.jpg)
អ្នកបើកបររថយន្តកុងតឺន័រ និងរថយន្តធុនធំ ៥ នាក់ ដែលប្រើប្រាស់គ្រឿងញៀន ដែលត្រូវបានសមត្ថកិច្ចអប់រំរួចឱ្យត្រឡប់ទៅផ្ទះ។ រូបថត ប៉ូលិស
កំពង់ស្ពឺៈ អ្នកបើកបររថយន្តកុងតឺន័រ និងរថយន្តដឹកទំនិញធុនធំចំនួន ៥ នាក់ដែលប្រើប្រាស់គ្រឿងញៀន ត្រូវបានសមត្ថកិច្ចណែនាំអប់រំរួចឱ្យទៅផ្ទះវិញ បន្ទាប់ពីឃាត់ខ្លួនកាលពីយប់ថ្ងៃទី ១ ខែកុម្ភៈ នៅតាមបណ្តោយផ្លូវជាតិលេខ ៤១ ក្នុងភូមិសាស្ត្រ ស្រុកគងពិសី និងស្រុកបសេដ្ឋ ខេត្តកំពង់ស្ពឺ។
លោកឧត្តមសេនីយ៍ទោ សម សាមួន ស្នងការនគរបាល ខេត្តកំពង់ស្ពឺឱ្យភ្នំពេញប៉ុស្តិ៍ដឹងនៅថ្ងៃទី ២ កុម្ភៈថា បុរសពេញវ័យជាអ្នកបើកបររថយន្តដឹកទំនិញ ដែលប្រើប្រាស់គ្រឿងញៀនចំនួន ៥ នាក់ត្រូវបានលោកឃាត់ខ្លួនរយៈពេលខ្លី និងប្រាប់ឱ្យសាច់ញាតិពួកគេយកទៅមណ្ឌលបន្សាបគ្រឿងញៀន។ ការឃាត់ខ្លួននេះ បន្ទាប់ពីលោកបានដឹកនាំកម្លាំងនគរបាលជំនាញចរាចរណ៍ចុះដាក់គោលដៅត្រួតពិនិត្យនៅតាមបណ្ដោយ ផ្លូវជាតិលេខ ៤១ ស្ថិតក្នុងស្រុកគងពិសី និងស្រុកបសេដ្ឋ ខេត្តកំពង់ស្ពឺកាលពីយប់ថ្ងៃទី ១ កុម្ភៈ។
លោកបន្តថា បុរសអ្នកបើករថយន្តទាំង ៥ នាក់នោះសុទ្ធតែស៊ីឈ្នួលបើករថយន្តដឹកទំនិញឱ្យក្រុមហ៊ុន ហើយបើមានលិខិតឆ្លងដែន ឬបណ្ណបើកបរ គឺលោកដកហូតទុកជាបណ្តោះអាសន្នសិននៅការិយាល័យចរាចរណ៍ផ្លូវគោកខេត្ត និងឈប់ឱ្យបើកបររថយន្តបន្តទៅទៀត។ បន្ទាប់មកតម្រូវឱ្យម្ចាស់ក្រុមហ៊ុននោះរកអ្នកបើកបររថយន្តផ្សេង ដែលមានបណ្ណបើកបរត្រឹមត្រូវ និងមិនប្រើប្រាស់គ្រឿងញៀនមកបើកបរជំនួស ហើយអនុញ្ញាតឱ្យម្ចាស់ក្រុមហ៊ុននោះយករថយន្តរបស់គាត់ទៅវិញបាន។
លោកថ្លែងថា៖ «សម្រាប់មនុស្សដែលមានផ្ទុកសារធាតុញៀននេះ គឺសុំឱ្យឪពុកម្តាយ ឬក្រុមគ្រួសារអាណាព្យាបាលមកទទួល និងធ្វើកិច្ចសន្យាជាលាយលក្ខណ៍អក្សរយកទៅបន្សាបនៅមណ្ឌល។ តែក្នុងករណីមានលើកទី ២ ហើយនៅតែក្រុមហ៊ុនឱ្យបើកបររថយន្តទៀត បើយើងចាប់បានជាលើកទី ២ គឺយើងនឹងកសាងសំណុំរឿងទៅតុលាការ ដោយចាត់ទុកថាការប្រើប្រាស់គ្រឿងញៀនមិនរាងចាល»។
