ្លូវតម្រូវឱ្យបង់ប្រាក់ពន្ធដែលនាំឱ្យខកខានពេលវេលា និងកកស្ទះចរាចរណ៍ ដែលអាចកើតមាននូវបាតុភាពអសកម្មដោយប្រការណាមួយជាយថាហេតុ។
ភ្នំពេញប៉ុស្តិ៍មិនអាចទាក់ទងសុំការបំភ្លឺពីលោក សែម រតនា ប្រធានការិយាល័យចរាចរណ៍ជើងគោករាជធានីភ្នំពេញបានទេ នៅថ្ងៃទី ១ ខែកុម្ភៈ ប៉ុន្តែ លោក សាន សុខសីហា អ្នកនាំពាក្យនៃស្នងការដ្ឋាននគរបាលរាជធានីភ្នំពេញប្រាប់ថា ចំពោះកិច្ចការងារនេះ មន្ត្រីពន្ធដារជាអ្នកដឹកនាំ ចំណែកសមត្ថកិច្ចនគរបាលគ្រាន់តែចូលរួមសហការ ហេតុនេះបើទទួលបានការស្នើសុំសហការនឹងចុះអនុវត្តការងារភ្លាម។
លោក ចាន់ សុធី នាយការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តបាត់ដំបង និងលោក ពុធ ស៊ីង នាយការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តកំពតបានថ្លែងដូចគ្នាកាលពីថ្ងៃទី ១ ខែកុម្ភៈថា មន្ត្រីពន្ធដារបានស្នើសុំកម្លាំងមន្ត្រីនគរបាលចរាចរណ៍ក្នុងខេត្តនីមួយៗចំនួន ៣ រូប ដើម្បីចូលរួមការចុះពិនិត្យយាន្តយន្ត ដែលមិនទាន់បានបង់ពន្ធផ្លូវ ប៉ុន្តែចំពោះការចុះទៅកាន់គោលដៅណាថ្ងៃណានោះ មន្ត្រីពន្ធដារមិនទាន់បានបញ្ជាក់ប្រាប់ឱ្យច្បាស់នៅឡើយទេ៕
វីដេអូ៖