.jpg)
ពលរដ្ឋនៅឃុំត្រពាំងជោរតវ៉ាប្រឆាំងការឈូសដីជម្លោះ។ រូបថត សហការី
កំពង់ស្ពឺៈ ពលរដ្ឋ ៦ នាក់នៅស្រុកឱរ៉ាល់ដែលមានជម្លោះដីធ្លីជាមួយឈ្មោះ ប៉ែន សារិទ្ធ ទាហាន «ង ៧០» ហើយត្រូវបានតុលាការកោះហៅឱ្យចូលបំភ្លឺនៅថ្ងៃទី ២៧ ខែមករា បានដាក់ពាក្យសុំពន្យារពេលទៅថ្ងៃទី ១៤ ខែកុម្ភៈវិញ ដោយសារទើបតែទទួលបានមេធាវីមិនទាន់បានពិភាក្សាពីរឿងក្តីនៅឡើយ ខណៈដែលអាជ្ញាធរបានបញ្ជាក់ថា ដីជម្លោះនោះគឺជាដីរបស់ភាគីដើមបណ្តឹងដែលមិនស្ថិតនៅក្នុងដីសហគមន៍ពលរដ្ឋឡើយ។
លោក សឹង សុខុម តំណាងប្រជាពលរដ្ឋក្នុងជម្លោះដីធ្លីនេះ ថ្លែងនៅថ្ងៃទី ៣១ ខែមករាថា ពលរដ្ឋ ៦ នាក់បានទៅដាក់ពាក្យសុំពន្យារពេលចូលបំភ្លឺនៅអយ្យការអមសាលាដំបូងខេត្តកំពង់ស្ពឺកាលពីថ្ងៃទី ២៦ ខែមករាដើម្បីស្វែងរកមេធាវី។ តំណាងពលរដ្ឋម្នាក់នេះប្រាប់ថា មកដល់ថ្ងៃទី ៣១ ខែមករាមានមេធាវីមកពីអង្គការលីកាដូព្រមជួយការពារក្តីចំពោះពលរដ្ឋទាំង ៦ នាក់ហើយ ប៉ុន្តែនៅមិនទាន់បានជជែកពិភាក្សាគ្នានៅឡើយ។
លោក សឹង សុខុម អះអាងថា បញ្ហាជម្លោះដីធ្លីនេះកើតឡើងដោយសារខាងក្រុមទាហាន «ង៧០» បានទៅយកដីសហគមន៍ឧត្តមស្រែពស់ស្ថិតនៅឃុំត្រពាំងជោរ ស្រុកឱរ៉ាល់ ដោយមានអនុក្រឹត្យជាសំអាង ប៉ុន្តែការចូលមកយកដីនេះគឺមិនបានពិភាក្សាជាមួយប្រជាពលរដ្ឋក្នុងសហគមន៍ ដែលខំការពារថែរក្សានៅទីនោះទេ ហេតុនេះទើបប្រជាពលរដ្ឋក្នុងសហគមន៍មិនព្រម និងបានធ្វើការប្តូរវេនគ្នាយាមទីតាំងនេះ។
លោកប្រាប់ថា រូបភាពនៃការចូលមកយកដីសហគមន៍ដោយប្រើឈ្មោះ ក្រុមទាហាន «ង៧០» ដោយរបៀបខិលខូចមានច្រើនដងមកហើយ។ ក្នុងនោះលើកទី ១ គឺស្នើសុំឱ្យទៅទាហាន «ង៧០» សម្រាប់យុទ្ធជនពិការ ៤១ គ្រួសារមានផ្ទៃដីចំនួន ៧៨ហិកតា ប៉ុន្តែការពិត គឺមិនបានទៅលើយុទ្ធជនពិការ ៤១ គ្រួសារពិតប្រាកដនោះទេ គឺធ្លាក់ទៅលើដៃបុគ្គលប៉ុន្មាននាក់ បានយកដីនោះទៅលក់យកលុយចែកគ្នា។
លោកថ្លែងថា៖ «យើងបានកាត់ដីឱ្យមួយសាទៅ ប៉ុន្តែវាអត់បានទាហាន ង៧០ ឯណាមកនៅបាន ៤១ គ្រួសារទេ បានតែពួកគាត់ប៉ុន្មាននាក់នឹងលក់ដូរ ហើយធ្វើចម្ការ ធ្វើអ្នកមានអ្នកបានអ៊ីចឹងទៅ»។
