ភ្នំពេញៈ នគរបាលខណ្ឌមានជ័យកំពុងរៀបចំសំណុំរឿងដើម្បីបញ្ជូនបុរសសង្ស័យម្នាក់ទៅតុលាការ បន្ទាប់ពីសមត្ថកិច្ចចាប់ខ្លួនកាលពីថ្ងៃទី ៣១ មករា ឆ្នាំ ២០២២ ពាក់ព័ន្ធចាប់នារីម្នាក់រំលោភសេពសន្ថវៈប្រព្រឹត្តនៅសង្កាត់ស្ទឹងមានជ័យទី ៣។
លោក ហ៊ុន រតនា អធិការរងនគរបាលខណ្ឌមានជ័យឱ្យដឹងនៅថ្ងៃទី ១ កុម្ភៈថា ជនសង្ស័យឈ្មោះ ហេង ហៀង អាយុ ៣០ ឆ្នាំមានរបរជាកម្មករសំណង់។ រីឯនារីរងគ្រោះឈ្មោះ ស.ប អាយុ ២៩ ឆ្នាំជាស្ត្រីមេម៉ាយ និងមានរបរជាកម្មការិនីរោងចក្រកាត់ដេរ ដែលទាំង ២ នាក់ស្នាក់នៅបន្ទប់ជួលក្បែរគ្នាក្នុងភូមិដំណាក់ធំ ៣ សង្កាត់ស្ទឹងមានជ័យទី ៣។
លោកប្រាប់ថា៖ «ឥឡូវនេះយើងក៏កំពុងកសាងសំណុំរឿងដើម្បីត្រៀមបញ្ជូនជនសង្ស័យទៅតុលាការចាត់ការតាមផ្លូវច្បាប់ដែរ»។ លោក រតនា មិនបានបញ្ជាក់លម្អិតពីមូលហេតុនៃដំណើររឿងនេះទេ។ ប៉ុន្តែបើតាមមន្ត្រីនគរបាលប៉ុស្តិ៍សង្កាត់ស្ទឹងមានជ័យទី ៣ បានប្រាប់ដោយសុំមិនឱ្យបញ្ចេញឈ្មោះថារវាងជនសង្ស័យ និងនារីរងគ្រោះស្នាក់នៅបន្ទប់ជួលក្បែរគ្នាជាន់ទី ៤ ហើយជនសង្ស័យ ក៏មានប្រពន្ធកំពុងរស់នៅជាមួយគ្នាផងដែរ។ លុះនៅថ្ងៃទី ៣១ មករា ឆ្នាំ ២០២២ ដែលជាថ្ងៃសែនចូលឆ្នាំចិន ជនសង្ស័យរួមទាំងអ្នករស់នៅក្បែរៗបន្ទប់ជួលនោះបានជុំគ្នាផឹកស៊ី។ ជនសង្ស័យបានផឹកស្រាស្រវឹងខ្លាំងរហូតដល់ម៉ោងជាង ៧ យប់ ហើយជនសង្ស័យបានដើរចេញពីវង់ផឹកស៊ីទៅគោះទ្វារបន្ទប់របស់នារីរងគ្រោះ។ ដោយសារតែឮសំឡេងជនសង្ស័យទើបជនរងគ្រោះបើកទ្វារបន្ទប់ស្រាប់តែជនសង្ស័យចាប់នារីរងគ្រោះរំលោភរហូតបានសម្រេចតែម្តង។ ក្រោយពីជនសង្ស័យរំលោភរួចនាងក៏មកប្តឹងនគរបាលប៉ុស្តិ៍សង្កាត់ស្ទឹងមានជ័យទី ៣។
មន្ត្រីដដែលបន្ថែមថា៖ «ពេលនោះប្រហែលជាជនសង្ស័យមិនចាប់អារម្មណ៍ថា ជនរងគ្រោះប្តឹងនគរបាលផងក៏មិនដឹងទើបមិនរត់គេចខ្លួន ហើយកម្លាំងយើងបានចាប់គាត់នៅយប់ថ្ងៃដដែលនោះ បន្ទាប់ពីបង្កហេតុ ប្រហែលកន្លះម៉ោង»។ ក្រោយចាប់ខ្លួនជនសង្ស័យបានសារភាពប្រាប់សមត្ថកិច្ចថា រូបគេពិតជាបានចាប់រំលោភនារីរងគ្រោះបានសម្រេច ១ លើកពិតប្រាកដមែន តែនៅពេលនោះរូបគេស្រវឹងស្រាធ្វើឱ្យបាត់បង់ស្មារតី។
លោក ឈុន សារ៉ាវី មេភូមិដំណាក់ធំ៣ សង្កាត់ស្ទឹងមានជ័យឱ្យដឹងថា ពិតជាមានករណីរំលោភសេពសន្ថវៈនៅក្នុងមូលដ្ឋានរបស់លោកមែនកាលពីថ្ងៃទី ៣១ មករា ហើយរវាងនារីរងគ្រោះ និងជនសង្ស័យជាបងប្អូនធម៌នឹងគ្នា។ លោកមេភូមិ សារ៉ាវី ថា៖ «វាពិបាកដែរ ឥឡូវនេះ ព្រោះមនុស្សស្រី និងមនុស្សប្រុស បងធម៌ប្អូនធម៌នឹងគ្នានេះពិបាកស្មានបានដែរ។ ខាងប្រុសមើលឃើញប្អូនធម៌សាច់សខ្ចីទប់ចិត្តមិនបាន វាកើតទៅជារឿងបែបនេះទៅ»៕