.jpg)
មន្ត្រីសាធារណការបើកម៉ូតូចេញពីក្រសួង។ រូប ក្រសួងសាធារណការ
ភ្នំពេញៈ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនជំរុញឱ្យមន្ត្រីនៅក្នុងក្រសួងនេះ ត្រូវធ្វើជាគំរូដល់ពលរដ្ឋក្នុងការគោរពច្បាប់ចរាចរណ៍ ខណៈមានការកើនឡើងនៃចំនួនអ្នកស្លាប់ដោយសារគ្រោះថ្នាក់ចរាចរណ៍នៅក្នុងខែមករាកន្លងមក ដោយកើនដល់ ៦ នាក់ក្នុង ១ ថ្ងៃដែលបង្កឱ្យខាតបង់សេដ្ឋកិច្ចប្រមាណ ៤៥០ លានដុល្លារ ក្នុង ១ ឆ្នាំ។
លោកបានថ្លែងយ៉ាងដូច្នេះនៅក្នុងពិធីសំណេះសំណាលជាមួយមន្ត្រីរាជការ ដែលប្រើប្រាស់ទោចក្រយានយន្តរបស់ក្រសួងសាធារណការ និងដឹកជញ្ជូនកាលពីថ្ងៃទី ២ កុម្ភៈ ដោយក្នុងនោះ មន្ត្រីរាជការប្រមាណជាង ១ ០០០ នាក់បានទទួលមួកសុវត្ថិភាព ដោយឥតគិតថ្លៃ។
លោក ស៊ុន ចាន់ថុល បានថ្លែងថា មន្ត្រីរាជការ ជាពិសេសអ្នកបើកបរយានយន្តរបស់ក្រសួង គឺត្រូវធ្វើជាគំរូដល់ពលរដ្ឋក្នុងការគោរពច្បាប់ចរាចរណ៍ ហើយអ្នកបើកបរម៉ូតូ គឺត្រូវតែពាក់មួកសុវត្ថិភាពជាប្រចាំ។ លោកបានណែនាំយ៉ាងដូច្នេះ ព្រោះតែតួលេខក្នុងពេលថ្មីៗនេះ ចំនួនអ្នកស្លាប់ដោយសារគ្រោះថ្នាក់ចរាចរណ៍ត្រូវបានរកឃើញថាក្នុងចំណោម ១០០ នាក់គឺមានអ្នកបើកបរម៉ូតូ ៧៨ នាក់ហើយដែលបានស្លាប់ ហើយក្នុងនោះអ្នកមិនពាក់មួកសុវត្ថិភាពមានជាង ៥០ ភាគរយ។
លោកបានបញ្ជាក់ថា៖ «មន្ត្រី ១ ១៤៨ នាក់នេះ គឺត្រូវតែគោរពច្បាប់ចរាចរណ៍ពាក់មួកសុវត្ថិភាព វ៉ាជែងដោយប្រុងប្រយ័ត្ន កុំបើកលើសហួសល្បឿនកំណត់ដោយច្បាប់ ហើយជួយផ្សព្វផ្សាយផង។ បើយើងម្នាក់ៗជួយផ្សព្វផ្សាយឱ្យយល់ពីច្បាប់ចរាចរណ៍ហ្នឹងយើងអាចពន្យល់ឱ្យមានការយល់ដឹងកាន់តែច្រើននៅកម្ពុជាយើង។ មន្ត្រីរបស់យើងចូលរួមហើយធ្វើជាគំរូដល់ពលរដ្ឋយើង»។
បើតាមលោក ស៊ុន ចាន់ថុល កន្លងទៅជាមធ្យម អត្រាស្លាប់ដោយសារគ្រោះថ្នាក់ចរាចរណ៍ក្នុង ១ ថ្ងៃមានប្រមាណ ៥ នាក់។ ប៉ុន្តែបន្ទាប់ពីកម្ពុជាបានបើកប្រទេសឡើងវិញ ដោយសារស្ថានភាពជំងឺកូវីដបានធូរស្រាលចំនួនអ្នកស្លាប់ដោយគ្រោះថ្នាក់ចរាចរណ៍បានកើនឡើងដល់ ៦ នាក់ក្នុង ១ ថ្ងៃដែលលើសជាងការស្លាប់ ដោយសារជំងឺកូវីដ ១៩ ទៅទៀត ព្រោះរយៈពេល ២៨ ថ្ងៃកន្លងមកនេះ គឺមិនមានអ្នកស្លាប់ដោយសារជំងឺកូវីដ ១៩ ឡើយ។
តាមការសិក្សាស្រាវជ្រាវរបស់អង្គការ UNDP គ្រោះថ្នាក់ចរាចរណ៍បានបណ្តាលឱ្យកម្ពុជាខាតបង់ថវិកាកើនឡើងជាបន្តបន្ទាប់ ពោលគឺប្រមាណពី ៤២០ លានដុល្លារដល់ ៤៥០ លានដុល្លារក្នុង ១ ឆ្នាំដែលការខាតបង់នេះដោយសារការចំណាយលើការស្លាប់ ចំណាយលើមន្ទីរពេទ្យ និងការខូតខាតទ្រព្យសម្បត្តិឯកជនសាធារណៈរបស់រដ្ឋផ្សេងៗជាដើម។ នេះបើតាមលោក ស៊ុន ចាន់ថុល។