បើតាមលោកស្នងការ សម សាមួន ចំពោះអ្នកប្រើប្រាស់គ្រឿងញៀន ហើយបើកបររថយន្ត គឺអាចបង្កគ្រោះថ្នាក់ដល់អ្នករួមដំណើរនៅលើដងផ្លូវបានគ្រប់ពេល ព្រោះថា សូម្បីតែអ្នកស្រវឹងស្រានៅតែបើកបុកគេ ចុះទម្រាំអ្នកប្រើប្រាស់គ្រឿងញៀន គឺវារឹតតែខ្លាំងជាងអ្នកស្រវឹងស្រាទៅទៀត។
លោកបានបញ្ជាក់ថា៖ «អាថ្នាំញៀននេះ វាខ្លាំងជាងស្រាទៅទៀត។ វាធ្វើឱ្យបាត់បង់ស្មារតី បាត់បង់សតិហើយទៅបើកបរ ចុះថ្ងៃណាវាធ្វើទុក្ខទៅ វាកាច់ចង្កូតខុសផ្លូវទៅ វាមិនគ្រោះថ្នាក់ដល់គេទៅហើយទេឬ? អាហ្នឹងវាខ្លាំងជាងស្រាទៅទៀតសរសៃប្រសាទវាខូចប៉ុនណាទៅ!»។
លោកបញ្ជាក់ថា កាលពីឆ្នាំកន្លងមក លោកបានអនុវត្តការត្រួតពិនិត្យលើអ្នកបើកបររថយន្តដែលប្រើប្រាស់គ្រឿងញៀនដែរ តែគ្រាន់តែធ្វើការអប់រំទេ។ ក៏ប៉ុន្តែ ២-៣ ថ្ងៃក្រោយមក ស្រាប់តែលោកឃើញបុគ្គលនោះបើករថយន្តដដែល។ ប៉ុន្តែនៅពេលនេះប្រសិនបើមានអ្នកបើកបររថយន្តប្រើប្រាស់គ្រឿងញៀនហើយទទួលបានការអប់រំពីសមត្ថកិច្ចរបស់លោក និងមិនព្រមអនុវត្តតាមការណែនាំរបស់សមត្ថកិច្ចទេ គឺនឹងត្រូវកសាងសំណុំរឿងបញ្ជូនទៅតុលាការតែម្តង។
ជាមួយគ្នានេះ លោក ចាន់ សុធី នាយការិយាល័យចរាចរណ៍ផ្លូវគោកខេត្តបាត់ដំបងប្រាប់ភ្នំពេញប៉ុស្តិ៍ នៅថ្ងៃទី ២ ខែកុម្ភៈ ថា ចំពោះអ្នកបើកបររថយន្តប្រើប្រាស់គ្រឿងញៀននេះ គឺកាលពីឆ្នាំ ២០២០ សមត្ថកិច្ចរបស់លោកធ្លាប់ឃាត់ខ្លួនបាន ៧-៨ នាក់ ហើយកសាងសំណុំរឿងបញ្ជូនទៅសាលាដំបូងខេត្តបាត់ដំបង។ ប៉ុន្តែឆ្នាំបន្តបន្ទាប់មកនេះ លោកមិនទាន់ឃាត់ខ្លួនបុគ្គលណាទេ។
លោក សុធី បានបញ្ជាក់ថា៖ «អ្នកបើកបររថយន្តហើយប្រើប្រាស់គ្រឿងញៀន គឺមានហានិភ័យខ្ពស់ណាស់។ ពេលគាត់ប្រើប្រាស់គ្រឿងញៀនអ៊ីចឹងទៅ វាធ្វើឱ្យសតិបុគ្គលនោះមិនគ្រប់ទេ។ ធម្មតាទេអ្នកប្រើគ្រឿងញៀនមិនមានសរសៃប្រសាទល្អដូចអ្នកមិនជក់គ្រឿងញៀនទេ បើរេចង្កូតតែបន្តិចទៅនឹងបុកគេហើយ»៕
