.jpg)
លោក សុខ សុទ្ធី អភិបាលរង និងជាអ្នកនាំពាក្យរដ្ឋបាលខេត្តកោះកុង។រូប ក្រសួងមហាផ្ទៃ
កោះកុងៈ រដ្ឋបាលខេត្តកោះកុងប្រកាសមិនទទួលយកការដោះស្រាយចំពោះការតវ៉ាទាមទាររបស់សកម្មជនដីធ្លី ១ ក្រុម មាន ៧៤៣ គ្រួសារនៅស្រុកស្រែអំបិល និងស្រុកបទុមសាគរនោះឡើយ ដោយសារពលរដ្ឋក្រុមនេះធ្លាប់ទទួលសំណងទូទាត់តាមគោលនយោបាយរបស់រាជរដ្ឋាភិបាលរួចរាល់ហើយតាំងពីឆ្នាំ ២០១៧។ នេះបើតាមលោក សុខ សុទ្ធី អភិបាលរង និងជាអ្នកនាំពាក្យរដ្ឋបាលខេត្ដកោះកុង។
លោក សុខ សុទ្ធី ឱ្យដឹងថា វិវាទដីធ្លីរវាងប្រជាពលរដ្ឋ និងក្រុមហ៊ុន Koh Kong Plantation Co,LTD និងក្រុមហ៊ុន ស្ករអំពៅត្រូវបានដោះស្រាយបញ្ចប់ជាស្ថាពររួចរាល់ហើយ ដែលរួមមាន ក្រុមប្រជាពលរដ្ឋ ២០០ គ្រួសារ ក្រុមពលរដ្ឋ ១៧៥ គ្រួសារ ក្រុមពលរដ្ឋ ៥៨៥ គ្រួសារ និងក្រុមប្រជាពលរដ្ឋ ៦៧១ គ្រួសារសរុបទាំងអស់ចំនួន ១ ៦៣១ គ្រួសារ។
លោកថា កាលពីអំឡុងខែឧសភា ឆ្នាំ ២០១៩ ស្រាប់តែប្រជាពលរដ្ឋ ៨៤៣ គ្រួសារ បច្ចុប្បន្នជាក្រុម ៧៤៣ គ្រួសារដឹកនាំដោយឈ្មោះ ឈឹម សាផាន បានកៀរគរប្រជាពលរដ្ឋមកពីស្រុកស្រែអំបិល ស្រុកបទុមសាគរ និងស្រុកថ្មបាំង ធ្វើសកម្មភាពតវ៉ានៅមុខសាលាខេត្តកោះកុង និងនៅក្រសួងរៀបចំដែនដី។
តាមការពិនិត្យឯកសារពាក់ព័ន្ធ គឺពួកគាត់ពុំមានឯកសារកាន់កាប់ដីធ្លីឡើយ ហើយចាប់តាំងពីឆ្នាំ ២០០៦ មក ពួកគេពុំមានដាក់ពាក្យបណ្តឹង ឬទាមទារទៅអាជ្ញាធរ ឬស្ថាប័នណាមួយទេ ជាពិសេសក្នុងយុទ្ធនាការរយៈពេល ៣០ ថ្ងៃ ចាប់ពីថ្ងៃទី ៤ កញ្ញា ដល់ថ្ងៃទី ៣ តុលា ឆ្នាំ ២០១៧ ដែលក្រសួងដែនដីចេញសេចក្តីប្រកាសព័ត៌មាន ជាសាធារណៈឱ្យអ្នកពាក់ព័ន្ធទាំងអស់នោះមកបំពេញសលាកបត្រទាមទារ ក៏ពួកគេមិនមានវត្តមានចូលរួមដែរ។
«ទាក់ទិននឹងសកម្មភាពជួបជុំ និងការតវ៉ាប្រមូលផ្តុំជាច្រើនលើក ច្រើនសា ដឹកនាំដោយ ឈឹម សាផាន ជាមេខ្លោងធ្វើឡើងតាំងពីថ្ងៃទី ៦ ខែកក្កដា ឆ្នាំ ២០១៨ ដល់ថ្ងៃទី ១០ ខែធ្នូ ឆ្នាំ ២០២១ នៅទីតាំងផ្សេងៗគ្នា ជាពិសេសអគាររដ្ឋបាលខេត្ត ដើម្បីឱ្យប្រជាពលរដ្ឋតវ៉ាទាមទារខុសច្បាប់នៅទីសាធារណៈមិនចេះឈប់ឈរ»។ លោក សុទ្ធី បញ្ជាក់។
លោកថ្លែងថា៖ «ចំពោះបញ្ហានេះរដ្ឋបាលខេត្តកោះកុង បដិសេធដាច់ខាតមិន [ទទួលយក] ការតវ៉ាទាមទារ ឬដោះស្រាយសកម្មជនដីធ្លីក្រុម ៧៤៣ គ្រួសារនោះទេ»។