ដូច្នេះលោក ស៊ុន ចាន់ថុល អំពាវនាវដល់អ្នកប្រើប្រាស់ផ្លូវទាំងអស់ទាំងអ្នកបើកបរម៉ូតូ និងរថយន្តត្រូវគោរពច្បាប់ចរាចរណ៍ឱ្យបានខ្ជាប់ខ្ជួនយល់ពីច្បាប់ចរាចរណ៍ទាំងអស់គ្នា។ ចំណែកក្រុមហ៊ុនដឹកជញ្ជូនត្រូវមានកម្មវិធីបណ្តុះបណ្តាលដល់បុគ្គលិករបស់ខ្លួនពីច្បាប់ចរាចរណ៍ឱ្យបានទូលំទូលាយ ដើម្បីចូលរួមចំណែកកាត់បន្ថយការស្លាប់ និងរបួសដោយសារគ្រោះថ្នាក់ចរាចរណ៍ឱ្យកាន់តែប្រសើរឡើងថែមទៀត។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជាបានវាយតម្លៃខ្ពស់ ចំពោះការខិតខំប្រឹងប្រែងរបស់ក្រសួងសាធារណការក្នុងការបង្កើតការយល់ដឹង និងជំរុញឱ្យមន្ត្រីរបស់ខ្លួនធ្វើជាគំរូក្នុងការផ្សព្វផ្សាយ និងគោរពច្បាប់ចរាចរណ៍ផ្លូវគោក។ លោកលើកទឹកចិត្តឱ្យបណ្តាក្រសួង និងវិស័យឯកជនដទៃទៀតគិតគូរចូលរួមដើម្បីបង្កើតកម្មវិធីនានា និងការអប់រំផ្សព្វផ្សាយដល់សាធារណជនឱ្យចូលរួមគោរពច្បាប់ចរាចរណ៍ទាំងអស់គ្នា ខណៈការចូលរួមរបស់ភាគីពាក់ព័ន្ធនឹងជំរុញដល់ប្រសិទ្ធភាពនៃការទប់ស្កាត់គ្រោះថ្នាក់ចរាចរណ៍បានល្អប្រសើរ។
លោកបញ្ជាក់ថា៖ «ស្របជាមួយគ្នាហ្នឹង យើងក៏ត្រូវមានវិធានការផ្សេងទៀតក្នុងហ្នឹង គឺវិធានការអប់រំផ្សព្វផ្សាយហ្នឹង ដែលជារឿងចាំបាច់មួយដែរ ដែលសុំលើកទឹកចិត្តឱ្យស្ថាប័នរដ្ឋាភិបាល លោកពិនិត្យលទ្ធភាពក្នុងការបង្កើនការអប់រំផ្សព្វផ្សាយស្របជាមួយនឹងការអនុវត្តច្បាប់ជាអាទិភាព»។
ចំពោះការអប់រំទៅដល់ប្រជាពលរដ្ឋ លោក គឹម បញ្ញា លើកទឹកចិត្តឱ្យជ្រើសរើសវិធីសាស្ត្រដូចទៅនឹងការអប់រំផ្សព្វផ្សាយអំពីបញ្ហាកូវីដ ១៩ ដោយមានការចាក់មេក្រូតាមទីប្រជុំជន បញ្ចេញសារអប់រំតាមមធ្យោបាយទូរស័ព្ទជាប្រចាំដោយធ្វើយ៉ាងណាឱ្យពលរដ្ឋបានជ្រួតជ្រាបអំពីបញ្ហាដែលបណ្តាលមកពីគ្រោះថ្នាក់ចរាចរណ៍ និងចូលរួមគោរពច្បាប់ទាំងអស់គ្នា។
សូមជម្រាបថា គ្រោះថ្នាក់ចរាចរណ៍ក្នុងឆ្នាំ ២០២១ បានបណ្ដាលឱ្យមនុស្សស្លាប់ជិត ១ ៥០០ នាក់ក្នុងចំណោមគ្រោះថ្នាក់ ២ ៦៧០ ទូទាំងប្រទេសដោយចំនួននេះមានការថយចុះប្រមាណ ១៥០ នាក់ ឬស្មើនឹង ៩ ភាគរយ បើធៀបនឹងឆ្នាំ ២០២០ ដែលមានអ្នកស្លាប់ចំនួនជាង ១ ៦០០ នាក់។ នេះបើតាមតាមរបាយការណ៍ក្រសួងមហាផ្ទៃដែលបានចេញផ្សាយកាលពីថ្ងៃទី ១ មករា៕
