ភ្នំពេញៈ នគរបាលព្រហ្មទណ្ឌខណ្ឌពោធិ៍សែនជ័យកំពុងស្រាវជ្រាវរកចាប់ខ្លួនជនសង្ស័យពាក់ព័ន្ធករណីលួចម៉ូតូកម្មករធ្វើការរោងចក្រចំនួន ៦ គ្រឿងកាលពីវេលាទៀបភ្លឺ ថ្ងៃទី ៣១ មករា នៅក្នុងបរិវេណដីឡូត៍ផ្ទះជួល ១ កន្លែងក្នុងភូមិដំណាក់ត្រយឹង សង្កាត់ចោមចៅទី ២ ។
លោក ជា សុវណ្ណ អធិការរងទទួលផែនការងារនគរបាលព្រហ្មទណ្ឌ ខណ្ឌពោធិ៍សែនជ័យ ប្រាប់ភ្នំពេញប៉ុស្តិ៍នៅថ្ងៃទី ២ កុម្ភៈថា ពាក់ព័ន្ធបទល្មើសចោរលួចម៉ូតូនេះត្រូវបានលោក វរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យកំពុងដឹកនាំកម្លាំងសមត្ថកិច្ចជំនាញធ្វើការស្រាវជ្រាវដើម្បីចាត់ការលើរឿងនេះហើយ។ ការងារនេះក៏មានការសហការស្រាវជ្រាវពីកម្លាំងភូមិដំណាក់ត្រយឹង និងអាជ្ញាធរមូលដ្ឋានសង្កាត់ចោមចៅទី ២ ដែរ។
លោកថ្លែងថា៖ «ករណីនេះកម្លាំងជំនាញរបស់ខ្ញុំកំពុងមមាញឹកស្រាវជ្រាវទៅលើទីតាំងកើតហេតុ និងប្រមូលព័ត៌មានដោយធ្វើការសាកសួរសាក្សីនៅជុំវិញទីតាំងកើតហេតុ ដើម្បីកំណត់អត្តសញ្ញាណជនសង្ស័យ»។
លោក សាន ប៉ែត នាយនគរបាលប៉ុស្តិ៍រដ្ឋបាលចោមចៅទី ២ និយាយយ៉ាងខ្លីនៅថ្ងៃទី ២ កុម្ភៈថា ករណីបាត់ម៉ូតូនេះ សមត្ថកិច្ចរបស់លោកនៅមិនទាន់ចាប់ជនសង្ស័យបាននៅឡើយទេ។
បើតាមលោក វ៉ា សារ៉ង ចៅសង្កាត់ចោមចៅទី ២ ឱ្យដឹងនៅថ្ងៃទី ២ កុម្ភៈ តាមសម្តីសាក្សីនៅកន្លែងកើតហេតុថា កាលពីវេលាម៉ោងប្រមាណជា ៤ ទៀបភ្លឺថ្ងៃទី ៣១ មករា ឆ្នាំ ២០២២ មានករណីចោរលួចម៉ូតូអស់ ៦ គ្រឿងនៅក្នុងបរិវេណដីឡូត៍ផ្ទះជួល ១ កន្លែងក្នុងភូមិដំណាក់ត្រយឹង។
នៅក្នុងបរិវេណដីឡូត៍ផ្ទះជួលនោះ ម្ចាស់ផ្ទះជួលគេធ្វើរបងចាក់សោដែលមានច្រកផ្លូវចេញចូលតែ ១ ច្រកទេ។ នៅយប់ថ្ងៃកើតហេតុនោះ ជនរងគ្រោះជាម្ចាស់ម៉ូតូទាំង ៦ នាក់ជាអ្នកធ្វើការរោងចក្រកាត់ដេរវេនយប់ហើយពួកគេត្រូវចេញពីធ្វើការនៅវេលាទៀបភ្លឺ។
លោកបានឱ្យដឹងទៀតថា នៅពេលត្រឡប់មកពីធ្វើការវិញពួកគេបានចតម៉ូតូទុកនៅតាមមុខបន្ទប់ជួលរៀងៗខ្លួន ហើយក៏បានចូលដេក។ លុះដល់ព្រឹកឡើងទើបកម្មករទាំងនោះនាំគ្នាភ្ញាក់ផ្អើលពីការបាត់ម៉ូតូ។
លោកបន្តថា បើតាមការស្រាវជ្រាវពីមេភូមិដំណាក់ត្រយឹង និងពីសមត្ថកិច្ចមូលដ្ឋានដែលបានសាកសួរសាក្សីបានឱ្យដឹងថា ម៉ូតូទាំង ៦ គ្រឿងនោះសុទ្ធតែចាក់សោ ក ទាំងអស់។ នៅវេលាទៀបភ្លឺថ្ងៃកើតហេតុនោះ ជនល្មើសបានកាត់សោទ្វាររបងដីឡូត៍ផ្ទះជួល ហើយបានចូលទៅចងទ្វារបន្ទប់ជួលពីខាងក្រៅទាំងអស់មុនធ្វើសកម្មភាពលួចម៉ូតូ។
នៅវេលាទៀបភ្លឺថ្ងៃដដែលនោះសាក្សីដែលរស់នៅក្បែរកន្លែងកើតហេតុ បានឃើញម៉ូតូទាំង ៦ គ្រឿងនៅលើរ៉ឺម៉ក។ ដូច្នេះលោកអាចសន្និដ្ឋានថា ក្នុងអំពើលួចនេះ ចោរមានគ្នាច្រើនទើបអាចលើកម៉ូតូដាក់លើរ៉ឺម៉កបាន។
លោកចៅសង្កាត់បញ្ជាក់ថា៖ «តាមសាក្សីនៅក្រៅបរិវេណបន្ទប់ជួលថា គាត់បានឃើញក្រុមចោរបើករ៉ឺម៉កចេញទៅដោយមានដឹកម៉ូតូនៅលើរ៉ឺម៉កនោះផង។ អ្នកនៅក្នុងបន្ទប់ជួលទាំងអស់ចេញមិនរួចទេ ព្រោះក្រុមចោរវាចងទ្វារបន្ទប់ជួលពីខាងក្រៅទាំងអស់»៕