.jpg)
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ រូបថត ក្រសួងអប់រំ
ភ្នំពេញៈ ក្រសួងអប់រំ យុវជន និងកីឡាជូនដំណឹងដល់ប្រធានមន្ទីរអប់រំ រាជធានីខេត្ដឱ្យរៀបចំដំណើរការប្រឡងប្រណាំងជ្រើសរើសជយលាភីលេខ ១ ថ្នាក់ក្រោមជាតិ រួចបញ្ជូនមកក្រសួងឱ្យបានមុនថ្ងៃទី ២២ ខែកុម្ភៈ ឆ្នាំ ២០២២ ដើម្បីជ្រើសរើសជយលាភីថ្នាក់ជាតិ ពានរង្វាន់លោកនាយករដ្ឋមន្ដ្រី ហ៊ុន សែន នៅក្នុងទិវាជាតិអំណានលើកទី ៧ ឆ្នាំនេះ។
យោងតាមសេចក្ដីជូនដំណឹង ចុះហត្ថលេខាដោយលោក ហង់ជួន ណារ៉ុន រដ្ឋមន្ដ្រីក្រសួងអប់រំជម្រាបទៅប្រធានមន្ទីរអប់រំរាជធានី ខេត្ដ កាលពីថ្ងៃទី ៣១ ខែមករា បានឱ្យដឹងថា ក្រសួងអប់រំនឹងរៀបចំកម្មវិធីប្រឡងប្រណាំងអានអត្ថបទ ស្មូតកំណាព្យ និងតែងនិពន្ធ ជ្រើសរើសជយលាភីថ្នាក់ជាតិ ពានរង្វាន់ របស់លោក ហ៊ុន សែន ដើម្បីអបអរសាទរទិវាជាតិអំណានលើកទី ៧ ក្រោមប្រធានបទ «អំណានជួយលើកកម្ពស់គុណភាពជីវិតក្នុងសង្គមឌីជីថល»។
សេចក្ដីជូនដំណឹងបញ្ជាក់ថា៖ «អាស្រ័យដូចបានជម្រាបជូនខាងលើ សូមលោក លោកស្រីប្រធានរៀបចំដំណើរការប្រឡងប្រណាំងជ្រើសរើសជយលាភីលេខ ១ ថ្នាក់ក្រោមជាតិទាំង ៣ វិញ្ញាសា ដោយថតជាវីដេអូ (វិញ្ញាសាអានអត្ថបទ និងស្មូតកំណាព្យ) និងស្នាដៃសំណៅដើមរបស់ជយលាភីផ្នែកតែងនិពន្ធរួចបញ្ចូនមកនាយកដ្ឋាន អភិវឌ្ឍន៍កម្មវិធីសិក្សាឱ្យបានមុនថ្ងៃទី ២២ ខែកុម្ភៈ ឆ្នាំ ២០២២ ជាកំហិត»។
វិញ្ញាសាប្រឡងប្រណាំងទាំង ៣ នេះរួមមាន ការតែងនិពន្ធ (អត្ថបទពាក្យកាព្យ ឬពាក្យរាយ) សម្រាប់សិស្សមធ្យមសិក្សាទុតិយភូមិ។ ការស្មូតកំណាព្យ សម្រាប់សិស្សមធ្យមសិក្សាបឋមភូមិ និងការអានអត្ថបទសម្រាប់សិស្សបឋមសិក្សា។
បើតាមសេចក្ដីជូនដំណឹង កាលបរិច្ឆេទប្រឡងប្រណាំងយកជ័យលាភីថ្នាក់ជាតិនឹងធ្វើឡើងនៅថ្ងៃទី ៩ ដល់ទី ១០ ខែមីនា ឆ្នាំ ២០២២។ ទីកន្លែងប្រឡងនៅអគាររដ្ឋបាលថ្មី ក្រសួងអប់រំជាប់សាលាបឋមសិក្សាចៅពញាហុក។ សម្រាប់ព័ត៌មានបន្ថែមចំពោះការប្រឡងនេះអាចទំនាក់ទំនងលេខទូរស័ព្ទ និងតេឡេក្រាម ០១២ ៩២ ៨៦ ៩១។