លោកថា រដ្ឋបាលខេត្ត ស្នើសុំដល់មេខ្លោង និងប្រជាពលរដ្ឋដែលដោះស្រាយរួចរាល់ហើយ មេត្តាបញ្ចប់សកម្មភាពខុសច្បាប់នេះតទៅទៀត។ ព្រោះសកម្មភាពតវ៉ានេះបង្កឱ្យមានអស្ថិរភាពក្នុងសង្គមប៉ះពាល់ដល់សន្តិសុខសណ្តាប់ធ្នាប់សាធារណៈសេចក្តីថ្លៃថ្នូររបស់សង្គមជាតិ។
លោក សុទ្ធី ឱ្យដឹងថា ឈ្មោះ ឈឹម សាផាន ជាអតីតសកម្មជនអតីតគណបក្សសង្គ្រោះជាតិ ហើយជាមេខ្លោងដឹកនាំប្រជាពលរដ្ឋមកតវ៉ាបញ្ហាដីធ្លីក្នុងខេត្ដកោះកុងធ្វើឱ្យមានភាពចលាចលក្នុងសង្គមជាតិ មិនមែនជាការទាមទារស្វែងរកដំណោះស្រាយលើបញ្ហាដីធ្លីពិតប្រាកដនោះទេ។
លោក សុខ សុទ្ធី ថ្លែងថា៖ «រដ្ឋបាលខេត្ដចេញសេចក្ដីប្រកាសព័ត៌មានហើយថា ករណីសកម្មជនដីធ្លី ១ ក្រុម មានគ្នា ៧៤៣ គ្រួសារ ទោះបីជាយ៉ាងម៉េចក៏រដ្ឋបាលខេត្ដមិនដោះស្រាយឱ្យដែរ។ ដីរបស់ក្រុមហ៊ុនគឺជាដីរបស់រដ្ឋដែលក្រុមហ៊ុនបានជួលពីរដ្ឋ ដូច្នេះរឿងនេះជាកិច្ចការងាររបស់រដ្ឋ»។
លោកថា បច្ចុប្បន្ន រដ្ឋបាលខេត្ដកំពុងធ្វើការងារតាមនីតិវិធីច្បាប់ជាមួយតុលាការលើក្រុមមេខ្យល់ដែលដឹកនាំប្រជាពលរដ្ឋតវ៉ាធ្វើឱ្យមានភាពវឹកវរ ចលាចលក្នុងសង្គមជាតិនេះ។
ភ្នំពេញប៉ុស្តិ៍នៅមិនទាន់អាចរកប្រភពទាក់ទងក្រុមសកម្មជនដីធ្លី ដែលកំពុងមានវិវាទនេះ ដើម្បីសុំការបំភ្លឺបាននៅឡើយទេនាថ្ងៃទី ២ កុម្ភៈ។
លោក ថោង ច័ន្ទតារា មន្ដ្រីសម្របសម្រួលសមាគមសិទ្ធិមនុស្ស (អាដហុក) ប្រចាំខេត្ដកោះកុងឱ្យដឹងថា សកម្មជនដីធ្លី ១ ក្រុម មានគ្នា ៧៤៣ គ្រួសារដែលកំពុងបន្តការតវ៉ាទាមទារឱ្យមានដំណោះស្រាយវិវាទជាមួយ ក្រុមហ៊ុន Koh Kong Plantation Co,LTD និងក្រុមហ៊ុនស្ករអំពៅនោះ ភាគច្រើនជាប្រជាពលរដ្ឋដែលទើបតែបំបែកគ្រួសារថ្មីចេញពីគ្រួសារចាស់នៅក្នុងតំបន់នេះ ហើយពួកគេមិនមានដីធ្លីរស់នៅទើបនាំគ្នាតវ៉ា។
លោក ច័ន្ទតារា បានបញ្ជាក់ថា៖ «កន្លងមក រដ្ឋបាលខេត្ដបានដោះស្រាយបញ្ហាវិវាទដីធ្លីនេះបានមួយចំណែក ប៉ុន្តែប្រជាពលរដ្ឋដែលកើតគ្រួសារថ្មីមានការកើនឡើង ហើយគ្មានដីធ្លីរស់នៅទើបនាំគ្នាតវ៉ាបែបនេះ។ ប៉ុន្ដែបើរដ្ឋបាលខេត្ដប្រកាន់ជំហរថា មិនដោះស្រាយនោះ បញ្ហាវានៅតែកើតមានឡើង។ ដូចកាលពីសប្ដាហ៍មុន ពលរដ្ឋបាននាំគ្នាចូលទៅទន្ទ្រានកាន់កាប់ទីតាំងក្រុមហ៊ុន ដោយពួកគាត់អះអាងថា ជាដីចាស់ដែលពួកគាត់ធ្លាប់រស់នៅកន្លងមក»៕