បន្ទាប់មកមានការស្នើសុំកាត់ដីសហគមន៍លើកទី ២ ម្តងទៀត (មិនចាំទំហំដីពិតប្រាកដ) ក៏សហគមន៍យល់ព្រមឱ្យទៀត។ ជាក់ស្តែងព្រៃសហគមន៍ បច្ចុប្បន្ននៅសល់ប្រមាណជា ៧០០ ហិកតាប៉ុណ្ណោះ។ ចំណែកលើកទី ៣នេះ ក៏នៅតែពុំបានសួរយោបល់ប្រជាពលរដ្ឋដែលខំថែរក្សាដីព្រៃសហគមន៍ ហើយបានយកគ្រឿងចក្រមកឈូសឆាយយកដីព្រៃសហគមន៍នេះកាលពីថ្ងៃ ២៣ និង ២៤ ខែ វិច្ឆិកា ឆ្នាំ ២០២១ បានប្រមាណ ៦ ទៅ ៧ ហិកតា ប៉ុន្តែដោយមានពលរដ្ឋប្រមាណ ៦០០ នាក់បានទៅហាមឃាត់ទើបដកគ្រឿងចក្រចេញវិញ។
លោកបញ្ជាក់ថា បន្ទាប់មកក៏មានពាក្យបណ្ដឹងទៅស្នងការព្រហ្មទណ្ឌកម្រិតធ្ងន់ខេត្ត ដែលមានទាំងឈ្មោះរបស់លោកផងដែរ ដែលរងការចោទប្រកាន់ពីបទបំផ្លិចបំផ្លាញទ្រព្យសម្បត្តិអ្នកដទៃ និងជេរប្រមាថជាសាធារណៈដែលពេលនោះ មានប្រជាពលរដ្ឋប្រមាណ ៦០០ នាក់បានឡើងទៅគាំទ្រតំណាងសហគមន៍ដែលរងការចោទប្រកាន់នោះ ទើបស្នងការខេត្តពន្យារការសាកសួរវិញ។
តំណាងពលរដ្ឋប្រាប់ថាតំណាងអយ្យការអមសាលាដំបូងខេត្តកំពង់ស្ពឺបានកោះហៅតំណាងពលរដ្ឋចំនួន ៦ នាក់រួមមាន លោក សឹង សុខុម លោក សយ សាត លោក ឈន ធា លោក ឡោ សុខលី លោក ឈន សារិទ្ធ និង លោក ឈួន ខឿន ចោទពីបទធ្វើឱ្យខូចខាតដោយចេតនា គំរាម កំហែង ជេរប្រមាថជាសាធារណៈ និងញុះញង់បង្កអសន្តិសុខប៉ះពាល់សង្គម និងតម្រូវឱ្យចូលខ្លួនទៅសាលាដំបូងខេត្តកំពង់ស្ពឺនៅថ្ងៃទី ២៧ ខែមករា ឆ្នាំ ២០២២។
យោងតាមដីកាកោះរបស់លោក ទិន សុចិត្រា ព្រះរាជអាជ្ញារង តំណាងអយ្យការអមសាលាដំបូងខេត្តកំពង់ស្ពឺឱ្យដឹងថា អយ្យការកោះហៅពលរដ្ឋទាំង ៦ នាក់ ដើម្បីសាកសួរពីដំណើររឿងដែលឈ្មោះ ប៉ែន សារិទ្ធ បានប្តឹងពាក់ព័ន្ធករណីធ្វើឱ្យខូចខាតដោយចេតនា គំរាមកំហែង ជេរប្រមាថជាសាធារណៈ និងញុះញង់បង្កអសន្តិសុខប៉ះពាល់សង្គមដែលប្រព្រឹត្តនៅចំណុចភូមិពោធិ៍មាស ឃុំត្រពាំងជោរ ស្រុកឱរ៉ាល់ កាលពីថ្ងៃទី ១៩ ខែតុលា ឆ្នាំ ២០២១។
លោក ប៉ែន សារិទ្ធ ដែលជាភាគីដើមបណ្តឹង មិនអាចទាក់ទងសុំអត្ថាធិប្បាយលើបញ្ហានេះបានទេ។ ប៉ុន្តែ លោក ទេព ណែម មេឃុំត្រពាំងជោរថ្លែងថា ដីព្រៃដែលមានគ្រឿងចក្រចូលឈូសឆាយ ស្ថិតក្នុងភូមិពោធិ៍មាស ឃុំត្រពាំងជោរ នោះជាដីរបស់ក្រសួងបរិស្ថានស្ថិតក្រោមការគ្រប់គ្រងរបស់ដែនជម្រកសត្វព្រៃភ្នំឱរ៉ាល់ ដែលប្រមុខរដ្ឋាភិបាលសម្រេចធ្វើប្រទានកម្មជាកម្មសិទ្ធិជូនគ្រួសារយោធិន ៤១ គ្រួសារ ដែលមានលោក ប៉ែន សារិទ្ធ ជាតំណាងសម្រាប់សាងសង់លំនៅឋាន និងបង្កបង្កើនផល។
