កណ្ដាលៈ មន្ត្រីបច្ចេកទេសក្រុងតាខ្មៅចុះពិនិត្យការកែសម្រួលការធ្វើប្រព័ន្ធលូឡើងវិញរបស់ក្រុមហ៊ុន វ៉េង លាភ នៅក្នុងចំណុចភូមិព្រែកសំរោង សង្កាត់រកាខ្ពស់ បន្ទាប់ពីមានប្រតិកម្មពីប្រជាពលរដ្ឋថា ការសាងសង់ខុសបច្ចេកទេស និងមិនត្រូវតាមស្តង់ដាក្នុងកិច្ចសន្យានៃគម្រោងដែលក្រុមហ៊ុនដេញថ្លៃ។
កាលពីថ្មីៗនេះ មានប្រជាពលរដ្ឋជាច្រើនគ្រួសារបានផ្ទុះការតវ៉ា និងប្រតិកម្មចំពោះការសាងសង់កែលម្អលូនៅតាមបណ្តាយផ្លូវកាត់មុខផ្ទះរបស់ខ្លួន ដោយបានអះអាងថា ក្រុមហ៊ុន វ៉េង លាភ បានប្រើល្បិចកេងចំណេញប្រាក់របស់រដ្ឋអស់ជិត ៥០ លានរៀលក្នុងគម្រោងសាងសង់ប្រព័ន្ធលូតាមបណ្តោយផ្លូវបេតុងនៅក្នុងភូមិព្រែកសំរោង សង្កាត់រកាខ្ពស់ ក្រុងតាខ្មៅ ខេត្តកណ្តាល។
លោក ឈឿង ឆូ ចៅសង្កាត់រកាខ្ពស់បានប្រាប់ភ្នំពេញប៉ុស្តិ៍នៅថ្ងៃទី ២ កុម្ភៈថា អាជ្ញាធរ និងមន្ត្រីបច្ចេកទេសរបស់រដ្ឋបាលក្រុងតាខ្មៅបានចុះមកពិនិត្យតាមការប្រតិកម្មរបស់ប្រជាពលរដ្ឋកាលពីថ្ងៃទី ២ កុម្ភៈ។ ការចុះទៅនេះ គឺដើម្បីពិនិត្យភាពមិនប្រក្រតី និងលក្ខណៈបច្ចេកទេសក្នុងការសាងសង់ប្រព័ន្ធលូរបស់ក្រុមហ៊ុននេះឱ្យស្របតាមស្តង់ដា និងកិច្ចសន្យាដែលទទួលបានពីរដ្ឋបាលក្រុង។
លោកបានបញ្ជាក់ថា៖ «ក្រុមហ៊ុនគេធ្វើមិនទាន់ហើយផង តែពលរដ្ឋគាត់ចង់ឱ្យក្រុមហ៊ុនធ្វើ ១ ថ្ងៃឱ្យហើយ។ ការធ្វើការនេះ គឺធ្វើទៅតាមដំណាក់កាលរបស់គេ ដែលពលរដ្ឋ គាត់ចេះតែទាមទារ។ យ៉ាងណា ចំណុចប្រតិកម្មរបស់គាត់ យើងទទួលយក ហើយយើងនឹងចុះទៅពន្យល់ប្រជាពលរដ្ឋឱ្យបានយល់។ យើងចុះទៅនេះ គឺទទួលសំណូមពរពីប្រជាពលរដ្ឋ តើពួកគាត់ចង់បានអ្វី ហើយតើមានការឯកភាពយ៉ាងណា ហៅក្រុមហ៊ុនមកស្តាប់មតិរបស់ពួកគាត់ដែរ»។
បើតាមលោក ឈឿន ឆូ គម្រោងកែលម្អប្រព័ន្ធលូផ្លូវ ១ ខ្សែក្នុងភូមិនេះ គ្រោងនឹងបញ្ចប់នៅចុងខែកុម្ភៈខាងមុខ ហើយក្នុងពេលនេះ ក្រុមហ៊ុន វ៉េង លាភ បានធ្វើការសាងសង់ និងកែលម្អបានប្រមាណជាង ៦០ ភាគរយហើយ។ បន្ថែមពីនេះ លោកក៏បានអះអាងថា គម្រោងកែលម្អនេះ គឺមានការចុះត្រួតពិនិត្យលក្ខណៈបច្ចេកទេសពីមន្ត្រីជាប្រចាំ ដោយមិនមានការធ្វេសប្រហែសនោះឡើយ ដែលលោកសុំឱ្យពលរដ្ឋចូលរួមសហការ និងយោគយល់។
លោក វ៉េង លាភ ប្រធានក្រុមហ៊ុន វ៉េង លាភ មិនអាចស្វែងរកប្រភពដើម្បីទាក់ទងសុំការអត្ថាធិប្បាយបានទេកាលពីម្សិលមិញ។
លោក អ៊ុំ វាសនា មន្ត្រីបច្ចេកទេសប្រចាំក្រុងតាខ្មៅបានប្រាប់សារព័ត៌មានក្នុងស្រុកកាលពីថ្មីៗនេះថា កន្លងទៅក្រុមហ៊ុន វ៉េង លាភ បានទទួលសិទ្ធិបន្តពីរដ្ឋបាលក្រុងតាខ្មៅ ដើម្បីសាងសង់កែលម្អប្រព័ន្ធលូតាមផ្លូវ ១ ខ្សែ ស្ថិតក្នុងសង្កាត់រកាខ្ពស់នេះ។ ក្នុងគម្រោងនោះ គឺក្រុមហ៊ុន វ៉េង លាភ បានដេញថ្លៃគម្រោងសាងសង់ប្រព័ន្ធលូ ដោយត្រូវប្រើប្រាស់កម្រាស់លូ ០,០៧ ម៉ែត្រ ប៉ុន្តែក្រុមហ៊ុនត្រូវបានរកឃើញមានកំហុសបច្ចេកទេស ដោយប្រើប្រាស់សាច់បេតុងកម្រាស់ ០,០៥ ម៉ែត្រមកសាងសង់ខុសគម្រោងដែលខ្លួនដេញថ្លៃ ហើយបញ្ហានេះក៏ត្រូវបានរដ្ឋបាលក្រុងតាខ្មៅតម្រូវឱ្យកែតម្រូវម្តងរួចមកហើយ។
លោកអះអាងថា ហើយក្នុងពេលនេះ គឺក្រុមហ៊ុនដដែលនេះទទួលបានការដេញថ្លៃគម្រោងសាងសង់កែលម្អប្រព័ន្ធលូ ១ ខ្សែទៀតស្ថិតក្នុងសង្កាត់រកាខ្ពស់នេះ ដូច្នេះបើមានករណីដូចអ្វីដែលពលរដ្ឋបានលើកឡើងមែន រដ្ឋបាលក្រុងតាខ្មៅនឹងណែនាំឱ្យក្រុមហ៊ុននេះធ្វើការកែតម្រូវ និងជួសជុលតាមកិច្ចសន្យា៕