លោក ហោ សុខៈ នាយកកម្មវិធីអំណាន និងជាអ្នកជំនាញខាងអំណាននៃអង្គការ Room to Read ប្រចាំកម្ពុជាបានលើកឡើងថា នៅពេលដែលមេរោគកូវីដ ១៩ បានចូលមកដល់ប្រទេសកម្ពុជា ការងារអំណាន វិស័យអំណាន កាន់តែដើរតួនាទីសំខាន់ ចំពោះប្រជាជនកម្ពុជាគ្រប់រូប ពិសេសមាតាបិតា អ្នកអាណាព្យាបាល ពីព្រោះនៅអំឡុងពេលសាលារៀនផ្អាកបណ្ដោះអាសន្ន គឺមិនមានគ្រូទៅបង្រៀនដល់ផ្ទះឡើយ គឺមានតែពួកគេរៀនដោយខ្លួនឯងតាមរយៈការអាន។
លោកបានឱ្យដឹងថា ក្នុងដំណាក់កាលនៃការរីករាលដាលមេរោគកូវីដ ១៩ អង្គការ Room to Read បានផលិតសៀវភៅសម្រាប់ឪពុកម្ដាយបង្រៀនកូននៅតាមផ្ទះ និងបង្កើតបណ្ដាញក្រុមតេឡេក្រាមជាមួយឪពុកម្ដាយនៅតាមតំបន់ខេត្ដគោលដៅដែលក្នុងនោះមានសាលារៀនជាង ២៦០ សាលារៀនបង្កើនសកម្មភាពការអានដល់កុមារនៅតាមផ្ទះ តាមរយៈការផ្ញើជូនវីដេអូមេរៀន ការអានប្រចាំថ្ងៃជាដើម។ ជាលទ្ធផលមានឪពុកម្ដាយ អ្នកអាណាព្យាបាលសិស្សរាប់ម៉ឺននាក់បានចូលរួមក្នុងសកម្មភាពនេះ។ លោកថ្លែងថា៖ «ទិវាជាតិអំណានជារៀងរាល់ឆ្នាំ ដែលក្រសួងអប់រំរៀបចំឡើងគោលបំណងរួម គឺដើម្បីជំរុញដល់សិស្សានុសិស្ស កុមារ ឱ្យមានការសិក្សាស្រាវជ្រាវ អាន និងសង្ខេប មេរៀនដោយខ្លួនឯងដែលវាជាផ្នែកមួយជំរុញដល់ការអាន»។
បើតាមលោក សុខៈ ក្នុងទិវាអំណានឆ្នាំនេះ ក្រសួងអប់រំបានអនុញ្ញាតឱ្យលោកធ្វើជាវាគ្មិនមួយរូបក្នុងចំណោមវាគ្មិនកិត្តិយសដើម្បីធ្វើបទបង្ហាញដល់សាលារៀនទាំងអស់បានឃើញថា តើត្រូវធ្វើយ៉ាងណាឱ្យមានសកម្មភាពនៃការអាន និងមានទម្លាប់អាននៅក្នុងសាលារៀន។ លោកបញ្ជាក់ថា៖ «អ្វីដែលក្រសួងចង់ឱ្យខ្ញុំបង្ហាញក្នុងទិវាអំណាននាថ្ងៃទី ១១ មីនាខាងមុខនោះ គឺបង្ហាញពីសូចនាករធំៗដែលសាលារៀនថ្នាក់រៀន ឬក៏បណ្ណាល័យដែលគាំទ្រជួយដល់បំណិននៃការអាននោះថាតើមានលក្ខណៈបែបម៉េចជាដើម»។
ទិវាជាតិអំណានលើកទី ៦ ឆ្នាំមុន ក្រសួងអប់រំបានរៀបចំតាមអនឡាញក្រោមប្រធានបទ «អំណានក្នុងបរិបទកូវីដ-១៩»។ មានមនុស្សប្រមាណ ៣០០ នាក់បានចូលរួមតាមប្រព័ន្ធអនឡាញហ្ស៊ូម។ នៅក្នុងទិវាជាតិអំណានឆ្នាំមុនបានរៀបចំឡើងក្រោមប្រធានបទជាច្រើនយកមកពិភាក្សាចាប់ពីថ្ងៃទី ១២ ដល់ថ្ងៃទី ១៤ ខែមីនា ឆ្នាំ ២០២១ ដោយហៅថា សប្តាហ៍សៀវភៅ៕