លោកមេឃុំថា៖ «ខាងទាហាន គាត់សុំស្នើដី ១ កន្លែងហ្នឹងប្រហែលជាង ២០០ ហិកតា សម្រាប់គ្រួសារកងទ័ព។ ដីហ្នឹងវាមិននៅក្នុងសហគមន៍ទេវានៅជាប់ដីសហគមន៍ផ្នែកខាងជើង»។
យោងតាមអនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន នៅថ្ងៃទី ២០ ខែសីហា ឆ្នាំ ២០២១ បញ្ជាក់ថា មានការធ្វើអនុប្បយោគផ្ទៃដីទំហំ ២៦២,២៤ ហិកតាក្នុងដែនជម្រកសត្វព្រៃភ្នំឱរ៉ាល់ភូមិសាស្ត្រភូមិពោធិ៍មាស ឃុំត្រពាំងជោរ ជាទ្រព្យសម្បត្តិឯកជនរបស់រដ្ឋ ដើម្បីធ្វើប្រទានកម្មជាកម្មសិទ្ធិជូនក្រុមគ្រួសារយោធិនបញ្ជាការដ្ឋានរថក្រោះកងទ័ពជើងគោក និងពលរដ្ឋសរុបចំនួន ៤១ គ្រួសារសម្រាប់សាងសង់លំនៅឋាន និងបង្កបង្កើនផលស្របច្បាប់។
ចំណែកលិខិតរបស់មន្ទីរបរិស្ថានខេត្តកំពង់ស្ពឺនៅថ្ងៃទី ១៣ ខែតុលា ២០២១ បញ្ជាក់ថា បានស្នើសុំដាក់គ្រឿងចក្រចំនួន ៥ គ្រឿង សម្រាប់ចុះកំណត់ព្រំ និងឈូសឆាយដីក្រុមគ្រួសារយោធិនបញ្ជាការដ្ឋានរថក្រោះកងទ័ពជើងគោក និងប្រជាពលរដ្ឋចំនួន ៤១ គ្រួសារនៅទីតាំងនោះត្រូវបានអភិបាលខេត្តកំពង់ស្ពឺចុះហត្ថលេខាឯកភាពផងដែរ។
លោក អំ សំអាត នាយករង អង្គការលីកាដូថ្លែងថា ដើម្បីដោះស្រាយបញ្ហានេះបាន អាជ្ញាធរពាក់ព័ន្ធរួមជាមួយប្រជាពលរដ្ឋគួរតែជួបជជែកគ្នា ដើម្បីស្វែងរកដំណោះស្រាយល្អជាងការតតាំងគ្នាតាមផ្លូវតុលាការ។ លោកថា ពលរដ្ឋចង់រក្សាព្រៃទុកជារបស់រួមជាសម្បត្តិរដ្ឋ ចំណែករដ្ឋាភិបាលកាត់ឆ្វៀលដីប្រគល់ជូនអតីតយុទ្ធជនក៏ជាមធ្យោបាយរបស់រាជរដ្ឋាភិបាលដើម្បីដោះស្រាយជូនអតីតយុទ្ធជនដែរ។
លោកថា៖ «អ៊ីចឹងចំណុចហ្នឹង មានការខ្វែងគំនិតគ្នាដែលគួរណាស់តែជួបជជែកគ្នា ហើយនិងស្វែងរកដំណោះស្រាយឱ្យបានត្រឹមត្រូវ សមរម្យណាមួយ ដើម្បីបញ្ចៀសអំពីបាតុភាពដែលកើតឡើងហ្នឹង ជាពិសេសយើងមិនចង់ឃើញទេទាក់ទងនឹងការប្តឹងផ្តល់សហគមន៍ ឬតំណាងសហគមន៍ទៅតុលាការវាជាវិធីសាស្ត្រមួយដែលមិនល្អ»៕
